قازاقى ويۋ-ورنەكپەن بەزەندىرىلگەن الىپ كيىز ءۇي جاسالدى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەت ەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

الەمدەگى ەڭ ۇلكەن قازاق كيىز ءۇيى قۇلجا قالاسىندا بوي كوتەردى - قىتايدىڭ «ورتالىق حالىق راديوسى» (CNR) 

قۇلجا قالاسىنداعى «ورتالىق ازيا قاقپاسى» اتالاتىن ەتنوپاركتىڭ ورتالىق الاڭىنا قازاقى ويۋ-ورنەكپەن بەزەندىرىلگەن الىپ كيىز ءۇي تىگىلدى، دەپ جازادى قىتايلىق kazakcnr.com سايتى.

اتالعان اقپارات كوزىنىڭ مالىمەتىنشە، ق ح ر- دىڭ ىلە قازاق اۆتونوميالى وبلىسىنىڭ ورتالىعى قۇلجا قالاسىندا بوي كوتەرگەن الىپ كيىز ءۇي ءوزىنىڭ كولەمىمەن قاتار، قازاقتىڭ قول ونەر مادەنيەتىن ايگىلەيتىن جاساۋ- جابدىقتارىمەن دە جۇرتتى تامساندىرۋدا.

كورگەن ادامنىڭ كوزىن اربايتىن ەرەكشە كيىز ءۇي «ىلە جىبەك جولى شۇعىلاسى» ج ش س- نىڭ قارجىلاندىرۋىمەن جاسالعان. ال ونداعى ۇلتتىق قولونەر جابدىقتارىن «ىلە تاسبۇلاق ۇلتتىق كيىمدەر» كاسىپورنى دايىنداعان. 

«قازاق حالقى حان، سۇلتاندارعا ارنالعان ات ۇستىنەن شاڭىراق كوتەرىپ، ۋىق شانشىپ تىگەتىن، 30 قاناتتى كيىز ءۇيدى «التىن وردا» دەپ اتايدى.

ال قۇلجا قالاسىنداعى ەتنوپاركتىڭ ورتالىق الاڭىنا تىگىلگەن كيىز ءۇي - بيىكتىگى 10,2 مەتر، ىشكى راديۋسى 20 مەتر، اۋماعى 350 شارشى مەتر بولاتىن -  ءزاۋلىم وردا. الىپ كيىز ءۇيدىڭ قاڭقاسى بولات شىبىقتان تۇرعىزىلعاننان كەيىن، ءۇيدىڭ سىرتقى تۋىرلىق، ۇزىك، تۇڭىلىگىنە دەيىن قولمەن باسىلعان كيىزبەن جابىلعان.

سونىمەن بىرگە ءۇيدىڭ ىشكى باۋلارى، باسقۇرى، وراۋلى ءشيى سياقتى بارلىق جابدىقتارى تۇگەل قولونەر بۇيىمدارىمەن تولىعىپ قازاقتىڭ ناعىز ءداستۇرلى كيىز ءۇي مادەنيەتىنىڭ مۋزەيىن قالىپتاستىرعان. بۇل ەرەكشە مادەني نىسان اشىلعاننان كەيىنگى از ۋاقىتتاردىڭ ىشىندە داڭقى الىسقا تاراپ، ىلە جەرىنە اياق باسقان تۋريستەردىڭ اسىعىپ جەتەتىن، قىزىعا تاماشالايتىن ورنىنا اينالعان»، - دەپ جازادى CNR.

قازاقستاندا ازيا قالامگەرلەرىنىڭ فورۋمى وتەدى - «فارس» اقپارات اگەنتتىگى

قازاقستاننىڭ جازۋشىلار وداعى ق ر پرەزيدەنتى اكىمشىلىگى مەن مادەنيەت جانە سپورت مينيسترلىگىنىڭ قولداۋىمەن 2019 -جىلدىڭ 4-6 -قىركۇيەك ارالىعىندا نۇر- سۇلتان قالاسىندا ازيا قالامگەرلەرىنىڭ I فورۋمىن وتكىزەدى، دەپ حابارلايدى parstoday اقپارات اگەنتتىگى.

«بۇل فورۋمدى وتكىزۋدەگى ماقسات ازيا ەلدەرى اراسىندا ادەبي- مادەني قارىم- قاتىناستى نىعايتۋ، قازاقستانىڭ ادەبيەتى مەن رۋحاني قۇندىلىقتارىن پاش ەتۋ، ادەبي ۇدەرىستى دامىتۋ ءۇشىن ازيا ەلدەرىمەن تاجىريبە الماسۋ بولىپ تابىلادى. فورۋمعا ازياداعى 44 ەلدىڭ حالىقارالىق جانە وتاندىق سىيلىقتارعا يە 100 دەن اسا اقىن- جازۋشىسى، جازۋشىلار وداقتارى مەن قاۋىمداستىقتاردىڭ ءتوراعالارى قاتىسادى» ، - دەپ جازادى parstoday.

