ديماش جاتتاۋعا بەرگەن ولەڭدى اندەتىپ ايتاتىن - باستاۋىش سىنىپ ۇستازى

اقتوبە. قازاقپارات - وتىز جىلدان بەرى ۇستازدىق ەتىپ جۇرگەن قاجعالييەۆا كلارا جانۇزاق قىزى بۇگىندە ءوز شاكىرتتەرىمەن ماقتانادى. سولاردىڭ بىرەگەيى - ديماش قۇدايبەرگەن.

 الەم تانىعان ءانشىنىڭ العاشقى ۇستازى، الىپپەنى ۇيرەتكەن ءمۇعالىمى قازاقپارات تىلشىسىنە ەكسكليۋزيۆتى سۇقبات بەردى.

- كلارا جانۇزاق قىزى، الدىمەن ءوزىڭىز تۋرالى ايتىپ بەرسەڭىز.. .

- مەن اقتوبە وبلىسى تەمىر اۋدانى قايىڭدى سوزحوزىندا دۇنيەگە كەلدىم. 3 جاسىمدا سول جەردەگى «ايگولەك» بالاباقشاسىنا، جەتى جاسىمدا اباي اتىنداعى ورتا مەكتەپكە وقۋعا باردىم. ول مەكتەپتى ناعاشى اتامىز نۇرداۋباي اباتوۆ سالعان ەدى. وبلىستىق ءبىلىم بولىمىندە ەڭبەك ەتىپ، قازاق سسر حالىق اعارتۋ ءىسىنىڭ وزىق قىزمەتكەرى اتانعان، بايعانين، شالقار اۋداندارىندا ءبىرىنشى سەكرەتار بولعان. 1969 -جىلى ءوزىنىڭ تۋعان جەرى قايىڭدىدا مەكتەپ سالدىرعان ناعاشىمدى ماقتانىشپەن ايتا جۇرەمىن. بيىل ول ءبىلىم ورداسىنا 50 جىل تولدى. مەكتەپتى ۇزدىك وقىدىم، سىنىپتىڭ «ستاروستاسى» بولدىم. سۇيىكتى ءپانىم - ماتەماتيكا. 1985 -جىلى اقتوبە پەداگوگيكالىق ۋچيليشەسىنە وقۋعا ءتۇستىم. بۇل وقۋ ورنىن بىتىرگەن سوڭ الماتىعا اتتاندىم. ءبىراق اكەم «اۋىلعا كەلسىن» دەگەن حابارىن ايتىپ، سوڭىمنان جەزدەمدى جىبەرگەن ەكەن. سودان «ايگولەك» بالاباقشاسىنا مەڭگەرۋشىسى بولىپ جۇمىسقا ورنالاسىپ، 1989-1992 -جىلدارى ەڭبەك ەتتىم. 1992 -جىلى اۋىلداعى ءوزىم وقىعان اباي اتىنداعى ورتا مەكتەپتە باستاۋىش سىنىپ ءمۇعالىمى بولدىم. 1994 -جىلى «جىل ءمۇعالىمى» سايىسىندا ءوزىمنىڭ ۇستازىممەن بىرگە سىنعا ءتۇسىپ، ءبىرىنشى ورىن الدىم. جاس ماماندار بىرىگىپ، «شىڭدالۋ» توبى قۇرىلدى. وسى توپتى باسقاردىم. ءبارى ءبىزدىڭ مىندەتىمىزگە كىردى، مەكتەپكە تاڭدا بارىپ، كەشكە شىعاتىن ەدىك. ال 1997 -جىلدان كۇنى بۇگىنگە دەيىن №32 مەكتەپ- گيمنازياسىندا باستاۋىش سىنىپقا ساباق بەرىپ كەلەمىن. بارلىعى 30 جىلدا 11 سىنىپقا باستاۋىشتا ساباق بەرىپپىن. ماماندىعىمدى ماقتان تۇتامىن. سەبەبى شاكىرتتەرىم ريزاشىلىعىن ءبىلدىرىپ، العىسىن ايتىپ جاتادى. كەزدەسكەن كەزدە امان- ساۋلىق سۇراپ، قۇشاق جايادى.

