بەكزات ساتتارحانوۆتىڭ ءرولىن سومداۋعا بالا كەزدەن دايىندالدىم - اكتەر

شىمكەنت. قازاقپارات - شىمكەنتتە «بەكزات» كوركەم فيلمىنىڭ العاشقى كورسەتىلىمى ءوتتى. سيدنەي وليمپياداسىنىڭ چەمپيونى بەكزات ساتتارحانوۆتىڭ ءومىرى مەن سپورتتاعى جەتىستىگىنە ارنالعان جاڭا تۋىندىنى كوپشىلىك ىقىلاسپەن قابىلدادى، دەپ حابارلايدى قازاقپارات ءتىلشىسى.

«حابار» اگەنتتىگىنىڭ تاپسىرىسىمەن تۇسىرىلگەن فيلمنىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. بالالىق شاعى، بوز بالا كەزەڭى جانە ءومىرىنىڭ سوڭعى ءساتى. 90-جىلداردىڭ باسىنداعى قيىن-قىستاۋ زامانعا تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى، نامىسقوي ءبىتىمى ءاربىر ساتتە سىنالىپ وتىرادى.

فيلمنىڭ تۇساۋكەسەرىندە «حابار» اگەنتتىگى ا ق باسقارما ءتوراعاسىنىڭ ءبىرىنشى ورىنباسارى رينات كەرتايەۆ ءتۇسىرىلىم تۋرالى ايتتى.

«بەكزات ساتتارحانوۆ تۋرالى تۇڭعىش اۆتوبيوگرافيالىق تۋىندىنى تاسپالاۋداعى ماقساتىمىز - ەرتە سونگەن جۇلدىزدىڭ ساناۋلى عۇمىرىنداعى جىگەرلى جەتىستىكتەرىن، قايتپاس قايسارلىعىن، ۇلتجاندىلىعى مەن نامىسقويلىعىن كورسەتۋ ارقىلى - بۇگىنگى جاس ۇرپاقتى رۋحتاندىرۋ، جاس سپورتشىلارىمىزعا بۇقارالىق سالاۋاتتى ءومىر سالتىن ناسيحاتتاۋ بولىپ تابىلادى»، - دەدى رينات كەرتايەۆ.

كارتينانىڭ رەجيسسەرى - مۇرات بيدوسوۆ، سەناريىن سەرجان زاكەر ۇلى جازعان. فيلمنىڭ ءتۇسىرىلىم جۇمىستارى تۇركىستان، الماتى جانە ىستانبۇل قالالارىندا وتكەن. باستى ءرولدى جاس اكتەر سامات ءازىمقۇلوۆ وينايدى. ول 2006-2007-جىلدارى كيكبوكستان جاستار اراسىندا ەكى رەت قازاقستان چەمپيونى بولعان. جاس اكتەر ءارى سپورتشى بەكزات ساتتارحانوۆتى بەينەلەۋ اسا قيىن سوقپاعانىن ايتادى.

«بۇل فيلمدە باستى ءرولىن سومداۋعا بالا كەزدەن دايىندالدىم. ويتكەنى بالا كەزدەن-اق بەكزات ساتتارحانوۆ مەنىڭ سۇيىكتى سپورتشىم بولدى. ونىڭ ءومىرىن مەكتەپ كەزىنەن تانىسىپ، ءبىلىپ ءجۇردىم، زەرتتەدىم. سوندىقتان ماعان جەڭىل بولدى. تەك قانا رەجيسسەردىڭ بەرگەن تالاپتارىن ورىنداپ شىقتىم. ال، رولگە كەلەر كەزدە ماعان رەجيسسەر شاقىرىپ، سويلەسىپ، ۇسىنىس جاسادى»، - دەيدى سامات ءازىمقۇلوۆ.

سامات ءازىمقۇلوۆ ءتۇسىرىلىم كەزىندەگى قىزىق وقيعالارى تۋرالى ايتتى.

«ءتۇسىرىلىم كەزىندە كوپتەگەن قيىنشىلىقتار دا بولدى. اسىرەسە كوشەنىڭ توبەلەستەرىن ءتۇسىرىپ جاتقان كەزدە بىرنەشە سوققى العان ساتتەر بولدى. فيلمدە ەڭ تولقىتاتىنى، بەكزات اعامىزدىڭ فينالداعى جەكپە- جەگى. سول جەڭىسكە جەتەر كەزدە بەكزات ساتتارحانوۆ امانگەلدى سەيىتحانوۆپەن سويلەسىپ، «مەن جەڭىسكە جەتەمىن، سول جەڭىسىمدى تۇركىستاننىڭ 1500 جىلدىعىنا ارنايمىن، سونى حالىققا حابارلاڭىز» دەگەن ءساتى بار. سول ءساتتى تۇسىرەر كەزدە قوبالجىپ، كوزىمە جاس العان كەزدەر بولدى. ءبىر ەمەس ءۇش- ءتورت دۋبل جاساۋعا تۋرا كەلدى»، - دەيدى اكتەر سامات ءازىمقۇلوۆ.

كورسەتىلىمدە بەكزات ساتتارحانوۆتىڭ اتا-اناسى قۇرمەتتى قوناق رەتىندە قاتىستى.

«20 جاس عۇمىرىندا قولىنان كەلگەنشە ەلىنە بارلىق كۇش-جىگەرىن بەرىپ كەتتى. بەكزاتقا قانداي ماراپات، قانداي كينو شىعارسا دا ارتىق بولماس. بەكزاتتى جاستاردىڭ الدىنا ۇلگى ەتىپ قويسا... ونىڭ يماندىلىعى، ۇلكەندى سىيلاۋى، قازاقىلىعى، بىربەتتىلىگى، العا قويعان ماقساتىن ورىندايتىن مىنەزى قازىرگى قازاق جاستارىنا كەرەك»، - دەيدى سپورتشىنىڭ اكەسى سەيىلحان ساتتارحانوۆ.

ايتا كەتسەك، تولىق مەتراجدى كارتينا 3- قازاننان باستاپ ەلىمىزدىڭ كينوتەاترلارىندا كورسەتىلە باستايدى.