سەمەيدەگى العاشقى اتومدىق سىناق جارىلىسىنا 70 جىل بولدى - TRT

قازاقستاننىڭ شىعىسى سەمەي وبلىسىندا جاسالعان العاشقى اتومدىق سىناق جارىلىسىنا 70 جىل بولدى، دەپ جازادى تۇركيا راديو تەلەۆيزيا پورتالى.

«كەڭەس وداعىنىڭ اتومدىق سىناق الاڭى بولعان سەمەي پوليگونىندا العاشقى اتومدىق بومبا 1949 -جىلى 29 -تامىز كۇنى جارىلعان. 40 جىلدا سەمەي ايماعىندا 456 اتومدىق جارىلىس جاسالدى. ولاردىڭ كۇشى حيروسيماعا اتىلعان بومبادان 2500 ەسە قۋاتتى. سەمەي پوليگونى 42 جىلدان سوڭ، 1991 -جىلى 29 -تامىزدا جابىلدى. بۇل شەشىم كەڭەس وداعى ءالى ىدىراماعان كەزدە قازاقستان كوشباسشىسى نۇرسۇلتان نازاربايەۆتىڭ تالپىنىسىممەن جاسالدى. ايماقتا اتومدىق سىناقتاردان تۋىنداعان رادياتسيانىڭ زيانى ءالى دە بايقالۋدا»، - دەپ جازادى TRT.

دونالد ترامپتىڭ ۇلى موڭعولياداعى دەمالىسىنان العان اسەرىمەن ءبولىستى - kaznews.mn

ا ق ش پرەزيدەنتىنىڭ ۇلى كىشى دونالد ترامپ جۋنيور /جر/ موڭعوليانىڭ باتىسىندا ورنالاسقان بايان- ولگەي ايماعىنا ساياحاتتاپ، 25 -تامىزدا ەلىنە قايتتى، دەپ جازادى موڭعوليانىڭ KAZNEWS اقپاراتتىق پورتالى.

اتالعان ب ا ق-تىڭ جازۋىنشا، ترامپ جۋنيور موڭعولياعا كەلگەن بەتتە بايان-ولگەي ايماعىنا ۇشىپ، بەسبوعدا تاۋىنداعى حۇيتەن شىڭىن باعىندىرىپ، ۇلىمەن بىرگە اسەم تابيعاتتا بالىق اۋلاپ، ات ءمىنىپ، كوشپەندىلەردىڭ سالت- ءداستۇرىن تاماشالاعان. 

كەيىن موڭعولياداعى دەمالىسىنان العان اسەرىمەن Instagram-داعى ءوز پاراقشاسىندا بولىسكەن.

«جىگىتتەر، ۇلىم دوننيمەن بىرگە كيىز ۇيدە وتكەن ءومىردى دە كوردىك. وتكەن اپتادا موڭعوليانى زەرتتەۋگە شىققان ەدىك. ۇزاق شاقىرىمداردى اتپەن، كەيىن 4WD- مەن باسىپ وتتىك. جۋىق ارادا ءالى دە فوتولاردى سالامىن. شىنىندا دا، بۇل - مەن كورگەن ەڭ كوركەم جەرلەردىڭ ءبىرى. ادامداردان جىلىلىق پەن مەيىرىمدىلىك ەسىپ تۇر. وسىناۋ كەرەمەت تاجىريبەدەن كەيىن الەۋمەتتىك جەلىگە قايتىپ كەلگەن ءبىرتۇرلى ەكەن»، - دەدى دونالد ترامپ جۋنيور.

Montsame سايتىنىڭ حابارلاۋىنشا، ۇلانباتىرداعى ا ق ش ەلشىلىگى بۇل، مەملەكەتتىك ماڭىزداعى ساپار بولماعاندىقتان، قوسىمشا اقپاراتتان بەيحابار ەكەنىن مالىمدەگەن. ال موڭعوليا پرەزيدەنتى حالتماگيين باتتۋلگا دونالد ترامپتىڭ 13 جاستاعى ۇلى بەررون ترامپقا تۇلپار سىيلاعانى تۋرالى دا شەتەلدىك ب ا ق كوزدەرى جارىسا جازدى.

قىتايلىق قانداسىمىز تاماق ىشپەي 5 مىڭ شاقىرىم جاياۋ ءجۇردى - قىتايدىڭ «ورتالىق حالىق راديوسى» (CNR)

شىڭجاڭنىڭ تارباعاتاي ايماعىنان 5 مىڭ شاقىرىم شالعايدا جاتقان شاڭحاي قالاسىنا جاياۋ اتتانعان سەرىك زەينەل ۇلى سوڭعى مارەگە جەڭىسپەن جەتتى، دەپ جازادى قىتايلىق kazakcnr.com سايتى.

