«التىن ادام» الەم مۋزەيلەرىن ارالايدى
اۆتور قازاقستاننىڭ ۇلتتىق سيمۆولدارىنىڭ ءبىرى سانالاتىن «التىن ادام» ب. ز. د. 500 -جىلدارعا تيەسىلى ەكەنىن جانە ونى شايقاستا قازا تاپقان جاس ساق جاۋىنگەرى كيگەنىن جازادى.
«التىن ادام» 1969 -جىلى الماتىنىڭ شىعىسىندا ەسىك دەگەن جەردەگى مازاردان تابىلعان. كيىم ءتورت مىڭعا جۋىق التىن اشەكەيلەرمەن بەزەندىرىلگەن جانە ولاردىڭ كوبىندە جانۋارلار بەينەسى بار. سونىمەن قاتار ونىڭ باس كيىمىنىڭ بيىكتىگى 70 س م شاماسىندا»، دەپ جازادى اۆتور.
مالايزيانىڭ تۋريزم، ونەر جانە مادەنيەت ءمينيسترى داتۋك كەتاپي بۇل كورمە كەلۋشىلەردىڭ قازاقستان مادەنيەتى تۋرالى ءبىلىمىن تەرەڭدەتىپ قانا قويماي، ديپللوماتياعا دا وڭ اسەر ەتەتىنىن ايتتى.
«مەن بۇل كورمە قازاقستاننىڭ تاريحى مەن مادەنيەتىن تەرەڭ تانۋعا وڭ اسەر ەتەدى دەپ ويلايمىن»، دەدى ول اشىلۋ سالتاناتىندا.
ال مالايزيا مۋزەيلەر دەپارتامەنتىنىڭ باس ديرەكتورى كامارۋل باحارين مالايزيا اتالعان كورمەنى ۇيىمداستىراتىن وڭتۇستىك شىعىس ازياداعى جالعىز مەملەكەت ەكەنىن اتاپ ءوتتى.
«التىن ادامنىڭ الەم مۋزەيلەرىنە شەرۋىن قازاقستاننىڭ ۇلتتىق مۋزەيى مەن مادەنيەت جانە سپورت مينيسترلىگى ۇيىمداستىرىپ جاتىر. كورمەدە «التىن ادامنان» باسقا التىننان جاسالعان بەس جۇزگە جۋىق اشەكەي بۇيىمدار مەن ەجەلگى ءداستۇرلى كيىم ۇلگىلەرى قويىلعان»، دەپ جازادى باسىلىم.
اۆتور: ايكۇمىس بولاتبەك
