كۇرەستەن الەم چەمپيوناتىنداعى العاشقى قارسىلاستارىمىز بەلگىلى بولدى

نۇر-سۇلتان. قازاقپارات - كۇرەس تۇرلەرىنەن ەلوردا تورىندە جالاۋى جەلبىرەيتىن الەم چەمپيوناتىندا گرەك-ريم كۇرەسىنەن سىنعا تۇسەتىن بالۋاندارىمىزدىڭ العاشقى قارسىلاستارى انىقتالدى، دەپ حابارلايدى قازاقپارات.

بۇگىن الەم چەمپيوناتى الدىندا گرەك- ريم كۇرەسىنىڭ جەرەبەسى تارتىلدى. جەرەبە تارتۋ قورىتىندىسىنا سايكەس، 55, 63, 72 جانە 82 كەلىگە دەيىنگى سالماق دارەجەسىندەگى بالۋانداردىڭ قارسىلاستارى بەلگىلى بولدى.

قازاقستاندىق قورلان جاحانشا (55 كەلى) ءبىرىنشى اينالىمدا الجيرلىك ابديلكاريم فەرگاتپەن كەزدەسەدى. ال كۇرەستى 1/8 فينالىنان باستايتىن المات كەبىسبايەۆ (63 كەلى) بولسا، ينديالىق ساگارا ساگارنيمەن بەلدەسەدى. دەمەۋ جادرايەۆتىڭ (72 ك گ) العاشقى قارسىلاسى - پالاۋ مەملەكەتىنىڭ سپورتشىسى دجارۆيۋس- سادام بلەسام تاركونگ. سونداي- اق ىرىكتەۋ كەزەڭىندە ماقسات ەرەجەپوۆ (82 كەلى) جاپونيالىق يۋا وكاجيمامەن كۇرەسەدى.

ەستەرىڭىزگە سالا كەتەيىك، 14 -قىركۇيەك كۇنى نۇر-سۇلتاندا كۇرەس تۇرلەرىنەن الەم چەمپيوناتى وتەتىنىن جازعان بولاتىنبىز. الەم چەمپيوناتىنا الەمنىڭ 100 دەن استام ەلىنەن ەڭ مىقتى اپاي ءتوس بالۋاندار قاتىسادى. ولار جۇلدەلى ورىندارمەن قاتار 2020 توكيو وليمپياداسىنىڭ جولداماسىن ساراپقا سالادى

اۆتور: كۇنسۇلتان وتارباي