قىتايدىڭ ەسكى زاۋىتتارى قازاقستانعا اكەلىنەدى دەگەن اقپارات راس پا
سىرتقى ىستەر ءمينيسترىنىڭ ورىنباسارى ەرمەك كوشەربايەۆ وسىلاي دەپ مالىمدەدى، دەپ حابارلايدى قازاقپارات ءتىلشىسى.
«قىتاي بىزدە ينۆەستورلاردىڭ تىزىمىندە ءبىرىنشى مەملەكەت ەمەس. وزدەرىڭىز بىلەتىندەي، ەڭ ءبىرىنشى ورىنداردا نيدەرلاندى (ەگەمەندىك العالى بەرى 87 ميلليارد دوللار ينۆەستيسيا تارتىلعان) تۇر. ەكىنشى ورىندا ا ق ش (37 ميلليارد دوللار)، ودان كەيىن شۆەيتساريا (23 ميلليارد دوللار)، قىتاي (17 ميلليارد دوللار)، فرانسيا (15 ميلليارد) ورنالاسقان. قازاقستان مەن قىتاي ۇكىمەتتەرى اراسىندا بىرلەسكەن كوميسسيا بار. سول كوميسسيا بويىنشا ىنتىماقتاستىق جونىندە بىرىككەن باعدارلامانى قۇرعانبىز. وسىنداي باعدارلامانى باسقا ەلدەرمەن دە دايىندادىق. بۇكىل الەمدە ساۋدا سوعىسى ءجۇرىپ، سانكسيالار كوبەيىپ كەتتى. مۇنداي جاعدايدا ينۆەستورلار تىنىشتىق ىزدەيدى. ولار ارينە، قاۋىپتى جەرگە بارىپ اقشاسىن سالمايدى. ءتيىستى جاعداي ۇيىمداستىراتىن ەلدەرگە بارىپ ينۆەستيتسيالارىن سالادى. ءبىزدىڭ الدىمىزداعى ماقسات - قازاقستاندا وسىنداي جاعداي جاساپ، ينۆەستيسيا تارتۋ جۇمىسىن ارى قاراي جالعاستىرۋ»، - دەدى ەرمەك كوشەربايەۆ و ك ق-دا وتكەن باسپا ءسوز ءماسليحاتىندا.
سونىمەن بىرگە سىرتقى ىستەر ۆيتسە-ءمينيسترى «قىتاي ەلىنەن 55 ەسكى زاۋىت قازاقستانعا كوشىرىلەدى- مىس» دەگەن الەۋمەتتىك جەلىلەردە تاراعان اڭگىمەگە قاتىستى جاۋاپ بەردى.
«55 زاۋىت دەگەن باعدارلاما دا جوق. كەزىندە ەستىگەنىم: بلوگەرلار نەمەسە ۆاتساپتاعى روليكتەردە 55 ەسكى زاۋىت دەگەن اڭگىمە بار ەكەن. رەسمي تۇردە ايتارىمىز - ونداي باعدارلاما جوق، ەسكى زاۋىتتاردى ەشكىم اكەلمەيدى. بارلىق جوبالاردى ءوزىمىز تاڭداپ، ءتيىستى مەملەكەتتىك ساراپتامادان وتكىزەمىز. ول جوبالاردى جەكەمەنشىك كاسىپكەرلەر اتقارادى. ەسكى زاتتاردى ەشكىم المايدى. ءبىزدىڭ ەلگە اكەلمەيدى. ەگەر ونداي وي بولسا، ءبىزدىڭ كوميسسيا ارينە، وعان تىيىم سالادى. تىزىمدەگى 55 جوبا دەگەن - ول زاۋىتتارعا جاتپايدى. جىلىنا ەكى رەت قىتايلارمەن كوميسسيا وتىرىسىن وتكىزەمىز. ءار جوبانىڭ ءتيىستى جاعدايى، قانداي قيىندىقتارى بار - تالقىلايمىز. ەسكى زاۋىتتار جوق»، - دەدى ەرمەك كوشەربايەۆ.
اۆتور: ايان بەكەن ۇلى
