سيريالىق كيكىلجىڭ جانە جاھاندانۋمەن كۇرەس - ترامپ پەن ەردوعان باس اسسامبلەيادا نە تۋرالى ايتتى
اتاپ ايتقاندا، الەمدىك دەرجاۆا كوشباسشىلارى سيريالىق شيەلەنىس سالدارىن شەشۋ جانە ۇلتتىق سايكەستىكتى ساقتاپ قالۋ ماسەلەلەرىن قوزعادى، دەپ حابارلايدى قازاقپارات ءتىلشىسى.
«ءبىزدىڭ تاڭعاجايىپ عالامشارىمىزدى الىپ قاراساق، شىندىق كورىنىپ تۇر: ەگەر ءسىز ازاتتىقتى قالاساڭىز، ەلىڭىزدى ماقتان تۇتىڭىز. ەگەر سىزگە دەموكراتيا قاجەت بولسا، ەگەمەندىگىڭىزدى نىعايتىڭىز. ەگەر ءسىز بەيبىتشىلىكتى قالاساڭىز، حالقىڭىزدى جاقسى كورىڭىز. دانا كوشباسشىلار ءوز حالقىنىڭ مۇددەسى ءۇشىن ارەكەت ەتەدى. بولاشاق جاھاندانۋشىلاردىڭ قولىندا ەمەس، بولاشاق پاتريوتتاردىڭ، ءوز ازاماتتارىن قورعايتىن، كورشىلەرىنە قۇرمەتپەن قارايتىن تاۋەلسىز ەلدەردىڭ قولىندا»، - دەدى ا ق ش پرەزيدەنتى دونالد ترامپ سويلەگەن سوزىندە.
امەريكالىق كوشباسشى ا ق ش-تىڭ ءاربىر حالىقتا بار سالت-داستۇرلەردى بارىنشا قولدايتىنىن اتاپ ءوتتى.
«ا ق ش مەن سايلانعاننان كەيىن قارۋلى كۇشتەردى تولىقتاي قايتا قۇرۋعا 2,5 تريلليون دوللار جۇمساي وتىرىپ، ەڭ مىقتى ەل بولىپ وتىر. بۇل كۇشتى قولدانۋعا ءماجبۇر بولمايمىز دەپ ۇمىتتەنەمىن. الەم ۇستەمدىككە، باسىمدىققا ۇمتىلسا، ەلىمىز بايلىق جاعىنان، كۇش-قۋات پەن رۋحاني تۇرعىدان كۇشتى بولۋ كەرەكتىگىن امەريكالىقتار جاقسى بىلەدى. سوندىقتان، ا ق ش ءبىزدى وسى دەڭگەيگە جەتكىزگەن سالت-داستۇرلەردى قولدايدى»، - دەپ اتاپ ءوتتى ا ق ش پرەزيدەنتى.
«مەنىڭ سۇيىكتى ەلىم سياقتى وسى زالدا وكىلدەرى وتىرعان ءار مەملەكەتتىڭ ءوز تاريحى، مادەنيەتى، مۇراسى بار. بۇل بىزگە بىرەگەي الەۋەت پەن كۇش-قۋات بەرەدى. تاۋەلسىز الەم ۇلتتىق نەگىزدەرىنە سۇيەنۋى ءتيىس»، - دەدى ول.
ءوز كەزەگىندە، تۇركيا پرەزيدەنتى رەجەپ تايىپ ەردوعان سيريالىق بوسقىندار ماسەلەسىن شەشۋدى ۇسىندى.
«ءبىز بارلىق تەرروريستىك ۇيىمداردى جويماي، سيريالىق شيەلەنىستىڭ شەشىمىن تاپپايمىز. سيريادا قاۋىپسىز ايماق قۇرۋ تۋرالى ا ق ش-پەن كەلىسسوزدەرىمىز جالعاسىپ جاتىر. ءبىز ىشكە قاراي 30 ك م جانە ۇزاقتىعى 480 شاقىرىم بولاتىن بەيبىت ءدالىز جاساۋدى ۇسىنىپ وتىرمىز. بۇل ارقىلى حالىقارالىق قوعامنىڭ قولداۋىمەن 2 ميلليون سيريالىقتى جاڭا جەرگە ورنالاستىرۋعا بولادى»، - دەپ اتاپ ءوتتى تۇركيا كوشباسشىسى.
«ەگەر اتالعان قاۋىپسىز ايماق ماقۇلدانسا، ءبىز وسى جەرگە 1-2 ميلليون بوسقىندى ورنالاستىرۋ مۇمكىندىگى تۋرالى مالىمدەي الامىز. ا ق ش، رەسەي جانە يراننىڭ كواليتسيالىق كۇشتەرى - بارلىعىمىز كۇش بىرىكتىرىپ جۇمىس ىستەپ، سول جەرگە بوسقىنداردى ورنالاستىرامىز. ءبىراق، بىرلەسىپ جۇمىس ىستەۋىمىز قاجەت، سەبەبى بۇل ماسەلەنى جالعىز شەشۋ مۇمكىن ەمەس»، - دەپ اتاپ ءوتتى ول.
ر. ەردوعان تۇركيانىڭ تەڭ توراعالىعىمەن وتەتىن حالىقارالىق كونفەرەنسيا تۋرالى ايتتى.
«بىزدە دايىندىق جۇمىستارى قىزۋ ءجۇرىپ جاتىر، سونداي-اق ليۆان، يراك جانە يوردانيا قاتىساتىن الەۋەتتى حالىقارالىق كونفەرەنسياعا دايىندىق ۇستىندەمىز. جەلتوقسان ايىندا جەنەۆادا تۇركيانىڭ تەڭ توراعالىعىمەن وتەتىن بوسقىندار ماسەلەسى بويىنشا جاھاندىق فورۋمدى وتكىزۋ دە ەرەكشە ماڭىزدى. ادامداردى قاۋىپسىز ايماقتارعا قايتارۋدى قولداۋ ءۇشىن ب ۇ ۇ باسشىلىعىمەن كونفەرەنسيا ۇيىمداستىرۋعا دا بولار ەدى دەپ ۇمىتتەنەمىن»، - دەدى ول.
بۇگىن ءبىلىم بەرۋدى دامىتۋ ماسەلەلەرىنە دە ەرەكشە نازار اۋدارىلدى. ب ۇ ۇ باس اسسامبلەياسى 74-سەسسياسىنىڭ ءتوراعاسى تيدجاني مۋحامماد-باندە وقۋ پروتسەسىن مودەرنيزاتسيالاۋ سالاسىنداعى ىنتىماقتاستىققا شاقىردى.
اۆتورى ازامات سىزدىقبايەۆ
