قىرعىز دەپۋتاتى: «ءجۇرسىن ەرمان قازاق پەن قىرعىزدىڭ اراسىن ءبولىپ ءجۇر»
ءجۇرسىن ەرماننىڭ وسى ءبىر ءسوزى ايىرقالپاقتى اعايىندارعا ۇناي قويماپتى. قىرعىز جوعارعى كەڭەسىنىڭ دەپۋتاتى، «ايتىس» قوعامدىق قورىنىڭ قۇرىلتايشىسى سادىق شەر-نياز الەۋمەتتىك جەلىدەگى ءوز پاراقشاسىندا ءجۇرسىن ەرمانعا جاۋاپ قايتاردى.
«جاقىندا ءبىر تويدا جەڭىسبەك اقىنعا جولىعىپ قالدىم. جادىراپ-جايناپ، شۇرقىراسىپ امانداستىق. «قازاقستانعا بارىپ كەلىپسىڭ، قالاي بولدى؟» دەپ سۇراپ ەدىم، ءجۇزى سۇر بۇلتتاي تۇنەرىپ كەتتى. «جارىم فينالعا دا شىعارعان جوق»، دەدى. سوسىن ءجۇرسىن ەرمان بايگەسىن بەرىپ جاتىپ «300 مىڭ تەڭگە بۇل قىرعىزدار ءۇشىن ۇلكەن اقشا» دەپ ايتتى» دەدى. جەڭىسبەكتىڭ بۇل اڭگىمەسىنە مەن دە ىزالانىپ قالدىم. ەسىمە ءبىر جاعداي ءتۇستى، 2003 -جىلى استانادا وتكەن ءبىر ايتىستا دا ءجۇرسىن ەرمان ءدال وسىلايشا قىرعىز بەن قازاق اقىندارىنىڭ اراسىنا سىنا قاققانى بار ەدى. مۇنداي جاعداي اقىندارىمىزدىڭ اراسىن بۇزادى عوي.
ءوز باسىم مىرزاتاي جولداسبەكوۆ، ءابىش كەكىلبايەۆ سياقتى اقساقالداردى، ولە-ولگەنشە «اينالايىن» دەپ وتكەن فاريزا وڭعارسىنوۆانى وتە قاتتى سىيلايمىن، قۇرمەتتەيمىن. بۇلار ەكى ەلدىڭ ىنتىماعىن ويلاپ ءجۇردى. قۇدايعا شۇكىر، ولجاس سۇلەيمەنوۆ، مۇحتار شاحانوۆ اعالارىمدى كورگەندە شەر تارقاتىپ، اعىل-تەگىل اڭگىمەلەسىپ قالامىن.
اسانالى ءاشىموۆ، نۇرجۇمان ىقتىمبايەۆ اعالارىمىزدى كورگەندە ءبىر-ءبىرىمىزدى ارقا-جارقا قۇشاقتاي جونەلەمىز. ساتىبالدى نارىمبەت، ەرمەك تۇرسىنوۆ، قانات تورەباي، دارەجەن ومىربايەۆ دوستارىمنىڭ قازاق-قىرعىز دەگەندە جۇرەكتەرىنىڭ اق ەكەنىن ەجەلدەن بىلەمىن. ءبىراق، ءجۇرسىن ەرماننىڭ جۇرەگى اعارمادى.
«300 مىڭ تەڭگە بۇل قىرعىزدار ءۇشىن ۇلكەن اقشا» دەپ تاۋىپ ايتقان ءسوزىن قاراساڭىزشى... ماسەلە اقشادا ما ەكەن، ماسەلە اقىننىڭ كوڭىلىندە ەمەس پە؟ ماسەلە ابىروي مەن ار-نامىستا ەكەنىن وسىنشاما جىلداردان بەرى تۇسىنبەگەن ءجۇرسىن ەرمان ەندى تۇسىنەدى دەپ ويلامايمىن. اقىندار ەكى ەلدى بىرىكتىرىپ، ەڭ الدىمەن ىنتىماقتى ويلاپ ءجۇرۋى كەرەك. جارىقتىق، ءبىر ءۇش تيىن بەرگەنىن مىندەتسىنىپ، لايعا اۋناتىپ، بۇل جولى دا ءبۇتىن نارسەنى جارىپ بەرىپسىز.
ءسىز قىرعىز- قازاقتىڭ دوستىعىن بۇدان كەيىن دە تۇسىنبەيتىن سياقتىسىز، مەن سول ءۇشىن وسىنى جازىپ وتىرمىن. تاۋەلسىز تاريحىمىزدا ءبىر تۋعان ەكى ەلدى ءبولىپ-جارىپ جۇرگەندەر كىم دەسە، تايىنباستان ءبىرىنشى قاتارعا ءسىزدى قويار ەدىم. ەگەر بەرگەن تيىنىڭىز كوپ بولىپ كورىنسە، «ايتىس» قورىنان ەكى ەسە قىپ قايتارىپ، ەسەپ-شوتىڭىزعا سالىپ جىبەرۋگە بولادى. تەك قىرعىزدىڭ ار-نامىسى اقشامەن عانا شەكتەلمەيتىنىن ءبىلىپ جۇرسەڭىز بولعانى. ءسىز وسىنداي ارەكەتتەرىڭىز ارقىلى قازاق اقىندارىنىڭ اراسىن دا ويران قىلىپ الاسىز عوي دەپ بولجاپ وتىرمىن.
قىرعىز اقىندارىنا ايتارىم، سالت-ءداستۇردى، قادىر-باقتى، داۋلەتتى قادىرلەي بىلمەگەن ءجۇرسىن ەرمان ايتىسقا شاقىرسا، بارماي-اق قويىڭدارشى، التىندارىم. ءبارىبىر ول سىزدەردىڭ قادىرلەرىڭە جەتپەيدى، ودان دا ءوزىمىزدىڭ اقيقات، ءادىل ايتىسىمىزدى وتكىزىپ، ءبىر تۋعان ەكى ەلدىڭ ىنتىماعىن شىڭداي بەرەيىك»، - دەپ جازدى قىرعىز دەپۋتاتى ءوز فەيسبۋك پاراقشاسىندا.zhasalash.kz
