بيىل باسپانا كەزەگىندەگى ادامداردىڭ ءبىرىڭعاي رەسپۋبليكالىق بازاسى قوسىلادى
بۇل تۋرالى ق ر پرەمەر-ءمينيسترىنىڭ ورىنباسارى جەڭىس قاسىمبەك ايتتى، دەپ حابارلايدى قازاقپارات ءتىلشىسى.
«قازىرگى تاڭدا باسپانا الۋ ءۇشىن اكىمدىكتەردە 512 مىڭعا جۋىق ادام كەزەكتە تۇر. كەزەكتى ءبىرىڭعاي ەسەپكە الۋ تاپسىرماسى اياسىندا جىلدىڭ سوڭىنا دەيىن كەزەكتە تۇرعان ادامداردىڭ ءبىرىڭعاي رەسپۋبليكالىق بازاسىن قوسامىز»، - دەدى ول بۇگىن مەملەكەت باسشىسىنىڭ قازاقستان حالقىنا جولداۋىن تالقىلاۋعا ارنالعان ۇكىمەت وتىرىسىندا.
وسى ورايدا ۆيتسە-پرەمەر «نۇرلى جەر» باعدارلاماسىن ىسكە اسىرۋ اياسىندا تۇرعىن ءۇي قانداي تارتىپپەن بەرىلەتىندىگىن ايتتى.
«بىرىنشىدەن كوپبالالى وتباسىلارعا اقىسىز نەگىزدە جالدامالى تۇرعىن ءۇي بەرىلەتىن بولادى. بۇل ءۇشىن 2025 -جىلعا دەيىن 350 ميلليارد تەڭگە بولىنەدى. مەملەكەت باسشىسىنىڭ تاپسىرماسىنا سايكەس ۇكىمەت ءۇش جىلدىڭ ىشىندە 30 مىڭ پاتەر ءبولۋ بويىنشا شارالار قابىلدايتىن بولادى. ەكىنشىدەن، جىل سايىن 3700 كەزەكتە تۇرعان الەۋمەتتىك جاعىنان وسال ازاماتتارعا ساتىپ الۋسىز جالعا بەرىلەتىن تۇرعىن ۇيمەن قامتاماسىز ەتۋگە 32,8 ميلليارد تەڭگە بولىنەدى. ۇشىنشىدەن، «باقىتتى وتباسى» باعدارلاماسى بويىنشا كوپبالالى وتباسىلارعا، تولىق ەمەس جانە مۇگەدەك بالالارى بار وتباسىلارعا نەسيە بەرۋگە 3 جىل ىشىندە «تۇرعىن ءۇي قۇرىلىس جيناق بانكى» ارقىلى 50 ميلليارد تەڭگەدەن بولىنەتىن بولادى»، - دەدى جەڭىس قاسىمبەك.
سونىمەن قاتار ول مەملەكەت باسشىسىنىڭ تاپسىرماسىنا سايكەس ۇكىمەت جىل سايىن 10 مىڭ پاتەر ءبولۋ بويىنشا شارالار قابىلدايتىندىعىن اتاپ ءوتتى.
اۆتور: مارلان جيەمباي