- كىمدەردى تاربيەلەدىڭىز؟

- گيمنازياداعى ەڭ العاشقى سىنىبىم ەلىمىزدە تۇڭعىشتاردىڭ ءبىرى بولىپ ۇ ب ت تاپسىردى. سول جىلعى تۇلەكتەرىمنىڭ ءبارى جوعارى بالل جيناپ، ەلىمىزدەگى تاڭداۋلى وقۋ ورىندارىنا گرانتقا ءتۇستى. «التىن بەلگى» يەلەرى كوپ، اۋىلدا جۇرگەنىمدە دە ۇزدىك اتتەستات العاندارى بولدى. اۋىل بالاسىنان گورى قالا بالاسىندا مۇمكىندىك مول. ولار ءتۇرلى وليمپيادالارعا قاتىسىپ، ءبىلىمىن شىڭداي الادى. تەمىرلان جاريكوۆ، كاليما قۇلشايەۆا، ەربول جاۋلىبايەۆ، نۇرسۇلتان دوسەكەشوۆ، دانيار امانوۆتىڭ شوقتىعى بيىك، «التىن بەلگى» يەگەرلەرى. مەن الدىمەن تاربيە بەرۋگە كۇش سالامىن. ۇستاز جەكە تۇلعانى قالىپتاستىرىپ، تاربيەلەپ شىعارۋى كەرەك دەپ ەسەپتەيمىن. ءبىرىنشى ورىندا تاربيە بولعاندىقتان سىنىپتان ءتارتىپسىزىن كورمەدىم. ولار تەنتەك بولىپ، جامان ءسوز ايتقان ەمەس. سىنىپتاعى وقۋشىلارىم ۇيىمشىل بولىپ ءوستى ءارى ۇنەمى ۇلدار باسىم كەلەدى. ۇلداردىڭ داۋىسى گۇر ەتىپ شىققانىن ەستىمەدىم، ءبارى تاربيەلى. ىرىباي التىنسارين «بالاعا بەرىلگەن ءبىرىنشى تاربيە اتا- اناسىن، تۋىسىن، جولداسىن سىيلاۋعا ۇيرەتۋدەن باستالادى» دەپ ايتقان. ءبىلىم بەرۋدىڭ قاي ءتۇرى بولماسىن - تاربيە. تاربيە ارقىلى الىنعان ءبىلىم بالاعا ومىرلىك ازىق بولادى. ءال فارابي «تاربيەسىز بەرىلگەن ءبىلىم ادامنىڭ حاس جاۋى» دەگەن ەكەن. جالپى ۇستازداردىڭ العا قويعان ماقساتى - شاكىرتتەرىنىڭ رۋحاني جان- دۇنيەسىنىڭ باي بولۋى. سونداي بالا كەز كەلگەن جەردە جەتىستىككە جەتەدى، قيىندىقتى جەڭە بىلەدى.

