يزرايلدىك عالىمدار قان وبىرىن ەمدەۋدىڭ جاڭا ءادىسىن ويلاپ تاپتى
عالىمدار بۇل اۋرۋعا قارسى گەندىك ينجەنەريا جەتىستىكتەرىن قولدانعان. ادام اعزاسىنا بوتەن جاسۋشالاردى قۇرتۋعا ءتيىس يممۋندىق جۇيە قاتەرلى ىسىكتى اجىراتا المايدى. سول سەبەپتەن راك جاسۋشالارى كوبەيىپ، بۇكىل اعزاعا تاراپ كەتەدى. جاڭا ءادىس ادام يممۋنيتەتىنە سىرقاتقا قارسى كۇرەسۋگە مۇمكىندىك بەرەدى.
67 جاستاعى وفەر ۆايسمان قاتەرلى ىسىكتىڭ ەڭ قاۋىپتى ءتۇرىنىڭ ءبىرى - ليمفوماعا شالدىققان. بىرنەشە مارتە حيميوتەراپيادان وتسە دە، سىرقاتىنان ايىقپادى.
وفەر ۆايسمان، ناۋقاس:
- بىرنەشە جىلعا سوزىلعان اۋىر تەراپيادان كەيىن دەرتىم قايتا قوزىپ، ءۇمىتىم ۇزىلە باستادى. سول كەزدە ماعان تەلەفون سوعىپ، اسەرى بولاتىن ەمنىڭ تىڭ ءتۇرى بار ەكەنىن ايتتى. ارينە، ەش ويلانباستان كەلىستىم.
بۇل - ليمفوما مەن قاننىڭ وزگە دە ونكولوگيالىق اۋرۋلارىنا قارسى ەمدەۋدىڭ جاڭا تاجىريبەلىك ءادىسى. باعدارلاماعا 70 تەن اسا ناۋقاس قاتىسىپ جاتىر. جاڭا تەراپيانى ۆايتسمان ينستيتۋتىندا ويلاپ تاپقان. بۇل ءادىس جاقسى ناتيجە بەرىپ، ناۋقاستاردىڭ تەڭ جارتىسىنىڭ سىرقاتى جازىلدى. ال قالعاندارىنىڭ دەنساۋلىعى ەداۋىر جاقسارعان.
يريت اۆيۆي، ليمفومانى ەمدەۋ ءادىسىنىڭ اۆتورى:
- ءبىز ناۋقاستىڭ قانىن الىپ، ودان ليمفوتسيتەردى شىعارامىز. گەندىك ينجەنەريا كومەگىمەن ولاردى وزگەرتەمىز. ناۋقاستى اۋرۋحاناعا جاتقىزىپ، ىسىكتىڭ بەلسەندىلىگىن باسۋ ءۇشىن حيميوتەراپيا جۇرگىزەمىز. وسىدان كەيىن ءوزىنىڭ وزگەرتىلگەن ليمفوتسيتتەرىن ەنگىزەمىز. ولار راك جاسۋشالارىن جويا باستايدى. ەمنىڭ جاڭا ءادىسى كەرەمەت ناتيجە بەردى. بۇرىن ليمفومادان ءجۇز ادامنىڭ تەك جەتەۋى جازىلاتىن ەدى.
اشحار زەلەگ، ليمفومانى ەمدەۋ ءادىسىنىڭ اۆتورى:
- بۇل - قاتەرلى ىسىكتى جەڭۋدە تەك العاشقى قادام. ءبىز ەم ءادىسىن ويلاپ تاپتىق، ەندى ۆاكسينا جاساۋدى مەڭگەرىپ كەلەمىز. ول تۇماۋعا قارسى ەكپە جاساۋ سەكىلدى. بۇل شارۋا قولىدان كەلسە، تەڭدەسسىز جەتىستىك بولار ەدى. جىلدان اسا ۋاقىت بۇرىن قۇرىلعان ەمدەۋ ورتالىعىندا بىردە- ءبىر ءولىم دەرەگى تىركەلگەن جوق. ال مۇندا ەم قونباي، ءۇمىت ۇزگەن ناۋقاستاردى العان بولاتىن. جاڭا ءتاسىل ارزانعا سوقپايدى. ەم قۇنى - 250 مىڭ دوللار.
www.24.kz
