قاسىم-جومارت توقايەۆ پەن الەكساندر لۋكاشەنكو كەڭەيتىلگەن قۇرامدا كەلىسسوزدەر وتكىزدى

نۇر-سۇلتان. قازاقپارات - بۇگىن ەلوردادا قازاقستان جانە بەلارۋس پرەزيدەنتتەرى قاسىم-جومارت توقايەۆ پەن الەكساندر لۋكاشەنكو كەڭەيتىلگەن قۇرامدا كەلىسسوزدەر وتكىزدى.

بۇل تۋرالى قازاقپارات اقورداعا سىلتەمە جاساپ حابارلايدى.

تاراپتار كۇن تارتىبىندەگى ەكى جاقتى اۋقىمدى ماسەلەلەردى تالقىلادى. نەگىزگى اڭگىمە ساۋدا-ەكونوميكالىق ارىپتەستىكتى كەڭەيتۋ باعىتىندا ءوربىدى. سونىمەن قاتار مەملەكەتتەر باسشىلارى ساياسي، مادەني-گۋمانيتارلىق سالالار مەن حالىقارالىق قۇرىلىمدار اياسىنداعى ءوزارا ءىس-قيمىلداردى قاراستىردى.

بەلارۋس دەلەگاتسياسىنا ءىلتيپات بىلدىرگەن قازاقستان پرەزيدەنتى ەكى ەلدى دوستىق پەن ىنتىماقتاستىقتىڭ ءداستۇرلى ارقاۋى بايلانىستىراتىنىن ايتتى. قاسىم-جومارت توقايەۆ الەكساندر لۋكاشەنكونىڭ ساپارى ءوزارا ىنتىماقتاستىق ماسەلەلەرىن ەگجەي-تەگجەيلى تالقىلاۋعا جاقسى مۇمكىندىك ەكەنىن اتاپ ءوتتى.

«ءبىز ەلدەرىمىز اراسىنداعى ساۋدا-ساتتىق كولەمىن ۇلعايتۋعا، گۋمانيتارلىق سالاداعى بايلانىستاردى نىعايتۋعا، حالىقارالىق ۇيىمدار اياسىنداعى ىقپالداستىقتى بەلسەندى تۇردە جالعاستىرۋعا مۇددەلىمىز»، - دەدى مەملەكەت باسشىسى.

قازاقستان پرەزيدەنتى كەلىسسوزدەر قورىتىندىسى بويىنشا قول قويىلعان قۇجاتتار ەكى مەملەكەت اراسىنداعى ىنتىماقتاستىقتى تەرەڭدەتۋ ءۇشىن جاسالعان ماڭىزدى قادام سانالاتىنىن جەتكىزدى.

الەكساندر لۋكاشەنكو بەلارۋس-قازاق قاتىناستارىنىڭ دەڭگەيى ەكى ەلدىڭ ستراتەگيالىق مۇددەلەرىنە تولىق ساي كەلەتىنىن ايتتى.

«بۇل - بولاشاققا ماڭىزدى جوسپارلار جاساۋعا مۇمكىندىك بەرەتىن ۇزاق جىلدار بويعى تىنىمسىز ەڭبەكتىڭ ناتيجەسى. مينسكى مەن نۇر-سۇلتان اراسىندا بارلىق دەڭگەيدەگى ىقپالداستىقتىڭ وڭ تاجىريبەسى قالىپتاسقان»، - دەدى بەلارۋس پرەزيدەنتى.

ساۋدا-ەكونوميكالىق بايلانىستارعا توقتالعان الەكساندر لۋكاشەنكو قازاقستاندى نەگىزگى ساۋدا سەرىكتەسى سانايتىنىن ايتتى. ول سوڭعى ءۇش جىلدا ەكى ەلدىڭ ءوزارا تاۋار اينالىمى ەكى ەسەگە ارتىپ، 1 ميلليارد دوللارعا جۋىقتاعانىن مىسالعا كەلتىردى. بۇدان بولەك قازاقستاننىڭ بەلارۋس رەسپۋبليكاسىنا شىعاراتىن يمپورتى 45 پايىزعا وسكەنىن ءمالىم ەتتى.

كەلىسسوزدەر قورىتىندىسى بويىنشا قاسىم-جومارت توقايەۆ پەن الەكساندر لۋكاشەنكو ەكى جاقتى ىنتىماقتاستىقتى جاڭا دەڭگەيگە كوتەرىپ، ءوزارا سەرىكتەستىكتى ودان ءارى جانداندىراتىن جانە حالىقارالىق ارەناداعى ءىس-ارەكەتتەردى ۇيلەستىرەتىن بىرلەسكەن مالىمدەمەگە قول قويدى.

سونداي-اق بەلارۋس پرەزيدەنتىنىڭ قازاقستانعا رەسمي ساپارىنىڭ اياسىندا كەلەسىدەي قۇجاتتارعا قول قويىلدى:

قازاقستان رەسپۋبليكاسىنىڭ ۇكىمەتى مەن بەلارۋس رەسپۋبليكاسىنىڭ ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىم.

قازاقستان رەسپۋبليكاسىنىڭ باس پروكۋراتۋراسى مەن بەلارۋس رەسپۋبليكاسىنىڭ تەرگەۋ كوميتەتى اراسىنداعى ىنتىماقتاستىق تۋرالى كەلىسىم.

قازاقستان رەسپۋبليكاسى ۇلتتىق قاۋىپسىزدىك كوميتەتى جانە بەلارۋس رەسپۋبليكاسىنىڭ پرەزيدەنتى جانىنداعى جەدەل-تالداۋ ورتالىعى اراسىنداعى جەدەل-تەحنيكالىق سالاداعى ىنتىماقتاستىق جانە ءوزارا ءىس-قيمىل جاساۋ تۋرالى كەلىسىم.

قازاقستان رەسپۋبليكاسى مەن بەلارۋس رەسپۋبليكاسىنىڭ سىرتقى ىستەر مينيسترلىكتەرى اراسىنداعى 2020-2021-جىلدارعا ارنالعان ىنتىماقتاستىق جوسپارى.

قازاقستان رەسپۋبليكاسىنىڭ ادىلەت مينيسترلىگى مەن بەلارۋس رەسپۋبليكاسىنىڭ مەملەكەتتىك مۇلىك كوميتەتى اراسىنداعى جىلجىمايتىن مۇلىكتى مەملەكەتتىك تىركەۋ ماسەلەلەرى بويىنشا كەلىسىم.

قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن بەلارۋس رەسپۋبليكاسىنىڭ ۇلتتىق عىلىم اكادەمياسى اراسىنداعى جەردى قاشىقتىقتان زوندتاۋ دەرەكتەرىمەن الماسۋ سالاسىنداعى ىنتىماقتاستىق تۋرالى كەلىسىم.