- بالالار ەركە، ونى قالاي كوندىرەسىز، تاربيەلەيسىز؟

- ءبارى وتباسىنا بايلانىستى. جاس كەزىمدە وقۋشىلارىمنىڭ اتا- انالارى ۇلكەن ەدى، قازىرگى وقۋشىلارىمنىڭ اتا- انالارى جاس. بۇرىن ۇلتتىق تاربيە باسىم بولدى. ەندى اتا- انالارعا بالالاردى اتا- اجەسىنە جىبەرۋىن سۇرايمىن. ولاردىڭ تاربيەسى، ءسوزى دە ەرەكشە بولادى. ءيا، بالالار وزگە. ولار كىتاپ وقىمايدى، تەلەفونعا كوپ كوڭىل بولەدى. سوندا دا اتا- انا بالانىڭ نە وقىپ جاتقانىن، تەلەفوندا نەنى قاراپ وتىرعانىن باقىلاعانى ءجون. كىتاپ وقۋ ماڭىزدى. ماسەلەن، ابايدىڭ 175 -جىلدىعىنا وراي جازدا بالالارعا ولەڭ جاتتاۋ، قارا سوزدەرىن وقۋدى تاپسىردىم. قازىر كۇن سايىن ابايدىڭ سوزدەرىن ەسكە ءتۇسىرىپ، ايتىپ وتىرامىز. بالالار باسەكەلەس كەلەدى، ءبىرى جاتتاپ كەلسە، ەكىنشىسى اسىپ ءتۇسۋدى ويلايدى. وسىندايدا دۇنيە قۋۋعا ەمەس، ءبىلىم سايىسىنا بەيىمدەۋ كەرەك. ءبىلىمدى بالا ءوز ءومىرىن جاسايدى. كىتاپ وقىعان ادام قيىن ساتتە اقىلعا توقتايدى، بولاشاعىن ويلايدى، باسىنا ءىس تۇسكەندە ءوز بىلىمىمەن العا ۇمتىلادى.

- بالالار مەكتەپكە بارادى، ءبىلىم الادى. ءبىراق رەپەتيتورعا جۇگىنەتىندەرى دە كوپ. نەگە؟

- مەنىڭ سىنىبىمداعى بالالار رەپەتيتورعا بارمايدى. قازىرگى كەزدە كوبىنىڭ قوسىمشا ساباق الاتىنى شىندىق. بالانىڭ باس ۇستازى - اتا- انا. بالا ۇيدەگى ۇلكەندەرگە قاراپ وسەدى. كۇن سايىن بالامەن 30 مينۋت، 1 ساعات وتىرىپ، قولداۋ كورسەتكەن ءجون. ۇيگە تاپسىرما بەرگەندە بالا ءوزى ورىنداۋى ءتيىس. تەكسەرەسىز، سودان سوڭ دۇرىس جولىن ايتاسىز. رەپەتيتورعا اپارىپ، بالاسىنا اياۋشىلىق كورسەتىپ، ءۇي تاپسىرماسىن ءوزى ورىنداپ تاستاۋ دەگەن بولمايتىن ءىس. ساباق باستالعان كەزدە «كوڭىل- كۇيلەرىڭ قالاي؟ » دەپ سۇرايمىن. اياقتالعاندا «بۇگىنگى كۇنگە ريزاسىڭدار ما؟ » دەپ ايتامىن. ءبىر سىنىپتا ءۇي تاپسىرماسىن ورىنداي المايتىن وقۋشى كەزدەسەدى. ول زاڭدىلىق. ءبارى بىردەي ەمەس، قابىلەتى، زەيىن ءارتۇرلى. ءوزىم ءتورت جىل بالانى وقىتىپ، 5-سىنىپقا بارعاندا ءارقايسىسىنىڭ ەرەكشەلىگى تۋرالى جازىپ ، قۇجات جينايمىن. ءار وقۋشىنىڭ سپورتقا، ونەرگە جاقىن ەكەنىن جازىپ، تاپسىرامىن. كوبى نازاربايەۆ زياتكەرلىك مەكتەبىنە، تۇرىك ليسەيىنە كەتەدى.

