دارىندى جاستارعا بەيىمبەت مايلين اتىنداعى ستيپەنديا بەرىلەدى
جازۋشىعا ارنالعان شارالار بەيىمبەت مايلين اۋدانىنداعى كونفەرەنتسيامەن باستالدى. جيىنعا وبلىس اكىمىنىڭ ورىنباسارى مارات جۇندىبايەۆ، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، مەملەكەتتىك تاريحي ينستيتۋتىنىڭ جەتەكشى عىلىمي قىزمەتكەرى قۇندىزاي ەرىمبەتوۆا، «ەگەمەن قازاقستان» گازەتى رەداكتورىنىڭ ورىنباسارى ايبىن شاعالاق جانە باسقا دا زيالى قاۋىم وكىلدەرى قاتىسىپ، ءسوز سويلەدى. «بەيىمبەت مايليننىڭ مۇراسى - ۇلتتىڭ اسىل قازىناسى» عىلىمي-پراكتيكالىق كونفەرەنسياسىن اقىن اقىلبەك شاياحمەت جۇرگىزدى.
«ءبي-اعاڭنىڭ ارتىنا قالدىرعان ادەبي مۇراسىنىڭ قازاق ادەبيەتىندە الاتىن ورنى ەرەكشە. ول ءار ءتۇرلى جانردا قالام تەربەپ، ادەبيەتتىڭ قىر-سىرىن جەتىك مەڭگەردى. ونىڭ ولەڭدەرى، پروزالىق جانە درامالىق تۋىندىلارى ادەبي شىعارمالارعا قويىلاتىن جوعارى تالاپتارعا جاۋاپ بەرەدى. سونداي-اق، ول قازاق جۋرناليستيكاسىنىڭ قالىپتاسۋى مەن دامۋىنا ۇلەس قوستى. بيىل 100 جىلدىعى اتالىپ جاتقان «ەگەمەن قازاقستان» گازەتىنىڭ جاۋاپتى حاتشىسى بولدى. مۇحامەدجان سەرالينمەن بىرگە «اۋىل» گازەتىنىڭ نەگىزىن قالادى. ءومىرىنىڭ سوڭعى جىلدارى «قازاق ادەبيەتى» گازەتىندە رەداكتور بولدى»، - دەدى وبلىس اكىمىنىڭ ورىنباسارى.
بەيىمبەت مايليننىڭ دارا تۇلعاسى ۋاقىت وتكەن سايىن اسقاقتاپ، ونىڭ شىعارمالارى حالىقتىڭ اسىل قازىناسىنا اينالدى.
ەسكە سالساق، بيىل قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن بەيىمبەت مايليننىڭ ەسىمى جازۋشى تۋىپ-وسكەن اۋدانعا بەرىلدى.
مارات جۇندىبايەۆتىڭ سوزىنشە، ءبي-اعانىڭ ادەبي مۇراسىن زەردەلەۋ ءۇشىن جاڭا جوبالار باستالادى. ماسەلەن، قوستاناي قالاسىندا جاس ادەبيەتتانۋشى، سىنشىلاردىڭ قاتىسۋىمەن جاستار كونفەرەنسياسى وتەدى.
«وسى جاس عالىمدارعا بەيىمبەت مايلين اتىنداعى ءبىرجولعى ستيپەنديانى تاعايىنداپ وتىرمىز. وبلىستىق مادەنيەت باسقارماسىنا الداعى ۋاقىتتا وسى ستيپەنديانى تۇراقتى نەگىزدە تاعايىنداپ، ونىڭ بەرىلۋ ءتارتىبىن ازىرلەۋدى تاپسىرامىن. سونىمەن قاتار، وبلىستىق تەاترلار ساحناسىندا بەيىمبەت مايلينگە ارنالعان جانە ونىڭ شىعارمالارى بويىنشا سپەكتاكلدەر قويۋ قاجەت»، - دەدى مارات جۇندىبايەۆ.
كونفەرەنسيا بارىسىندا زيالى قاۋىم وكىلدەرى، قالامگەرلەر ۇسىنىستارىن جەتكىزدى. وبلىس اكىمىنىڭ ورىنباسارى ولاردى ەسكەرىپ، ناقتى ءىس-شارالار جوسپارىن قابىلداۋ قاجەتتىگىن ايتتى.
