ا و س ش ك- ءنى ۇيىم ەتىپ وزگەرتۋ ماسەلەسىن تالقىلايتىن ۋاقىت جەتتى – ق ر پرەزيدەنتى
بۇل جايىندا سوچيدە ءوتىپ جاتقان «ۆالداي» حالىقارالىق پىكىرتالاس كلۋبىنىڭ جىل سايىنعى XVI وتىرىسىندا قازاقستان پرەزيدەنتى قاسىم-جومارت توقايەۆ مالىمدەدى، دەپ حابارلايدى قازاقپارات ءتىلشىسى.
قاسىم-جومارت توقايەۆ قازاقستان بارلىق ۋاقىتتا دا پريەۆەنتيۆتى ديپلوماتيا مەن قارۋسىزدانۋدىڭ دايەكتى جاقتاسى بولعانىن جانە بولىپ قالا بەرەتىنىن اتاپ ءوتتى.
«قاۋىپسىزدىك پروبلەمالارىن شەشۋدە ۇجىمدىق ادىستەردى ازىرلەۋ الاڭى رەتىندەگى ءوز ماڭىزىن دالەلدەپ ۇلگەرگەن ازياداعى ءوزارا ءىس-قيمىل جانە سەنىم شارالارى جونىندەگى كەڭەس پايدالى ءرول اتقارا الادى. اتالعان فورۋمدى ۇيىم ەتىپ وزگەرتۋ ماسەلەسىن تالقىلايتىن ۋاقىت جەتتى دەپ سانايمىن»، - دەدى مەملەكەت باسشىسى.
قازاقستان پرەزيدەنتى شىعىستاعى قاۋىپسىزدىكتىڭ ءتيىمدى ساۋلەتىن باتىسپەن ءوزارا ءىس-قيمىلدى جۇزەگە اسىرماستان ىسكە اسىرۋ مۇمكىن ەمەستىگىنە باسا نازار اۋداردى. قازاقستاننىڭ ا و س ش ك مەن ە ق ى ۇ اراسىنداعى ءوزارا ءىس-قيمىلدى جولعا قويۋ قاجەتتىگىن بىرنەشە مارتە ۇسىنعانىن ەسكە سالدى.
«وڭىرىمىزدەگى ورتاق جۇمىسىمىزدىڭ باستى ەلەمەنتى - تەرروريزممەن جانە ەكسترەميزممەن، ۇيىمداستقان قىلمىسپەن، زاڭسىز كوشى-قونمەن، ەسىرتكى تاسىمالىمەن كۇرەس بولا الار ەدى. جاسامپازدىقتىڭ كۇنتارتىبىنە ادامي كاپيتالدى دامىتۋدى، مەملەكەتتىك باسقارۋدىڭ ۇزدىك تاجىريبەسىن ەنگىزۋدى، يننوۆاتسيالىق الەۋەتتى كۇشەيتۋدى، سۋ رەسۋرستارىن ءتيىمدى ءارى ۇتىمدى پايدالانۋدى جاتقىزۋعا بولادى»، - دەدى قاسىم-جومارت توقايەۆ.
مەملەكەت باسشىسى سونىمەن قاتار يادرولىق قارۋدان ازات الەمگە قول جەتكىزۋ قازاقستاننىڭ سىرتقى ساياساتىنىڭ نەگىزگى باسىمدىعى بولىپ قالا بەرەتىندىگىن باسا ايتتى.