- وقۋ ادىستەمەڭىزدى وزگەلەر سۇراپ، تاجىريبە الماسا ما؟

- وتىز جىلدىق ەڭبەگىمدە بىرنەشە وقۋ- ادىستەمە قۇرالىن ازىرلەدىم. «مەنىڭ قۇقىعىم» اتتى ادىستەمەلىك وقۋ قۇرالىن جازدىم. مەكتەپتىڭ العاشقى ديرەكتور ماريا قۇرمانعالييەۆا رەسەيمەن بايلانىس جاساپ، سول ەلدىڭ «يا ي موي مير» دەگەن ادىستەمەلەرىن اكەلدى، ۇلگى رەتىندە سوعان قاراپ ، ءبىز ءوز نۇسقامىزدى ۇسىندىق. وقۋ قۇرالىن تاربيە جۇمىسىمدا پايدالانامىن. بالالاردىڭ قۇقىعى ايتىلىپ، رامىزدەرىمىز كەڭ تانىستىرىلادى. «جاڭا تەحنولوگيا ساباعىندا» اتتى وقۋ- ادىستەمەلىك قۇرالىم دا بار. ءوزىمنىڭ «باستاۋىش سىنىپعا ارنالعان ساباق جوسپارلارىنىڭ جيناعى» اتتى وقۋ ادىستەمەلىك قۇرالىمدا ءىس- تاجىريبيەمدى جيناقتاپ شىعاردىم. مەكتەپتە «مەن زەرتتەۋشىمىن» اتتى باعدارلاما ءالى قولدانىلادى. «مەن وقيمىن، ويلايمىن» دەگەن باعدارلاما دا بار.

- ۇستازدىق ءومىردىڭ قىزىعى نەدە؟

- بالامەن جۇمىس ىستەۋ قىزىق. بالالار - پەرىشتە. ولار ءبىز ويلاماعان نارسەنى سۇرايدى، ايتادى. ساباق كەزىندە 40 مينۋت پارتادا تىك وتىرعاننان گورى شىعارمانى ساحنالاعاندى ۇناتادى. ماسەلەن، الەمگە ايگىلى بولعان ديماشقا جاتتاۋ بەرسەم، ول اندەتىپ ايتىپ بەرەتىن. ول 2001-2005 -جىلدار ارالىعىندا ول مەندە وقىدى. العاشقى قوڭىراۋعا اتا- اجەسى، اتا- اناسى، ناعاشى اجەسى كەلدى. ءبىرىنشى سىنىپقا تاپسىردى، مەندە ءبىلىم الدى. توقسان سايىن بولاتىن جينالىسقا مىندەتتى تۇردە اتاسى مەن اجەسى كەلەتىن. شاكىرتتەرىمە ريزامىن.

- شاكىرتتەرىڭىزدىڭ قىمبات سىيلىعى نە؟

- ماعان بالالاردىڭ ءوز قولىمەن جاساپ بەرگەن قۇتتىقتاۋى ماڭىزدى. كەيبىرى ءتورت شۋماق ولەڭ شىعارىپ بەرەدى. ديماشتىڭ ءوزى دە ولەڭ شىعارىپ بەرىپ ەدى. سالتانات جۇبايەۆا، ايبار جۇلدىزبايەۆ دەگەن شاكىرتتەرىم دە ولەڭ شىعارىپ بەرەتىن. مەندە ساقتاۋلى، اراسىندا الەۋمەتتىك جەلىگە شىعارامىن.

- اۋدارماشى، ينجەنەر، مەملەكەتتىك قىزمەتشى، ونەر ادامدارىن تاربيەلەدىڭىز. ىشىندە الەم تانىعان ديماش قۇدايبەرگەننىڭ جولى ەرەك. ونىڭ بالالىق شاعى قالاي ءوتتى؟

