بالامەن از سويلەسۋدىڭ زيانى كوپ - زەرتتەۋ

نۇر- سۇلتان. قازاقپارات - بالا تۋا سالىسىمەن ونىمەن سويلەسە المايتىنىڭ انىق. ءتىپتى، تۇندە دۇرىس ۇيىقتامايتىن بالانى باعامىن دەپ وزىڭدە دە ءال بولمايدى.

 بالا وسە كەلە ولار اڭگىمەگە جاۋاپ بەرە باستايدى. دەگەنمەن، زەرتتەۋلەر كورسەتكەندەي، كەيبىر اتا- انالار بالالارىمەن مۇلدەم سويلەسپەيدى جانە ونىڭ ۇزاقمەرزىمدى كەرى اسەرى وتە كوپ دەپ جازادى BBC.

اۆتوردىڭ ايتۋىنشا، ادامنىڭ بولاشاعىنا كوپ اسەر ەتەتىن نەگىزگى فاكتوردىڭ ءبىرى - ءتىل. ال كوپتەگەن نەيروبيولوگتاردىڭ زەرتتەۋلەرى بالا ءتىلىنىڭ شىعۋى ميدىڭ دامۋىنا جاقسى اسەر ەتەتىنىن كورسەتكەن ەدى.

«نەيروبيولوگتار بالا سويلەي الماسا دا، وعان ءتىل قاتۋدىڭ پايدالى ەكەنىن انىقتادى. اتا- اناسى كوپ اڭگىمە ايتقان بالالاردىڭ وي قابىلەتتەرى جوعارى دەڭگەيدە بولادى. ياعني، پاسسيۆتى تىڭداۋ دا بالاعا جاقسى اسەر ەتەدى. ميدىڭ الەۋمەتتىك جانە تىلدىك قاتىناستارعا جاۋاپ بەرەتىن بولىگى بالالاردىڭ اتا- اناسىمەن قاتىناسىنا بايلانىستى بولادى. اتا- اناسى بالاسىنا قاراپ سويلەگەندە تىلدىك قابىلەتتەر داميدى جانە دۇنيەتانىم دەڭگەيى ارتادى» ، دەيدى عالىمدار.

سونىمەن قاتار، عالىمدار اتا- اناسى سويلەسۋ ءۇشىن بالاسىنا ۋاقىت بولگەن بالالاردىڭ ءتىل بايلىعى جاقسى بولاتىنىن دا انىقتاعان.

«ەرەسەكتەر كۇندەلىكتى كۇيبەڭ تىرلىك پەن كۇيزەلىستەن بالالارمەن سويلەسۋگە از ۋاقىت بولەدى. دەگەنمەن، ءبىزدىڭ بالالارمەن قالاي سويلەسەتىنىمىز، ولاردى قالاي تىڭدايتىنىمىز ولاردىڭ ميىنىڭ دامۋىنا جاقسى اسەر ەتەدى» ، دەلىنگەن ماقالادا.