پرەزيدەنت ۇلتتىق كەڭەستىڭ جۇمىسشى توپتارى قانداي ماسەلەلەردى تالقىلاۋى كەرەكتىگىن ايتتى
«ۇلتتىق كەڭەستىڭ جۇمىسى ناقتى ءارى ناتيجەلى بولۋى ءۇشىن كەلىسىم بويىنشا ءۇش جۇمىس توبى قۇرىلدى. بۇل توپتار الەۋمەتتىك، ەكونوميكالىق جانە ساياسي باعىتتار بويىنشا جۇمىس جۇرگىزەدى. وسىعان سايكەس اتالعان توپتار ناقتى ۇسىنىستارىن ازىرلەپ، كەڭەستىڭ قاراۋىنا ەنگىزۋى قاجەت»، - دەدى مەملەكەت باسشىسى.
وسى رەتتە قازاقستان پرەزيدەنتى ەكونوميكالىق باعىتتىڭ جۇمىسشى توبى قازاقستان حالقىنا جولداۋىندا كوتەرىلگەن ميكرو جانە شاعىن بيزنەستىڭ نەگىزگى قىزمەتىن تابىس سالىعىنان بوساتۋ، پايدالانىلماي جاتقان اۋىل شارۋاشىلىعى ماقساتىنداعى جەرلەردى قايتارۋ، مەملەكەتتىك ساتىپ الۋ جۇيەسىن وزگەرتۋ، «اۋىل - ەل بەسىگى» باعدارلاماسىن جۇزەگە اسىرۋ، ارمياداعى قارجىلىق ءتارتىپتى كۇشەيتۋ، جۇمىس ىستەپ جۇرگەن ازاماتتارعا زەينەتاقى جيناقتارىنىڭ ءبىر بولىگىن ءبىلىم الۋعا نەمەسە باسپانا ساتىپ الۋعا بەرۋ ماسەلەلەرىن ەگجەي-تەگجەيلى تالقىلاۋى تيىستىگىن اتاپ ءوتتى.
«ساياسي باعىتتاعى جۇمىس توبى كۇنتارتىبىن باستاپقىدا ىلكى رەجىمدە جەرگىلىكتى بيلىك قىزمەتىنىڭ تيىمدىلىگىن حالىقتىڭ باعالاۋى جۇيەسىن ەنگىزۋ، 4 جىلدىڭ ىشىندە مەملەكەتتىك قىزمەتشىلەر مەن ۇلتتى كومپانيالاردىڭ قىزمەتكەرلەرىن 25 پايىزعا قىسقارتۋ، شەرۋ وتكىزۋ ءتارتىبىن جەڭىلدەتۋ، ىشكى ىستەر مينيسترلىگىن رەفورمالاۋ، ورتالىق جانە جەرگىلىكتى دەڭگەيدە نورماتيۆتىك- قۇقىقتىق اكتىلەرگە جەمقورلىققا قارسى ساراپتامانى قالپىنا كەلتىرۋ سىندى باستامالارمەن تولىقتىرۋى قاجەت»، - دەدى مەملەكەت باسشىسى.
قاسىم-جومارت توقايەۆ الەۋمەتتىك دامۋ باعىتىنداعى جۇمىسشى توبى اۋىر قىلمىستارعا جازانى كۇشەيتۋ، از قامتىلعان وتباسىلاردى باسپانامەن قامتاماسىز ەتۋ سىندى ماسەلەلەردى قاپەرگە الۋى قاجەتتىگىن ايتتى.
اۆتور: مارلان جيەمباي