- ديماش 2001 -جىلى كەلدى. الىپپەنى وقىپ تانىسا باستاعاندا- اق ۆوكال ساباعىنا قاتىسىپ جۇرگەنىن ءبىلدىم. ساباق وقۋ وعان جەڭىل، سەبەبى ءارىپتى تانىپ كەلدى. ونىڭ بوس ۋاقىتى بولمادى. مەكتەپكە كەلەدى، كەيىن ۆوكالعا بارادى. كەيدە «اپاي مەن ۆوكالدان سوڭ ۇيدە انا ساباقتى، مىنا ساباقتى وقىدىم» دەپ ايتادى. ول ۇنەمى ساباقتى وقىپ كەلەدى، بارىنە جاۋاپكەرشىلىكپەن قارايدى. بالانىڭ جاقسى بولماعى، تابيعي مەكتەپ - اتا- انادان. ول مۋزىكالىق كوللەدجگە وقۋعا تۇسكەن سوڭ 25 - مامىردا مەكتەپكە كەلدى. قولىندا ءۇش تال اق گۇلى بار. «اپاي، ءسىزدى قاتتى ساعىندىم، قۇتتىقتاپ كەلدىم» دەدى. ءۇش جىل قاتارىنان ءدال وسىلاي گۇل سىيلادى. سودان كەيىن استاناعا وقۋعا كەتتى. قىتايعا كونكۋرسقا قاتىسىپ، ونىنشى تۋردا جۋرناليستەرمەن، وپەراتورلارمەن مەكتەپكە ات باسىن بۇردى. اباي اتامىز «اتانىڭ بالاسى بولما، ادامنىڭ بالاسى بول» دەپ ايتقان ەكەن. ديماش - بار قازاقتىڭ ماڭدايىنا بىتكەن دارا بالا. قازاقتى الەمگە تانىتىپ ءجۇر. ءبىرىنشى سىنىپتان باستاپ قازاق ءتىلىن تەرەڭ مەڭگەردى، اعىلشىن، ورىس تىلىمەن قاتار فرانسۋزشا ۇيرەندى. وعان شەت تىلىندە ءان ورىنداۋ قيىندىق كەلتىرمەگەن بولۋى كەرەك. مەن ءتورتىنشى سىنىپتا وعان «ءانشى بالا» دەپ ايتاتىن ەدىم. سول كەزدە مەكتەپ- گيمنازيانىڭ ون جىلدىعى بولىپ، ءوز سىنىبىم تۋرالى پيراميدا جاسادىم. سول پيرامادانىڭ ەڭ باسىنا ديماشتىڭ سۋرەتىن ءىلىپ، «بولاشاق ءانشى» دەپ جازدىم. سول ءالى ساقتاۋلى، شەتەلدەن كەلگەن قوناقتارعا كورسەتەمىن. «وقۋشىڭ تانىمال، ءوزىڭ دە تانىلاسىڭ» دەپ ايتادى. ءبىراق وتىز جىلدا ەشقانداي ماراپات الىپ كورمەپپىن. قاراپايىم ءمۇعالىممىن. 30 جىلدا 12 رەت ءوز ءبىلىمىمدى جەتىلدىردىم. سىني تۇرعىدان ويلاۋ، اقپاراتتىق تەحنولوگيا، ەلەكتروندى وقۋ، ۇلتتىق تاربيە.. . ءوز- ءوزىمدى جەتىلدىرىپ، وزگەنى وقىتامىن. جىل سايىن مۇعالىمدەر اراسىندا وتەتىن وليمپياداعا قاتىسىپ ءجۇرمىن. باستاۋىش ءپانى مۇعالىمدەرى اراسىنداعى وبلىستىق پاندىك وليمپيادادان بيىل ءبىرىنشى ورىن الدىم.

- ءدال وسىنداي قابىلەتىڭىزبەن جەكە مەكتەپ اشۋ جوسپاردا بار ما؟

- جەكە مەكتەپ اشۋعا بولادى. ءبىراق وقىتاتىن بالام حالىقتىڭ بالاسى، جەكە دارا كەتۋ مەن ءۇشىن ىڭعايسىز. ول ماڭىزدى ەمەس.

