قاسىم-جومارت توقايەۆ: ءبىز، ەۋرازيالىقتار، بىرگە بولۋىمىز كەرەك

نۇر-سۇلتان. قازاقپارات - ءبىز، ەۋرازيالىقتار، بىرگە بولۋىمىز كەرەك. مەملەكەت باسشىسى قاسىم-جومارت توقايەۆ جۋىردا عانا سوچيدە وتكەن ۆالداي فورۋمىنا قاتىستى وسىنداي پىكىر ءبىلدىردى.

بۇل تۋرالى پرەزيدەنت ءوزىنىڭ Instagram پاراقشاسىندا جازدى، دەپ حابارلايدى قازاقپارات.

«جۋىردا سوچيدە وتكەن ۆالداي فورۋمىندا الەمدىك ساياساتتاعى شىعىس پەن ەۋرازيانىڭ ءرولى تۋرالى قىزۋ پىكىرتالاس ءوربىدى. سوندا قازاقستاننىڭ دا، رەسەيدىڭ دە ازيا مەن ەۋروپانىڭ ورتاسىندا جاتقان ەۋرازيالىق مەملەكەتتەر ەكەنىن مارتەبەلى ساراپشىلاردىڭ ەستەرىنە سالۋىما تۋرا كەلدى.

ءبىز گەوگرافيالىق جاعىنان دا، تاريحي تۇرعىدان دا، مەنتالدىق ەرەكشەلىگىمىزبەن دە بايلانعانبىز. وسىنىڭ ءبارى ساياساتقا، ءومىر سالتىمىزعا، حالىقتارىمىز بەن مەملەكەتتەرىمىزدىڭ تاعدىرىنا ىقپال ەتەدى. يوسيف ءستاليننىڭ ءومىربايانىنان مىنا ءبىر دەرەك ورىندى مىسال بولسا كەرەك.

1940 -جىلى جاپونيانىڭ سىرتقى ىستەر ءمينيسترىن قابىلدايدى. سوندا ستالين جاپونيانىڭ سوۆەت وداعىنا شابۋىل جاساۋى ىقتيمال ەكەنىن بىلە تۇرا، «ءبىز، ازياتتار، بىرگە بولۋىمىز كەرەك» دەگەن ەكەن. ارينە، مەن ءستاليننىڭ جاقتاۋشىسى ەمەسپىن، دەگەنمەن، ونىڭ پىكىرىمەن كەلىسەم: ءبىز، ەۋرازيالىقتار، بىرگە بولۋىمىز كەرەك»، - دەپ جازدى مەملەكەت باسشىسى.

ايتا كەتەيىك، قاسىم-جومارت توقايەۆ رەسەي پرەزيدەنتى ۆلاديمير پۋتيننىڭ شاقىرتۋىمەن جىل سايىن وتەتىن «ۆالداي» حالىقارالىق پىكىرتالاس كلۋبىنىڭ XVI پلەنارلىق سەسسياسىنا قاتىستى. الەمنىڭ ونداعان ەلىنەن كەلگەن بەدەلدى ساياساتكەرلەر مەن بەلگىلى ساراپشىلاردىڭ، قوعام قايراتكەرلەرىنىڭ باسىن قوسقان بيىلعى فورۋم عالامدىق گەوساياساتتاعى شىعىستىڭ ءرولى تاقىرىبىنا ارنالدى.