قازاقستاندا تۇڭعىش رەت قۇسبەگىلەردىڭ «بەسسايىس» باسەكەسى ءوتتى

تاراز. قازاقپارات - تاراز قالاسىنىڭ ىرگەسىندەگى اتشاباردا قۇسبەگىلەردىڭ «بەسسايىس» باسەكەسى ءوتتى.

ەلىمىزدە تۇڭعىش رەت ءوتىپ وتىرعان تۋرنيردى وبلىستىق سپورت باسقارماسى مەن ق ر ۇلتتىق سپورت قاۋىمداستىعى ۇيىمداستىردى، دەپ حابارلايدى قازاقپارات ءتىلشىسى.

بەسسايىس شارتى بويىنشا ءار قۇسبەگىدە بۇركىت، قارشىعا، يتەلگى مەن تازى ءيت بولۋى مىندەتتەلدى. سونداي-اق، قۇسبەگىنىڭ ءوزى اۋدارىسپاق جەكپە-جەگىنە شىعادى. تۇڭعىش «بەسسايىس» وسىنداي بەس ءتۇرلى باسەكەدەن تۇردى.

ەلىمىز بويىنشا ءدال وسىنداي شارتپەن العاش رەت ۇيىمداستىرىلعان «بەسسايىسقا» قاتىسۋشىلار قۇستى قولعا شاقىرۋ، شىرعاعا سالۋ، سۇڭقارعا دالباي تەپتىرۋ، قارشىعانى قويانعا، تۇلكىگە سالۋ، بۇركىتتى تۇلكىگە، شيبورىگە سالۋ، 500 مەترگە تازى جارىستىرۋ سياقتى باسەكەلەر بويىنشا سىنعا ءتۇستى. ءوز كەزەگىندە قۇسبەگىلەر اراسىنداعى اۋدارىسپاق جەكپە-جەگى دە قىزىق تارتىستى ءوربىدى.

ۇيىمداستىرۋشىلاردىڭ ايتۋىنشا، بولاشاقتا «بەسسايىستا» ءار قۇسبەگىدە ءبىر قۇس پەن تازى عانا بولادى. ەسەسىنە ولار اۋدارىسپاق، ارقان تارتۋ جانە جامبى اتۋدان باق سىناماق.

اتالمىش جارىسقا الماتى قالاسى، الماتى، جامبىل، تۇركىستان، اتىراۋ، اقتوبە، قاراعاندى وبلىستارىنان كەلگەن بارلىعى 16 سپورتشى قاتىسىپ، 16 بۇركىت، 13 تازى، 6 يتەلگى، 5 قارشىعامەن سىنعا ءتۇستى.

تارتىستى وتكەن جارىس ناتيجەسىندە قۇسبەگىلەر اراسىنان جالپى كوماندالىق ەسەپتە جامبىل وبلىسى باس جۇلدەنى يەلەندى.

ال، جۇيرىك تازىسى مەن العىر قارشىعاسى ءبىرىنشى ورىندى، اۋدارىسپاقتا بالۋان قۇسبەگىسى ءۇشىنشى ورىندى، بۇركىتى ەكىنشى ورىندى يەلەنگەن تۇركىستاندىق كوماندا ەكىنشى ورىنعا تابان تىرەدى.

ال، قوس يتەلگىسى جۇلدەلى ورىنعا ىلىككەن الماتى وبلىسىنىڭ كومانداسىنا «بەسسايىس» تۋرنيرىنىڭ ءۇشىنشى ورىنى بۇيىردى.