جامبىل وبلىسىندا تۇڭعىش پرەزيدەنت تۋرالى كورمە اشىلدى

تاراز. قازاقپارات -  جامبىل وبلىسىندا «ن. نازاربايەۆ: ءداۋىر، تۇلعا، قوعام» كوشپەلى كورمەسى اشىلدى، دەپ حابارلايدى قازاقپارات ءتىلشىسى.

وبلىستىق تاريحي-ولكەتانۋ مۋزەيىندە وتكەن اتالمىش كوشپەلى كورمەنىڭ اشىلۋىنا ق ر تۇڭعىش پرەزيدەنتى - ەلباسى كىتاپحاناسىنىڭ ديرەكتورى ءامىرحان راحىمجانوۆ، وبلىس اكىمى اسقار مىرزاحمەتوۆ جانە قالا تۇرعىندارى مەن ستۋدەنتتەر قاتىستى.

ءوز العى سوزىندە اسقار يسابەك ۇلى ءىس-شارانىڭ مازمۇنى مەن ماڭىزدىلىعى تۋرالى ايتىپ وتسە، ءامىرحان مۇراتبەك ۇلى تاۋەلسىزدىك جىلدارىنداعى تارازدىڭ دامۋىنداعى ەلباسى رولىنە توقتالدى.

تاۋەلسىز ەلىمىزدىڭ قالىپتاسۋ تاريحىنداعى تۇڭعىشپرەزيدەنتتىڭ ءرولىن جۇيەلى باياندايتىن كورمەدە قوناقتار ەلباسىنىڭ ارحيۆ، كىتاپحانا، مۋزەي قورلارىنان الىنعان بىرەگەي ماتەريالدارمەن تانىستى.

سونداي-اق، نۇرسۇلتان نازاربايەۆتىڭ جوعارعى مەملەكەتتىك ماراپاتتار كولەكتسياسىمەن، مەملەكەت باسشىلارى مەن بەدەلدى جازۋشىلاردىڭ قولتاڭباسى بار تارتۋلىق باسىلىمدار مەن ەلباسىنىڭ كوپ تىلدە جارىق كورگەن ەڭبەكتەرىن تاماشالادى.

كورمە ءتورت بولىمنەن تۇرادى. العاشقى «ەلباسى جولى» بولىمىندە تۇڭعىش پرەزيدەنت ن. ءا. نازاربايەۆتىڭ ءومىر كەزەڭدەرىنەن سىر شەرتەتىن جادىگەرلەر ورناتىلعان.

وندا ەلباسى جولى رۋحاني جاڭعىرۋعا تۇرتكى بولعان تاريحي وقيعالاردى سيپاتتاۋ ارقىلى كورسەتىلەدى. ال، «ەلباسى فەنومەنى» بولىمىندە ەل تىزگىنىڭ ۇستاپ، جاھاندىق كەڭىستىككە تۇراقتىلىق پەن ءقاۋىپسىزدىڭتىڭ جاڭا يدەيالارىن تاراتقان ن. ءا. نازاربايەۆتىڭ مەملەكەت قۇرۋداعى باستى تۇجىرىمداماسىن باياندالادى.

ونداعى سەمەي يادرولىق پوليگونىنىڭ جابىلۋىنان باستاپ، مەملەكەت استاناسىنىڭ كوشىرىلۋىنە دەيىن تاريح پاراعىنا وشپەستەي بولىپ جازىلعان ماڭىزدى وقيعالار، باتىل شەشىمدەر مەن باستامالارى ارقىلى ەلباسى فەنومەنى ايقىن كورىنىس تابادى.

سول سياقتى، «الەم تانىعان ەلباسى» بولىمىندە ەلىمىزدىڭ سىرتقى ساياساتى، تۇڭعىش پرەزيدەنتتىڭ بيىك بەدەلى مەن اسقاق ابىرويى بەينەلەيتىن دۇنيەلەر قويىلسا، «ەلباسى مارتەبەسى -  ەل مارتەبەسى» بولىمىندە كوپشىلىك نازارىنا ەلباسى مەن قازاقستان حالقىنا جاھاندىق دامۋ مەن تۇراقتىلىققا قوسقان ۇلەسى ءۇشىن تابىس ەتىلگەن جوعارى مەملەكەتتىك ماراپاتتار ۇسىنىلعان.

ايتا كەتەيىك، 2017-جىلعى قاراشادان باستاۋ العان «ن. نازاربايەۆ: ءداۋىر، تۇلعا، قوعام» كورمە جوباسىن الماتى، شىمكەنت قالالارى مەن الماتى، تۇركىستان، اتىراۋ، اقتوبە،  قىزىلوردا وبلىستارىنىڭ 900 مىڭعا جۋىق تۇرعىن تاماشالاپ ۇلگەردى. ءىرى عىلىمي-ءبىلىم بەرۋ، مادەني-اعارتۋشىلىق ءىس-شارالاردان قۇرالعان جوبا شالعاي اۋدانداردى دا قامتۋدى ماقسات تۇتقان.

سوعان وراي بۇعان دەيىن جوبانىڭ وڭىرىمىزدەگى شۋ جانە قورداي اۋداندارىندا ەكسكۋرسيالارى ۇيىمداستىرىلعان- دى. قر تۇڭعىش پرەزيدەنتى-ەلباسى كىتاپحاناسىنىڭ وزگە دە شارالارى وڭىرىمىزدە جالعاسۋدا. تاراز تۇرعىندارى مەن قوناقتارى «ن. نازاربايەۆ: ءداۋىر، تۇلعا، قوعام» كورمەسىن قازان ايىنىڭ سوڭىنا دەيىن تاماشالاي الادى.