الماتىدا دەنيس تەندى ەسكە الۋعا ارنالعان حالىقارالىق تۋرنير وتەدى

الماتى. قازاقپارات - 10-13- قازان كۇندەرى الماتىدا دەنيس تەن اتىنداعى مانەرلەپ سىرعاناۋدان حالىقارالىق تۋرنير وتەدى.

Denis Ten Memorial Challenge جارىسى «حالىق ارەنادا» بولادى، دەپ حابارلايدى قازاقپارات ق ر ۇلتتىق وليمپيادا كوميتەتىنە سىلتەمە جاساپ.

جارىسقا ISU بارلىق مۇشەسى قاتىسا الادى. مەدالدار ەكى جاس ساناتىندا ويناتىلادى – جاس وسپىرىمدەر جانە ەرەسەكتەر.

سايىس باعدارلاماسىندا جەكە جانە جۇپتاسىپ سىرعاناۋ، سپورتتىق بي بار. وعان قاتىسۋ ءۇشىن وتىنىشتەر 19 قىركۇيەككە دەيىن بەرىلۋى ءتيىس. تۋرنيردىڭ ءبىرىنشى كۇنىندە جاس وسپىرىمدەر، سونداي-اق ەرلەر اراسىنداعى جارىستاردا قىسقا باعدارلاما وتەدى.

Denis Ten Memorial Challenge سايىسى جۇپتار مەن مۇزدا ءبي بيلەۋ نومىرلەرىمەن اياقتالادى.