لوندوندا قازاق ادەبيەتىنىڭ اعىلشىن تىلىندەگى انتولوگياسى تانىستىرىلدى
25 - قىركۇيەكتە بريتانيا كىتاپحاناسىندا (لوندون، ۇلى بريتانيا) قازىرگى قازاق پوەزياسى مەن پروزاسى انتولوگياسىنىڭ اعىلشىن تىلىندەگى نۇسقاسىنىڭ تۇساۋكەسەر ءراسىمى ءوتتى.
قازاق ادەبيەتى جيناعىنىڭ اعىلشىن تىلىنە اۋدارماسى مەن باسىلىمىن كوركەم اۋدارما سالاسىنداعى تاجىريبەلى بريتانيالىق مامانداردىڭ قاتىسۋىمەن كەمبريدج ۋنيۆەرسيتەتىنىڭ باسپاسى جاساپ شىقتى. انتولوگيالارعا ءالعىسوزدى بريتانيانىڭ اكادەميالىق قوعامداستىعىنىڭ جارقىن وكىلدەرى جازدى. مىسالى، زاماناۋي قازاق پروزاسىنىڭ انتولوگياسىنا بريتانيا كەڭەسىنىڭ باس ديرەكتورى، سەر كيارەن ديەۆەين ءالعىسوز ارناسا، قازىرگى قازاق پوەزياسىنىڭ جيناعىنا العى ءسوز اۆتورى - ادەبيەتتانۋشى- پروفەسسور دجەيسون حاردينگ.
قازاق پروزاسى مەن پوەزياسىنىڭ كەمبريدج ۋنيۆەرسيتەتى باسپاسىنان جارىق كورىپ، الەمنىڭ ءىرى كىتاپحاناسىندا تانىستىرىلعان اعىلشىن تىلىندەگى انتولوگيالارى ۇلى بريتانيا، ا ق ش، كانادا، اۆستراليا، جاڭا زەلانديا جانە باسقا دا اعىلشىن تىلىندە سويلەيتىن ونداعان ەلدىڭ 8 مىڭنان اسا كىتاپحاناسىنا، ۋنيۆەرسيتەتتەرى مەن عىلىمي ورتالىقتارىنا جەتكىزىلەدى.
تانىستىرىلىمعا بريتانيا كەڭەسىنىڭ، كەمبريدج ۋنيۆەرسيتەتى باسپاسى، بريتانيا كىتاپحاناسىنىڭ باسشىلارى، سونداي- اق اۋدارماشىلار، ادەبي رەداكتورلار، سىنشىلار مەن شولۋشىلار قاتىستى. قازاقستان تاراپىنان شاراعا ق ر پرەزيدەنتىنىڭ كومەكشىسى، «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيا حاتشىسى ايدا بالايەۆا، ق ر ۇلىبريتانياداعى توتەنشە جانە وكىلەتتى ەلشىسى ەرلان ىدىرىسوۆ، ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى، قازاقستان جازۋشىلار وداعى ءتوراعاسىنىڭ ورىنباسارى اقبەرەن ەلگەزەك قاتىستى.
زاماناۋي قازاق ادەبيەتىنىڭ ۇزدىك ۇلگىلەرىنىڭ ب ۇ ۇ 6 تىلىنە اۋدارماسى «جاھانداعى زامانۋي قازاقستاندىق مادەنيەت» جوباسى اياسىندا جۇزەگە اسىپ وتىرعانى ءمالىم. جوبا، ءوز كەزەگىندە، قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن. نازاربايەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ ماڭىزدى باعىتى سانالادى. «جاھانداعى زامانۋي قازاقستاندىق مادەنيەت» جوباسىنىڭ مىندەتى - قازىرگى زامانعى قازاقستاننىڭ ادەبيەت، مۋزىكا، بەينەلەۋ ونەرى، حورەوگرافيا، كينو جانە تەاتر سالالارىنداعى مادەني قازىنالارىن الەم جۇرتشىلىعىنا تانىستىرۋ.
