نۇرلان نىعماتۋلين قازاقستانعا العاش رەت كەلگەن سولتۇستىك ماكەدونيا دەلەگاتسياسىمەن كەزدەستى
بۇل تۋرالى ق ر پارلامەنتى ءماجىلىسىنىڭ باسپا ءسوز قىزمەتى حابارلايدى.
تاراپتار ەكى ەل اراسىنداعى، سونىڭ ىشىندە، پارلامەنتارالىق ىقپالداستىقتى نىعايتۋدىڭ وزەكتى ماسەلەلەرىن تالقىلادى.
ەڭ الدىمەن ءماجىلىس سپيكەرى كەشە نۇر- سۇلتاندا وتكەن ەۋرازيا ەلدەرى پارلامەنتتەرى سپيكەرلەرىنىڭ 4-كەڭەسىنە قاتىسىپ، ەۋرازيا كەڭىستىگىندە قاۋىپسىزدىك پەن تۇراقتىلىقتى قامتاماسىز ەتۋ جولىنداعى پارلامەنتتەردىڭ ءوزارا ءىس- قيمىلى تۋرالى وي- پىكىرلەرىن ورتاعا سالعانى ءۇشىن مارتەبەلى مەيمانعا العىس ءبىلدىردى.
ءبىزدىڭ ەلىمىز سولتۇستىك ماكەدونيامەن ىنتىماقتاستىقتى نىعايتۋعا ىنتالى ەكەنىن العا تارتقان ن. نىعماتۋلين باسىم باعىتتار ىشىندە، اسىرەسە ساۋدا- ەكونوميكالىق، اۋىلشارۋاشىلىعى ونىمدەرىن قايتا وڭدەۋ سالالارىن، سونداي- اق مادەني- گۋمانيتارلىق ارىپتەستىك اياسىندا تۋريزمنىڭ تيىمدىلىگىن اتاپ ءوتتى. سولتۇستىك ماكەدونيا تاۋ ءتۋريزمىنىڭ ورتالىعى رەتىندە تانىمال.
ال، ساياسي ىقپالداستىقتى نىعايتۋدا پارلامەنتارالىق بايلانىستىڭ ماڭىزى زور. وسى رەتتە تاراپتار بەيىندى كوميتەتتەر مەن پارلامەنتارالىق توپتار شەڭبەرىندە زاڭنامالىق تاجىريبە الماسۋدى ودان ءارى ىنتالاندىرۋ توڭىرەگىندە پىكىر الماستى. سونداي- اق، ءماجىلىس ءتوراعاسىنىڭ پىكىرىنشە، پارلامەنتارالىق وداق، ەقىۇ پارلامەنتتىك اسسامبلەياسى سىندى حالىقارالىق الاڭداردا ورتاق ۇستانىمداردى ۇيلەستىرۋ ماڭىزدى.
ءوز كەزەگىندە تالات دجافەري بارلىق سالادا ءبىزدىڭ ەلدەرىمىزدىڭ جان- جاقتى سەرىكتەستىگىن نىعايتۋ ءۇشىن پارلامەنتتىك ديپلوماتيانى كۇشەيتۋ جايىنا جان- جاقتى نازار اۋداردى. سولتۇستىك ماكەدونيا وكىلى نۇر- سۇلتاندا ەۋرازيا ەلدەرى پارلامەنتتەرى سپيكەرلەرىنىڭ 4-كەڭەسى وتە جوعارى دەڭگەيدە وتكەنىن جانە ەۋروپا مەن ازيا ەلدەرى اراسىندا پارلامەنتتىك ديالوگتى دامىتۋعا جاڭا سەرپىن بەرگەنىن ەرەكشە اتاپ ءوتتى.
پالاتا سپيكەرى رەسمي دەلەگاتسيا ساپارى ءبىزدىڭ ەلدەرىمىزدىڭ كوپجاقتى ىنتىماقتاستىعىن ىنتالاندىرۋعا ىقپال ەتەتىنىنە سەنىم ءبىلدىردى.
