نۇر- سۇلتاندا كۇرەستەن الەم چەمپيوناتىنىڭ رەسمي اشىلۋى ءوتتى

نۇر- سۇلتان. قازاقپارات - ەلوردادا گرەك- ريم، ەركىن، ايەلدەر كۇرەسى مەن گرەپلينگتەن الەم چەمپيوناتىنىڭ اشىلۋ سالتاناتى ءوتتى، دەپ حابارلايدى قازاقپارات ءتىلشىسى.

توكيوداعى جازعى وليمپيادا ويىندارىنا جولداما بەرەتىن ءتۋرنيرلىڭ رەسمي اشىلۋ سالتاناتىنا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ پەن نۇر- سۇلتان قالاسىنىڭ اكىمى التاي كولگىنوۆ قاتىستى.

«ەلىمىزدىڭ استاناسىنا، نۇر- سۇلتان قالاسىنا قوش كەلدىڭىزدەر! بۇل چەمپيوناتقا 105 مەملەكەتتەن مىڭنان استام سپورتشى قاتىسۋدا. وزدەرىڭىز بىلەتىندەي، بۇل الەم چەمپيوناتى توكيودا 2020 -جىلى وتەتىن جازعى وليمپيادا ويىندارىنا ارنالعان العاشقى بىلىكتىلىك ءتۋرنيرى بولىپ تابىلادى. ءبىز بۇل چەمپيوناتتى نۇر- سۇلتان قالاسىندا وتكىزگەنىمىزگە وتە قۋانىشتىمىز. بۇل وقيعا ءبىزدىڭ تاريحىمىزداعى ەڭ ۇزدىك سپورتتىق شارالاردىڭ ءبىرى رەتىندە ەستە قالادى» ، - دەدى قالا اكىمى التاي كولگىنوۆ.

14 - قىركۇيەكتە باستالعان الەم چەمپيوناتى 22 - قىركۇيەككە دەيىن جالعاسادى. بۇل بىرىنشىلىكتە ءوز سالماعى بويىنشا ۇزدىك شىققان 6 سپورتشى توكيو وليمپياداسىنا جولداما الادى.

بۇعان دەيىن حابارلانعانداي، چەمپيوناتقا 1002 اتلەت قاتىسادى. ولار 105 ەلدىڭ نامىسىن قورعايتىن بولادى. جارىستان حابار تاراتۋ ءۇشىن الەمنىڭ ءار تۇكپىرىنەن 250-دەن استام جۋرناليست كەلگەن. چەميپوناتقا بەس قۇرلىقتان 60 تان استام وليمپيادا چەمپيوندارى مەن جۇلدەگەرلەر كەلۋى جارىس كورىگىن قىزدىرىپ وتىر.

 

ولاردىڭ قاتارىندا قوناق رەتىندە شاقىرىلعان ارداگەرلەر دە بار. اتاپ ايتقاندا، قازاقستاندىقتارعا ەتەنە تانىس بولىپ كەتكەن الەكساندر كارەلين، امەريكاندىق جاس جۇلدىز كايل سنايدەر، ءتورت دۇركىن الەم چەمپيونى، وليمپيادا چەمپيونى دجوردان بارروۋز، بەلگىلى جاپون چەمپيونى كاوري يتە، ارتۋر الەكسانيان، لوپەس نۋنەس، قازاقستاننىڭ تۋماسى ۆالەريي ريازانتسيەۆ، بەلارۋس سپورتشىسى كاماندار مادجيدوۆ، يران سپورتشىسى راسۋل حادەم بار.

ەسكە سالساق، بۇعان دەيىن ەلدەگى كۇرەس فەدەراتسيالارىنىڭ وكىلدەرى بۇل چەميپوناتتان قانشا وليمپيادا جولداماسىن الۋ جوسپارلانعانىن ايتقان بولاتىن.