«ءبىزدىڭ جوبامىز 2017 -جىلى ءساۋىر ايىندا تۇڭعىش پرەزيدەنت نۇرسۇلتان نازاربايەۆ ۇسىنعان «رۋحاني جاڭعىرۋ» باعدارلاماسىنىڭ اياسىندا جۇزەگە اسۋدا. ونىڭ وزەگىندە زاماناۋي الەمدە ۇلتتىڭ باسەكەگە قابىلەتتىلىگى ونىڭ مادەني جانە ينتەللەكتۋالدىق پوتەنتسيالىمەن ولشەنەدى دەگەن وي جاتىر. بۇگىنگى تۇساۋكەسەر «جاھاندىق الەمدەگى زاماناۋي قازاقستاندىق مادەنيەت» جوباسىنىڭ اياسىنداعى جۇمىستىڭ جەمىسى. ول قازاقستاندىق ادەبيەت، مۋزىكا، بەينەلەۋ ونەرى، تەاتر جانە كينو تۋىندىلارىن الەمگە تانىستىرۋعا باعىتتالعان. بۇگىنگى جوبامىز جۇيەلى تۇردە جالعاسىن تاۋىپ، مادەنيەت ارالىق قارىم قاتىناستاردىڭ ۇلعايۋىنا نەگىز بولادى دەگەن سەنىمدەمىن» . «رۋحاني جاڭعىرۋ» باعدارلاماسىنىڭ اياسىندا 60 قازاقستاندىق اۆتوردىڭ تاڭدامالى شىعارمالارى تۇڭعىش رەت بىردەن الەمنىڭ نەگىزگى التى تىلىنە اۋدارىلىپ وتىر. جوبانى جۇزەگە اسىرۋعا ۇلى بريتانيا، فرانسيا، يسپانيا، ەگيپەت، قىتاي جانە رەسەيدىڭ جەتەكشى باسپا ۇيىمدارى اتسالىستى. انتولوگيالار الەمنىڭ 90 نان اسا ەلىنە، بەس قۇرلىققا تارايدى. ياعني، بۇرىن- سوڭدى دۇنيەجۇزى وقىرماندارىنىڭ قولىنا تۇسپەگەن قازاق ادەبيەتىنىڭ ۇزدىك ۇلگىلەرىمەن 2,6 ملرد ادام تانىسۋعا مۇمكىندىك الادى. قازىرگى قازاق ادەبيەتى انتولوگياسى مۇنداي اۋقىمدا العاش رەت جارىق كورىپ وتىر. جينالعان تاجىريبەمىز مەن سەرىكتەستەرىمىزدىڭ قولداۋىنا سۇيەنە وتىرىپ، ءبىز وسىناۋ ماڭىزدى مادەني جوبانى ودان ءارى جالعاستىرامىز. كەمبريدج ۋنيۆەرسيتەتىنىڭ باسپاسى جانە بريتانيا كەڭەسىندەگى دوستارىمىزدىڭ ارقاسىندا ماماندار باسىلىمدارعا جوعارى باعاسىن بەرىپ وتىر. ەلىمىزدىڭ، اۆتورلارىمىزدىڭ اتىنان ارىپتەستەرگە شىنايى العىسىمدى جەتكىزگىم كەلەدى» ، - دەدى تانىستىرىلىمدا ءسوز سويلەگەن «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيا حاتشىسى ايدا بالايەۆا.
«رۋحاني جاڭعىرۋ» باعدارلاماسىنىڭ ءبىر باعىتى - «جاھانداعى زاماناۋي قازاقستاندىق مادەنيەت» جوباسى اياسىندا قازىرگى قازاق ادەبيەتىنىڭ قوس انتولوگياسى اۋدارىلىپ، جارىق كوردى. ولار - «قازىرگى قازاق پروزاسىنىڭ انتولوگياسى» جانە «قازىرگى قازاق پوەزياسىنىڭ انتولوگياسى» . ءار انتولوگيانىڭ كولەمى - شامامەن 500 بەتتەي، ءارقايسىسىنا 30 قازاقستاندىق اۆتوردىڭ تاڭدامالى شىعارماسى ەندى.
انتولوگيانى اعىلشىن تىلىنە اۋدارىپ، باسپادان شىعارۋ بويىنشا ستراتەگيالىق سەرىكتەسىمىز - بريتانيا كەڭەسى. ولار جوباعا ساراپشىلىق قولداۋ كورسەتتى. ال، ەڭ باستى سەرىكتەس - كەمبريدج ۋنيۆەرسيتەتىنىڭ باسپاسى (sambridge University Press) ۇلتتىق اۋدارما بيۋروسىمەن بىرگە جولما- جول اۋدارمانى ادەبي وڭدەۋ، باسپاعا دايىنداۋ، باسىپ شىعارۋ، سونداي- اق باسىلىمداردى اعىلشىن ءتىلدى ەلدەردە تاراتۋ، جەتكىزۋ جانە ناسيحاتتاۋ بويىنشا كەشەندى جۇمىستاردى اتقاردى.
