قازاقستانداعى ەڭ تانىمال الەۋمەتتىك جەلى قايسى؟
ق ر اقپارات جانە قوعامدىق دامۋ مينيسترلىگى مەديا- سالانى زەرتتەيتىن رەسەيلىك Brand Analytics كومپانياسىنا ساراپتاماعا تاپسىرىس بەرگەن. زەرتتەۋ قورىتىندىسى بويىنشا «ۆكونتاكتە» الەۋمەتتىك جەلىسى كوش باستاپ تۇر. پاۆەل دۋروۆ نەگىزىن قالاعان جەلىنىڭ قازاقستاندا 1781760 قولدانۋشىسى بار ەكەن. ال 1008360 ادام تىركەلگەن Instagram ەكىنشى ساتىعا جايعاستى. ۇزدىك ۇشتىكتى «موي مير» تۇيىندەپ تۇر.
ال Facebook جەلىسىنە 413026 ادام تىركەلسە، Twitter-گە بار بولعانى 27776 ادام كىرەدى ەكەن. زەرتتەۋ ناتيجەسىنە سايكەس، قازاقستاندىقتاردىڭ تەك 10,6 پروتسەنتى عانا ەشبىر الەۋمەتتىك جەلىگە تىركەلمەگەن. ال جەلى قولدانۋشىلاردىڭ سۇيىكتى ءىسى - وزگە قولدانۋشىلاردىڭ پوستتارىنا پىكىر قالدىرۋ (%24,81). ەكىنشى ورىندا جاڭا تانىستار تابۋ (21,9 %). 12,44 پروتسەنتى ءار ءتۇرلى ساۋالنامالارعا قاتىسادى ەكەن.
الەۋمەتتىك جەلىلەردە، فورۋمدار مەن بلوگتاردا قويىلعان اقپاراتقا حالىقتىڭ تەك 16,54 پروتسەنتى عانا تولىقتاي سەنەدى. ال 65,28 پروتسەنت ادام تەك كەيدە، اقپاراتتى تەكسەرگەندە عانا سەنەتىنىن ايتقان. %12,22 ادام بولسا سەنبەيتىنىن جەتكىزگەن. ەلىمىزدە باسپا ءسوز باسىلىمدارى سۇرانىستىڭ ازايۋىنان باعىتىن وزگەرتۋگە ءماجبۇر. تارالىم سانىن ازايتىپ، سيفرلى فورماتقا ءوتىپ، عالامتور اۋديتورياسىنا ىڭعايلانعان رەداكسيالىق ساياساتقا كوشۋدى قولعا العان. عالامتور قولدانۋشىلارىنىڭ سانى ارتقانىمەن تەلەۆيزياعا سۇرانىس اسا قاتتى وزگەرە قويعان جوق. دەگەنمەن بۇل سالادا دا كورسەتكىشتىڭ تومەندەۋى بايقالادى. جاقىن بولاشاقتا الەۋمەتتىك جەلى قولدانۋشىلارى سۇرانىسقا ەندى يە بولىپ كەلە جاتقان مەسسەندجەرگە كوپتەپ اۋىسادى.
Massaget.kz