اتالعان اقپارات كوزىنىڭ دەرەگىنشە، سەرىك زەينەل ۇلى تارباعاتايدان شانحايعا دەيىنگى 5 مىڭ شاقىرىم ارالىقتى تاماق ىشپەي، تەك سۋمەن عانا ءنار الىپ ءجۇرىپ وتكەن. مارافونشىنىڭ تاماق ىشپەگەنىن دالەلدەۋ ءۇشىن بويىنا ارنايى اپپارات تاعىلىپ، كامەرا ورناتىلعان. دەنساۋلىعىن قاداعالاپ وتىرۋ ءۇشىن ءىنىسى ارنايى كوماندا جاساقتاعان.

«ول العاشقى 29 كۇندە 1019 كيلومەتر جول ءجۇرىپ، الەمدىك رەكوردتاردى سەرتيفيكاتسيالاۋ اگەنتتىگىنىڭ (World Record Certification Agency) «تاماق ىشپەي ەڭ ۇزاق جاياۋ جۇرگەن سپورتشى» دەگەن سەرتيفيكاتىن ەنشىلەدى (Farthest distance walked while fasting). مۇنىمەن توقتاماعان سەرىك زەينەل ۇلى تاماق ىشپەستەن تاعى 4 مىڭعا جۋىق شاقىرىمدى ارتقا تاستاپ، شانحاي قالاسىنا جەتەدى. س. زەينەل ۇلى جاس كەزىندە سپورتپەن اينالىسقان. قازىر جەكە كاسىپكەر»، - دەپ جازادى CNR.

قايسارلىعىمەن الەمدىك رەكوردتى جاڭارتقان قانداسىمىز ب ا ق-قا بەرگەن سۇحباتىندا، قاتاڭ تالاپ قويىپ، ءوزىن جەڭە بىلگەن ادامنىڭ المايتىن بيىگى جوق ەكەنىن ايتادى. «مەنى قولداپ قۋاتتاعان بارلىقتارىڭىزعا كوپ راحمەت! قازىر مەنىڭ دەنساۋلىعىم ەرەكشە جاقسى. العاش ساپارعا اتتاناردا جەرگىلىكتى مەملەكەتتىك ورگاندارعا جوسپارىمىزدى ايتتىق. الايدا، ولار تاماق ىشپەي بۇلاي ۇزاق ءجۇرۋ ادام ومىرىنە ەرەكشە قاۋىپتى ەكەنىن ايتىپ، ءبىزدى قولداماعان ەدى. ايتسە دە، ءبىز ءوز كوماندامىزدى جاساقتاپ، جولعا اتتانىپ كەتتىك. باستى ماقساتىم - ادام بالاسىنىڭ ەرەكشە مۇمكىندىگىن دالەلدەۋ، قاتاڭ تالاپ قويىپ، ءوزىن جەڭە بىلگەن ادامنىڭ المايتىن بيىگى جوق ەكەنىن بۇكىل الەمگە پاش ەتۋ»، - دەيدى سپورتشى.

يۋنەسكو-نىڭ باس ديرەكتورى بۇحاراعا باردى - «ءوزا» اقپاراتتىق اگەنتتىگى

وزبەكستان تاۋەلسىزدىگىنىڭ 28 -جىلدىعىنا وراي ون ەكىنشى مارتە ءوتىپ جاتقان سامارقانداعى «شىعىس اۋەندەرى» مۋزىكالىق فەستيۆالىنە ارنايى كەلگەن يۋنەسكو-نىڭ باس ديرەكتورى ودرە ازۋلە حانىم، وسى ساپارى اياسىندا جانە ءبىر تاريحي قالا بۇحاراعا باردى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى. اتالعان ب ا ق-تىڭ جازۋىنشا، بۇحارا قالاسىندا يۋنەسكو-نىڭ بۇكىلالەمدىك مادەني مۇرالار تىزىمىنە ەنگەن جالپىعا ورتاق قۇندىلىقتاعى ءتۇرلى داۋىرگە ءتيىستى 300 دەن استام ساۋلەت ەسكەرتكىشى بار.

اتاپ وتىلگەندەي، بۇحارا ەجەلدەن ءدىني تولەرانتتىلىق قالىپتاسقان ورتا بولىپ ۇلىقتالىپ كەلەدى. ب ۇ ۇ- نىڭ ءبىلىم، عىلىم جانە مادەنيەت ماسەلەسى بويىنشا ۇيىم باسشىسى (يۋنەسكو باس ديرەكتورى) ودرە ازۋلە حانىم بۇحاراداعى كونە ارك قالاسىنا جاساعان ساپارى اياسىندا يسمويل سوماني كەسەنەسى، ميرنوراي كالون، مير اراب مەدرەسەسى مەن ماسجيدي كالون جادىگەرلەرىن ءوز ىشىنە العان پوي كالون كەشەنى مەن مىرزا  ۇلىقبەك مەدرەسەسىن ارالاپ، مۇنداعى قولونەرشىلەردىڭ جاساعان تۋىندىلارىمەن كەڭىنەن تانىستى.

 

اۆتور: باقىتجول كاكەش