ليۋكسەمبۋرگتە «قازاق حاندىعى. الماس قىلىش» فيلمى كورسەتىلەدى
فيلم ۇلى گەرتسوگتىقتىڭ الەمدىك پرەمەرالار وتەتىن Utopolis ءزاۋلىم كينوتەاترىندا قويىلادى.
قازاقستان مەن ليۋكسەمبۋرگ ىنتىماقتاستىق قاۋىمداستىعىنىڭ باسشىسى نۇرگۇل تۇرسىنوۆا ەۋروپا جۇرتىنا كورسەتۋ ءۇشىن نەلىكتەن ءىلياس ەسەنبەرليننىڭ «كوشپەندىلەر» تريلوگياسىنىڭ نەگىزىندە تۇسىرىلگەن كينوتاسپا تاڭدالعانىن ءتۇسىندىردى.
«فيلمدە قازاق حاندىعىنىڭ قۇرىلۋ تاريحى ءسوز بولادى. ءبىز وسىنى ەۋروپالىقتارعا كورسەتكىمىز كەلدى»، - دەيدى ن. تۇرسىنوۆا.
كينو قويىلاردا فيلمنىڭ رەجيسسەرىن، پروديۋسەرلەرىن نە بولماسا اكتەرلەردى شاقىرىپ، فۋرشەت وتكىزۋ جوسپارلانىپ وتىر. ماقسات - كورەرمەندەردىڭ فيلمنىڭ شىعارماشىلىق ۇجىمىمەن تىكەلەي سۇحباتتاسۋىنا مۇمكىندىك بەرۋ.
قازاقستان مەن ليۋكسەمبۋرگ ىنتىماقتاستىق قاۋىمداستىعى بىلتىر ن. تۇرسىنوۆا جانە ونىڭ جۇبايىنىڭ باستاماسىمەن قۇرىلعان. ون جىلدان بەرى سوندا تۇراتىن ن. تۇرسىنبايەۆا قازاقستاننىڭ ەلشىلىگىمەن تىعىز بايلانىس ورناتقان. جالپى، ۇلى گەرتسوگتىقتا 60 تان استام قازاقستان ازاماتى تۇرادى.
«ليۋكسەمبۋرگ حالقى فرانسيا مەن گەرمانياعا ەتەنە جاقىن بولعانىمەن، وزدەرىنىڭ ۇلتتىق دارالىعىن ساقتاپ قالعان. وسى جاعىنان العاندا بۇلار بىزگە ۇقسايدى»، - دەيدى ول.
ونىڭ ايتۋىنشا، ەگەر فيلم ليۋكسەمبۋرگتە تابىسقا كەنەلسە، بەلگيا مەن نيدەرلاندتا كورسەتىلەدى.
ايتا كەتەيىك، بۇگىن پاريجدە فرانسياداعى العاشقى قازاق كينوفەستيۆالى باستالدى. 26-29- قىركۇيەك ارالىعىندا وتەتىن شارادا «قازاق حاندىعى» دا كورسەتىلەدى.
فرانسيا استاناسىندا كينوتاسپادان بولەك، كانن فەستيۆالىندە داڭققا بولەنگەن «ايكا»، قازاق جانە فرانسۋز كينەماتوگرافتارى بىرگە تۇسىرگەن «ولما دجون» - ۇزىن-ىرعاسى 10 كارتينا قويىلادى.