- سىزگە بالاسىن سەنىپ تاپسىرىپ، سىزدەن ءبىلىم العانىن قالايتىن اتا- انا كوپ پە؟

- كوپ. تەلەفون شالىپ جاتادى. مەن رەپەتيتور بولعان ەمەسپىن، بولا المايمىن. سەبەبى ماعان قاراپ وتىرعان انام بار. ۇلكەن كىسىنىڭ كۇتىمىن جاساپ، كوپ كوڭىل بولگىم كەلەدى. كىتاپ وقىعاندى، قاجەتتى مالىمەتتەردى جيناعاندى ۇناتامىن. قاتتى شارشاسام توقۋمەن شۇعىلدانامىن. ءبىز ەكى قىز، ءتورت ۇل بولىپ وستىك. ۇلكەن ۇل مال قارايدى، ەكىنشىسى سۋ تاسيدى، ۇشىنشىسىنە اۋلا سىپىرۋ، قار كۇرەۋ مىندەتتەلگەن، اپاما تاماق ىستەۋدى، ماعان ءۇي جيناپ، كىر جۋۋدى تاپسىرادى. انام كىتاپحاناشى بولعان ادام. اۋىلعا كەلگەنىن كىتاپتى الدىمەن ءبىز الىپ، وقيمىز. ساباقتىڭ تاپسىرماسىن ورىنداعان سوڭ كىتاپتى قولعا الامىز. كوبىنە تۇندە فونور جاعىپ وقيتىن ەدىك.

- قازىر قانداي كىتاپ وقىپ ءجۇرسىز؟

- بالامەن جۇمىس جۇرگىزۋ، تاربيەگە قاتىستى كىتاپتاردى وقيمىن. ابايدىڭ قارا سوزدەرىن جىل سايىن قايتالاپ شىعامىن. ءبىراق ۋاقىت تەز وتەدى، ۇلگەرمەيمىز. نەگىزى قىزدارعا تاربيە اناسىنان بەرىلەدى. ول راس. ماسەلەن، انام جازعى دەمالىستا ماعان 16 جۇپ شۇلىق توقىتاتىن ەدى. ويناۋعا، قىدىرۋعا جىبەرمەيدى. قازىر دە وسى تاربيەنى جوعالتپاۋىمىز كەرەك. اتا- انا بالا كىممەن ءجۇر، بوس ۋاقىتىندا نەمەن اينالىسادى دەپ باقىلاۋى ءتيىس. ءىس تىگەتىن قىزدىڭ مىنەزى سالماقتى. كەز كەلگەن نارسەگە قىزىعۋشىلىقپەن قاراپ، ودان وزىنە قاجەتتى نارسە ۇيرەنەدى. سۋرەت سالۋ، بيسسەرمەن ءتۇرلى دۇنيە جاساۋعا بولادى. مەنىڭ سىنىبىمداعى بالالاردىڭ ءبارى ۇيىرمەگە بارادى. ەر بالالار سپورتقا بەيىم. فۋتبولدى جاقسى كورەتىندەرى كوپ. سپورتتىڭ ەڭ جاقسىسى - جۇزە ءبىلۋ. ول بىرىنشىدەن ءوز ءومىرىڭدى ساقتاۋعا ۇيرەتەدى، ەكىنشىدەن بالالاردىڭ بۇلشىق ەتى شىنىعادى. اتا- انا ۇيىرمەنىڭ بارىنە بىردەي قاتىستىرىپ، ۋاقىت وتكىزۋدى ويلاماي، پايدالىسىن تاڭداعان دۇرىس.

- ءبىلىم سالاسىندا، اسىرەسە، مەكتەپ وقۋلىعىنا قاتىستى سىن پىكىر كوپ. ساۋات اشۋمەن ەمەس، الىپپەمەن وقىتقان ءجون دەپ جاتادى. ءسىزدىڭ پىكىرىڭىز؟

