فرانسيادا قازاق كينوسىنىڭ فەستيۆالى ءوتتى
پاريجدەگى Cinéma Le Lincoln كينوتەاترىندا ءتورت كۇن ىشىندە وتاندىق كينوتۋىندىلار، ونىڭ ىشىندە «قازاقفيلم» كينوستۋدياسىنىڭ فيلمدەرى كورسەتىلدى. اتالعان فەستيۆالدى قازاقستاننىڭ فرانتسياداعى ەلشىلىگى قولداۋىمەن قازاق كينوسى قاۋىمداستىعى (فرانسيا) ۇيىمداستىرعان.
مادەني ءىس- شارانىڭ نەگىزگى ماقساتى كينەماتوگرافيا سالاسىنداعى ەكى ەل اراسىنداعى ەكىجاقتى قارىم- قاتىناستاردى نىعايتۋ، سونداي- اق كورەرمەندەردى قازاقستاننىڭ قازىرگى كينوسىمەن تانىستىرۋ.
قازاق كينوسىنىڭ فەستيۆالى «ايكا» فيلمىمەن اشىلدى. بۇل كينوتۋىندىنىڭ كورسەتىلىمى كانن فەستيۆالىندە «ۇزدىك ايەل ادام ءرولى» جۇلدەسىمەن ماراپاتتالعان اكتريسا سامال ەسلياموۆا جانە فيلمنىڭ رەجيسسەرى سەرگەي دۆورتسيەۆويدىڭ قاتىسۋىمەن ءوتتى.
سونىمەن قاتار فەستيۆال شەڭبەرىندە ۆيكتوريا ياكۋبوۆانىڭ «ولما دجون» كوركەم فيلمى، دانا مۇسانىڭ «كيەلى بي» جانە ايجان قاسىمبەكوۆانىڭ «سۋ» اتتى قىسقامەتراجدى فيلمدەر كورسەتىلدى.
رەجيسسەر رۇستەم ابدىراشيەۆ جانە اكتريسا مادينا ەسمانوۆا وسى فەستيۆال بارىسىندا كورەرمەندەرگە «قازاق حاندىعى. التىن تاق» تاريحي فيلمىن تانىستىردى. سونداي- اق، «اناعا اپارار جول» فيلمىنىڭ كورسەتىلىمىندە التىناي نوگەربەك جانە ارۋجان جازىلبەكوۆا، ال امىرە قاشاۋبايەۆتىڭ ءومىرى تۋرالى باياندايتىن رەجيسسەر دجەفف ۆەسپانىڭ «امىرە» فيلمىنىڭ تانىستىرىلىمىندا اكتەر سانجار مادي قاتىستى.
ايتا كەتسەك، فەستيۆال بارىسىندا ەرمەك تۇرسىنوۆتىڭ «شىراقشى» جانە فارحات ءشارىپوۆتىڭ «تۇلعالىق ءوسۋ ترەنينگ» فيلمدەرى، سونداي- اق تۇردىبەك مايدان جانە تىلەك ءتولۋعازى تۇسىرگەن «مۇزبالاق» انيماتسيالىق فيلمى كورسەتىلدى. مادەني ءىس- شارانىڭ جابىلۋ سالتاناتىندا رەجيسسەر دوسحان جولجاقسىنوۆتىڭ «قۇنانباي» فيلمى كورسەتىلىپ، بارلىق قاتىسۋشىلارعا ەستەلىك جۇلدەلەر تابىستالدى.
