توقايەۆ: بيزنەسكە كەدەرگى كەلتىرۋ - مەملەكەتكە قارسى قىلمىسپەن تەڭ

نۇر-سۇلتان. قازاقپارات - بيزنەستىڭ دامۋىنا كەدەرگى كەلتىرۋ - مەملەكەتكە قارسى قىلمىس جاساۋمەن بىردەي. بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ءمالىم ەتتى، دەپ حابارلايدى قازاقپارات ءتىلشىسى.

«شاعىن جانە ورتا بيزنەسكە قاتىستى رەيدەرلىك جيىلەپ كەتتى. مەنىڭ بۇل ماسەلە بويىنشا ۇستانىمىم ايقىن. بيزنەستىڭ دامۋىنا، اسىرەسە شاعىن جانە ورتا بيزنەستىڭ دامۋىنا كەدەرگى كەلتىرۋگە باعىتتالعان كەز كەلگەن ارەكەت مەملەكەتكە قارسى قىلمىس رەتىندە قارالۋى كەرەك. وسىعان بايلانىستى زاڭنامالىق تۇرعىدا قوسىمشا شارالار قابىلداۋ كەرەك. پارلامەنت پەن ۇكىمەت بۇل ماسەلەنى شەشۋدىڭ جولىن ۇسىنۋى قاجەت. سونىمەن بىرگە، كولەڭكەلى ەكونوميكاعا قارسى ءىس-ارەكەتتى كۇشەيتىپ، كاپيتالدى سىرتقا شىعارۋعا جانە سالىق تولەۋدەن جالتارۋعا قارسى كۇرەستى قاتاڭداتۋ كەرەك»، - دەدى پرەزيدەنت.

سونىمەن بىرگە ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا بيزنەسكە بولىنەتىن قاراجاتتىڭ ءتيىمدى جۇمسالۋىن قاتاڭ باقىلاۋدى تاپسىردى.

«ءتيىمدى شاعىن جانە ورتا بيزنەس - قالا مەن اۋىلدى دامىتۋدىڭ بەرىك نەگىزى. شاعىن، اسىرەسە ميكروبيزنەس ەلىمىزدىڭ الەۋمەتتىك - ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرىپ، جۇمىسسىزدىقتى ازايتادى. سونداي-اق، جاپپاي كاسپىكەرلىكتى دامىتۋ - ساناعا سىڭگەن پاتروناليستىك پيعىل مەن ماسىلدىقتان ارىلۋعا مۇمكىندىك بەرەدى. سوندىقتان، مەملەكەت الداعى ۋاقىتتا دا بيزنەسكە قولداۋ كورسەتەدى. ۇلتتىق قوردان 100 ميلليارد تەڭگەگە جۋىق قارجى ءبولىندى. ءبىراق، ساراپشىلاردىڭ پىكىرىنشە، قارجىلاي قولداۋدىڭ يگىلىگىن جەرگىلىكتى بيلىكپەن بايلانىسى بار شارۋاشىلىقتار عانا كورىپ وتىر. شىن مانىندە جاڭا جوبالار بويىنشا كومپانيالار قۇرىلىپ، جۇمىس ورىندارى اشىلۋى كەرەك ەدى. ءبىراق، جەرگىلىكتى اكىمدەر ۇيىمداستىرۋ جۇمىستارىن تالاپقا ساي ورىنداماعان. سونىڭ سالدارىنان سالىق جانە زەينەتاقى تولەمدەرىن ارتتىرىپ، جەرگىلىكتى بيۋدجەتتى نىعايتۋعا جاعداي جاسالىپ وتىرعان جوق»، - دەدى مەملەكەت باسشىسى قازاقستان حالقىنا جولداۋىندا.

 وسىعان وراي، پرەزيدەنت ەسەپ كوميتەتىنە جانە قارجى مينيسترلىگىنە قاراجاتتىڭ جۇمسالۋىن قاتاڭ باقىلاۋعا الۋدى تاپسىردى.

«بىزدە شاعىن كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ميكرو جانە شاعىن بيزنەس كومپانيالارىن تابىسقا سالىناتىن سالىقتان ءۇش جىلعا بوساتۋ تۋرالى ۇكىمەتكە زاڭدى نەگىز قۇرۋدى تاپسىرامىن»، - دەدى ول.

سونداي-اق، «ەڭبەك ونىمدىلىگىنىڭ ناقتى ءوسىمىن كەمىندە 1,7 ەسەگە ارتىرۋىمىز كەرەك»، - دەپ اتاپ ءوتتى توقايەۆ.

«شيكىزاتقا بايلانعان مەنتاليتتەن باس تارتىپ، ەكونوميكانى ءارتاراپتاندىرۋ، ءبىلىم ەكونوميكاسى، ەڭبەك ونىمدىلىگىن ارتتىرۋ، يننوۆاتسيانى دامىتۋ، جاساندى ينتەللەكتى جاھاندىق دامۋدىڭ نەگىزگى فاكتورىنا اينالدى. يندۋستريالاندىرۋدىڭ ءۇشىنشى بەسجىلدىعىن جۇرگىزۋ بارىسىندا بۇرىن جىبەرىلگەن قاتەلىكتەر مەن ولقىلىقتاردى ەسكەرۋىمىز كەرەك. بۇل ماسەلەلەر بويىنشا مەنىڭ بارلىق تاپسىرمالارىمدى، ەسكەرتپەلەردى ۇكىمەت تولىق ورىنداۋعا مىندەتتى»، - دەدى مەملەكەت باسشىسى.

قازاقستان پرەزيدەنتى ەڭبەك ونىمدىلىگىنىڭ ناقتى ءوسىمىن كەمىندە 1,7 ەسەگە ارتىرۋىمىز كەرەكتىگىن باسا ايتتى.

«ەلىمىزدى وڭىردەگى كوشباسشى رەتىندە تانىتىپ، ورتالىق ازياداعى بەدەلدىمىزدى ارتتىرۋ ستراتەگيالىق مىندەت. بۇل ەلباسى ايقىنداعان ساياسي باعىت-باعدارىمىز»، - دەدى ق. توقايەۆ.