- مەن ۇنەمى جاڭا وقۋلىقپەن، جاڭارتىلعان باعدارلامامەن وقىتىپ ءجۇرمىن. ياعني، ءتورت جىل سايىن جاڭا وقۋلىق شىعادى. 2016 -جىلى جاڭا باعدارلاما شىققاندا اتا- انالار قينالدى، كۇدىك كوپ بولدى. «وقىتاتىن، ۇيرەتەتىن مەن، سىزدەر تەك ءۇي تاپسىرماسىندا بالانى قاداعالايسىز» دەپ ايتتىم. قازىرگى باعدارلاما بالانى ىزدەنۋگە ۇيرەتەدى. تاجىريبەلى ماماندار قيىندىق كورمەيدى، جاستار ىزدەنۋى قاجەت. جالپى الىپپە جۇيەلى قۇرىلعان. ءبىرىنشى سىنىپتا تەك الىپپە وقىعاندى قۇپتايمىن. قازىر ءۇش تىلدە وقىتامىز، بالا ارىپتەردەن شاتاسادى. وقۋشىنى كىنالاي المايمىن، قازاقشا جازعاندا اعىلشىن ارىپتەرىن سالىپ وتىرادى. سوندىقتان دا مەن ساۋات اشۋ ساباعى كەزىندە ەسكى الىپپەنى قاتار قولدانامىن. مىندەتىم - الدىما كەلگەن بالانى وقىتۋ. ءبىرىنشى سىنىپتى بىتىرگەن بالا ءبىر مينۋتتا 40 ءسوز وقۋى كەرەك. وسى ماقساتقا جەتۋدىڭ جولىندا ءتۇرلى ءادىس قولدانامىن.

- ءسىز مەملەكەتتىك سىي المادىڭىز، جەرگىلىكتى جەردە العىس حات تا بەرمەدى. دەگەنمەن ءبىلىم سالاسىنداعى مۇراڭىز قالاي باعالانىپ جاتىر؟

-2018 -جىلى استانا قالاسىندا قازاقستان پەداگوگتارىنىڭ يننوۆاتسيالىق يدەيالارىن دامىتۋ ورتالىعىنىڭ ء«بىلىم بەرۋ سالاسىنداعى ۇزدىك ەسىمدەر» جۋرنالىنا شىعىپ، ءبىلىم سالاسىنداعى ەرەكشە ەڭبەگى ءۇشىن «قازاقستان رەسپۋبليكاسىنىڭ قۇرمەتتى پەداگوگى» توسبەلگىسىمەن جانە قۇرمەت گراموتاسىمەن ماراپاتتالدىم. سودان كەيىن تاعى ءبىر قۇجاتتارىمدى الماتىعا جىبەردىم. 2018 -جىلى «SKILLS ACADEMY» ۇيىمداستىرعان «100 جاڭا ەسىم» جوباسىنا قاتىستىم. وندا «OZATTAR - قازاقستان ءبىلىم سالاسى ۇزدىكتەرىنىڭ ەنتسيكلوپەدياسى» شىعىپ، ءبىلىم سالاسىنىڭ ۇزدىك قىزمەتكەرلەرىنىڭ قاتارىنان كورىنگەنىم ءۇشىن «قازاقستان ۇستازى» توسبەلگىسىمەن جانە قۇرمەت گراموتاسىمەن ماراپاتتالدىم. بۇل جەكە ورتالىقتاردىڭ ۇيىمداستىرۋىمەن جاسالعان بايقاۋى ەدى. ءىس- تاجىريبەمدى وسى ارقىلى تاراتتىم. ءوزىم باسىلىمدى ءجيى وقيمىن. بۇرىن «ەگەمەن قازاقستان» گازەتىنە شىققان ادەبيەتشى - عالىم نىسانبەك تورەقۇل ۇلىنىڭ «قازاقتىڭ 100 بي- شەشەنى» دەگەن ايدارمەن شىققان بي- شەشەندەردىڭ عۇمىرناماسىن جيناقتادىم. سونى قيىپ الىپ، جينادىم. قازىر مەكتەپتە پايدالانامىن. ءمۇعالىم بولعان العاشقى كۇننەن- اق اكەم كوپ كومەكتەستى. بۇگىنگى مەنىڭ جەتىستىگىم اكەمنىڭ اقىلى مەن قولداۋى دەپ بىلەمىن.

- اڭگىمەڭىزگە راقمەت، تابىس تىلەيمىز.

اۆتور: التىناي ساعىندىقوۆا