ەلىمىزدە مەديتسينالىق ءبىلىمى جوق ادامدارعا ارنالعان العاشقى كومەكتىڭ ستاندارتى بەكىتىلدى

نۇر- سۇلتان. قازاقپارات - قازاقستاندا تۇڭعىش رەت مەديتسينالىق ءبىلىمى جوق ادامدارعا ارنالعان العاشقى كومەكتىڭ ستاندارتى بەكىتىلدى، دەپ حابارلايدى قازاقپارات ق ر  د س م سايتىنا سىلتەمە جاساپ.

وسىنداي بۇيرىققا ق ر دەنساۋلىق ساقتاۋ ءمينيسترى 2019 -جىلدىڭ 26 - تامىزىندا قول قويدى جانە ول العاش رەسمي جاريالانعاننان كەيىن كۇنتىزبەلىك ون كۇن وتكەن سوڭ كۇشىنە ەنەدى.

 «قيىن جاعدايعا تاپ بولعان ادامعا العاشقى كومەك ۋاقىتىلى جانە دۇرىس كورسەتىلسە، ناۋقاستى جاراقاتتان امان ساقتاپ، ءتىپتى ءومىرىن قۇتقارىپ قالۋعا بولادى. سوندىقتان، دارىگەرلەر عانا ەمەس، مەديتسينالىق ءبىلىمى جوق ازاماتتاردىڭ دا العاشقى كومەك كورسەتۋ داعدىسىن يگەرۋى ماڭىزدى.

وسىعان بايلانىستى حالىقتى شۇعىل جاعدايدا العاشقى كومەك كورسەتۋگە دايىنداۋ ءۇشىن «ق ر- دا العاشقى كومەكتى ۇيىمداستىرۋ ستاندارتىن بەكىتۋ تۋرالى» ق ر دەنساۋلىق ساقتاۋ ءمينيسترىنىڭ 2019 -جىلعى 26 - تامىزداعى № 114 بۇيرىعى (بۇدان ءارى - ستاندارت) بەكىتىلدى»، دەلىنگەن حابارلامادا.

العاشقى مەديتسينالىق كومەك - شۇعىل جاعدايدا ادام ءومىرىن قۇتقارىپ قالۋعا جانە اسقىنۋدىڭ الدىن الۋ ماقساتىندا وقىس وقيعا بولعان جەردە كورسەتىلەتىن جەدەل ءىس- شارالار كەشەنى. ارنايى ءبىلىمى بار كەز كەلگەن ادام العاشقى كومەك كورسەتە الادى. الايدا اعاشقى كومەك دۇرىس كورسەتىلمەسە، ناۋقاسقا زيان كەلتىرۋى مۇمكىن.

بەكىتىلگەن ستاندارت مەديتسينالىق ءبىلىمى جوق ادامدارعا العاشقى كومەكتىڭ ءتارتىبى مەن بازالىق ءىس- شارالارىن رەگلامەنتتەيدى. العاشقى كومەكتى زارداپ شەگۋشىنىڭ ءوزى دە، جاقىن جەردەگى باسقا ادام دا كورسەتە الادى. ستاندارت ومىرگە قاۋىپ توندىرەتىن جانە ءجيى كەزدەسەتىن جازاتايىم جاعدايدا العاشقى كومەك كورسەتۋ الگوريتمدەرىن قامتيدى. ستاندارت ۇزدىك تاجىريبەگە نەگىزدەلگەن جانە حالىقارالىق وقىتۋ باعدارلامالارىنا سايكەس ازىرلەنگەن.

 «تاجىريبە كورسەتىپ وتىرعانداي، دايىندىقتان وتكەن ادام وقىس وقيعا كەزىندە ساۋاتتى ارەكەت ەتەدى، شۇعىل جەدەل جاردەم قىزمەتىن شاقىرىپ، ولارعا بولعان وقيعا تۋرالى تولىق اقپارات بەرەدى. جانە زارداپ شەككەندەرگە قاجەتتى العاشقى كومەك كورسەتە وتىرىپ ءولىم- ءجىتىمنىڭ الدىن الۋعا قابىلەتتى بولادى. دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) مالىمەتى بويىنشا، الەمدە جىل سايىن جالپى ءولىمنىڭ % 10، جول- كولىك وقيعاسى، كۇيىپ قالعاننان، قۇلاپ نەمەسە سۋعا باتىپ قايتىس بولادى جانە مۇگەدەكتىكتىڭ % 15 ءدال وسىنداي وقىس جاعدايدان بولادى»، دەلىنگەن حابارلامادا.

 حالىقتى العاشقى كومەك كورسەتۋ داعدىلارىنا ۇيرەتۋ ءۇشىن جاتتىقتىرۋشىلاردى دايىنداۋ ىسىمەن ق ر دەنساۋلىق ساقتاۋ مينيسترلىگىنىڭ «ۇلتتىق شۇعىل مەديتسينانى ۇيلەستىرۋ ورتالىعى» ش ج ق ر م ك اينالىسادى. بۇل كۋرستان كەز كەلگەن كاسىپورىن مەن مەملەكەتتىك مەكەمەلەر جانە جەكە قۇرىلىمدار وتە الادى.