قىزىلوردادا ءداستۇرلى اقىندار مەكتەبى اشىلادى

 قىزىلوردا. قازاقپارات - قىزىلوردا وبلىسىندا بەلگىلى ايتىسكەر- اقىن زامەتدين يبادۋللايەۆ اتىنداعى ءداستۇرلى اقىندار مەكتەبى اشىلادى.

اقىندار مەكتەبى ونەر يەسىنىڭ ءوزى ءومىر سۇرەتىن سىرداريا اۋدانىندا تۇساۋىن كەسەدى، دەپ حابارلايدى قازاقپارات ءتىلشىسى.

اتالمىش يگى شارا تۇڭعىش پرەزيدەنت - ەلباسى ن. ءا. نازاربايەۆتىڭ « بولاشاققا باعدار: رۋحاني جاڭعىرۋ» باعدارلاماسى اياسىندا جۇزەگە اسادى.

بۇل جاعىمدى جاڭالىقتى سىرداريا اۋدانىنىڭ اكىمى رۋسلان رۇستەموۆ جاريا ەتتى.

اۋدان اكىمى الەۋمەتتىك جەلىدەگى جازباسىندا « قازاق رۋحانياتىندا وزىندىك ورنى بار زامەتدين يبادۋللايەۆتى اقتاڭگەر ايتىس اقىنى دەپ قۇرمەت تۇتامىز. ءسوز ونەرىنىڭ قۇدىرەتى مەن اقىن قيالىنىڭ ۇشقىرلىعىن جوعارى باعالاي الامىز. جاقىندا اۋدان اكىمدىگىندە اپپاراتتىق ءماجىلىس وتكىزىلىپ، اۋداننىڭ مادەنيەت سالاسىندا اتقارىلعان جانە جۇزەگە اسىرىلاتىن جۇمىستار كەڭىنەن تالقىلاندى. ءتيىستى سالا باسشىلارىنا « زامەتدين يبادۋللايەۆ اتىنداعى ءداستۇرلى اقىندار مەكتەبىن» اشۋ جونىندە ۇسىنىس ەنگىزۋگە تاپسىرما بەردىم. جۋىردا اۋداندىق ءماسليحاتىنىڭ شەشىمىمەن زامەتدين يبادۋللايەۆقا « سىرداريا اۋدانىنىڭ قۇرمەتتى ازاماتى» اتاعى بەرىلدى» ، - دەپ جازدى رۋسلان رۇستەموۆ.

زامەتدين يبادۋللايەۆ 1939 - جىلى قىزىلوردا وبلىسى سىرداريا اۋدانى اقجارما اۋىلىندا دۇنيەگە كەلگەن. ونەر يەسى تۋعان توپىراقتان جىراققا كەتپەي- اق ۇلكەن تابىستارعا قول جەتكىزدى. وتكەن عاسىردىڭ جەتپىسىنشى- سەكسەنىنشى جىلدارى ايتىستا ءوز ورنەگىن تانىتا ءبىلدى. سونىڭ ىشىندە ايتىستىڭ وتىرىك ولەڭ تۇرىنەن جۇرتشىلىققا كەڭىنەن تانىمال بولدى. سونداي- اق، ز. يبادۋللايەۆ قازاق حالقىنىڭ كوپتەگەن قيسسا- داستاندارىن جاس ۇرپاققا جەتكىزۋدە ولشەۋسىز ەڭبەك ءسىڭىردى. قازىرگى تاڭدا ول كىسىنىڭ رەپەرتۋارىندا « كورۇعلى» ، « ازىرەتالى مەن داريعا قىزدىڭ كۇرەسى» ، « ءجۇسىپ- زىليحا» ، « ايشا ءبيبى تۋرالى اڭىز» ، « حازىرەتالى عالي جايلى حيكايا» سەكىلدى تۋىندىلار بار.

بۇدان بۇرىن يراندا « قورقىت اتا» كىتابىنىڭ جاڭا نۇسقاسى تابىلعانىن حابارلاعان ەدىك.