شىن مانىندە اقىل ءتىسىن جۇلۋ قاجەت پە؟
ولار 12 دەن 25 جاس ارالىعىندا جارىپ شىعا باستايدى جانە تەك، وسى كەزەڭدەردەن باستاپ قانا كوبىنە ونى جۇلۋعا كەڭەس بەرەدى. ءبىراق بۇل سونداي قاجەت پە؟
Bilim-all.kz وسى سۇراق توڭىرەگىندە ءار ءتۇرلى پىكىرلەرگە ساراپتاما جۇرگىزدى. دۇرىس شەشىم قابىلداۋ ءۇشىن نەنى بىلگەن قاجەت، مىنەكەي:
قانداي جاعدايدا اقىل ءتىسىن جۇلۋدىڭ قاجەتى جوق
- ەگەر ولار ساۋ بولسا (تىسجەگى جوق، ءتىس اينالاسىنداعى قىزىليەك جيەگى اۋىرماسا).
- تولىقتاي جارىلىپ شىققان.
- دۇرىس ورنالاسقان: كورشى تىستەردىڭ قالىپتى جۇمىس ىستەۋىنە كەدەرگى كەلتىرمەيدى.
- كۇندەلىكتى اۋىز قۋىسىنىڭ گيگيەنالىق تازالاۋ كەزىندە ولار وڭاي تازالانادى.
قانداي جاعدايدا اقىل ءتىسىن جۇلۋ قاجەت
- ءتىستى تولىقتاي قىزىل يەك جاپقان، ءبىراق جارىپ شىعا المايدى. بۇل جاعدايدا ولار، ءوز كەزەگىندە كورشى تىستەردىڭ ءتۇبىرىن قۇرتارلىق ءىرىڭ كەرنەگەن ىسىككە اينالۋى مۇمكىن.
- ءتىس تولىقتاي جارىپ شىقپاعان. گيگيەنالىق جاقتان قيىندىق تۋدىرادى، ارتىنشا باكەريالاردىڭ كوپتەپ جينالۋىنان اۋىز قۋىسىنىڭ ءتۇرلى اۋرۋلارىنا اكەپ سوعادى.
- ەگەر تىسكە ورىن جەتكىلىكسىز بولسا (كورشى تىستەر وتە تىعىز ورنالاسقان)، وندا جارىپ شىققان اقىل ءتىسى كورشى تىستەردى زاقىمداۋعا تاۋەكەل جاسايدى.
- ەگەر ءسىز اقىل ءتىستىڭ ماڭايىنان اۋىرسىنۋ سەزسەڭىز.
- كوپ جاعدايدا اقىل ءتىستىڭ ماڭايىنداعى جۇمساق تىندەرى جۇقپالانعان بولادى.
- ىسىك قالىپتاسقان جاعدايدا.
- قىزىل يەك قابىنسا.
- كورشى تىستەردە تىسجەگى پايدا بولىپ، ولار قۇرتىلا باستاسا.
ەگەر ءسىز ءتىس دارىگەرىنە ءجيى قارالىپ جانە جاق سۇيەگىنىڭ رەنتگەن سۋرەتىن جاساتىپ تۇرساڭىز، وندا سىزگە اقىل ءتىسىن جۇلدىرۋدىڭ قاجەتى جوق. بۇل ورايدا ءسىز اقىل ءتىسىنىڭ دۇرىس وسپەۋىن ەرتەرەك بىلە الاسىز جانە ءتىس جۇلدىرۋ وتاسىمەن الدىن الۋعا بولادى. 25 جاستان كەيىن بارلىق سۇيەك تىندەرى تولىقتاي قالىپتاساتىندىقتان، ءتىستى جۇلۋ كۇردەلىرەك جانە تىندەردىڭ جازىلۋى باياۋ بولاتىندىقتان دارىگەرلەر ءتىس جۇلدىرۋ وتاسىن ەرتەرەك جاساتۋعا كەڭەس بەرەدى.
