قازاقتىڭ «قىرقىنان شىعارۋ» سالتى نارەستەنى تۋبەركۋلەزدەن ساقتايدى - مامان

نۇر-سۇلتان. قازاقپارات - «قىرقىنان شىعارۋ» سالتى بالانى تۋبەركۋلەز جۇقتىرۋدان ساقتايدى. ورتالىق كوممۋنيكاتسيالار ورتالىعىندا وتكەن بريفينگتە وسىنداي مالىمەت ايتىلدى، دەپ حابارلايدى قازاقپارات ءتىلشىسى.

تۋبەركۋلەزگە قارسى ەكپە الىپ ۇلگەرمەگەن نارەستەنى اۋرۋدان قورعاۋدىڭ جولدارى تۋرالى ايتقان «استانا» مەديتسينا ۋنيۆەرسيتەتىنىڭ بالالاردىڭ جۇقپالى اۋرۋلارى كافەدراسىنىڭ مەڭگەرۋشىسى ديناگۇل باەشيەۆا قازاقتىڭ بالانى «قىرقىنان شىعراۋ» سالتى تۋرالى قىزىقتى اقپارات ۇسىندى.

«ەكپە ينفەكسيالىق اۋرۋدان ساقتانۋدىڭ ەڭ ءتيىمدى ءارى قاۋىپسىز جولى بولىپ سانالادى. بالانىڭ اعزاسى جۇقپالى اۋرۋلارعا مەيلىنشە وسال بولىپ كەلەدى. يممۋندىق جۇيەسى ءالى قالىپتاسپاعاندىقتان، ينفەكتسيا تەز ارادا ءورشىپ، اۋىر سىرقاتقا اينالۋى مۇمكىن. دەگەنمەن ۆاكتسينا كەشىگىپ جاتقان جاعدايدا الەۋمەتتىك الدىن الۋ شارالارىن قاتاڭ ساقتاعان ءجون. بالا دۇنيەگە كەلگەن العاشقى ايدا بالانى سىرتقا كوپ شىعارماۋدىڭ ماڭىزى زور. سونىڭ ىشىندە تۋعانىنا 40 كۇن بولماعان بالانىڭ وزگە ادامدارمەن قارىم- قاتىناسقا تۇسپەۋىنە باسا ءمان بەرگەن ابزال. قازاقتىڭ «قىرقىنان شىعارۋ» سالتىنىڭ استارىندا وسىنداي ساقتىقتىڭ قامى جاتىر»، - دەگەن ديناگۇل باەشيەۆا اتالمىش سالت ارقىلى قازاقتاردىڭ نارەستەنى قانداي اۋرۋلاردان قورعاۋعا تىرىسقانىن ايتتى.

«بۇلاي ايتۋىمنىڭ تولىق عىلىمي نەگىزى بار. قازاق ەكپە دەگەن دۇنيە پايدا بولعانعا دەيىن نارەستەنى اۋرۋدان ساقتاۋدىڭ جولدارىن ىزدەگەن. اۋا مەن تامشى ارقىلى اۋرۋ تاراۋى مۇمكىن ەكەنىن ولار جاقسى بىلگەن. سول سەبەپتى قازاقتار كىشكەنە بالانى ەشقاشان اۋزىنىڭ ماڭايىنان سۇيمەگەن، تەك ماڭدايىنان يىسكەگەن. ول دەگەن عاسىرلار بويى كەلە جاتقان ءبىلىم. ءبىر كۇندە تۋعان تەوريا ەمەس بۇل. جاڭا تۋعان نارەستەنى قىرقىنان شىققانشا وقشاۋلاپ ۇستاۋ ارقىلى تۋبەركۋلەزدەن 100 پايىز قورعاۋعا بولادى. سول سياقتى اۋا مەن تامشى ارقىلى جۇعاتىن تۇماۋ، قىزىلشا، مەنينگوككوك سياقتى ينفەكتسيالاردان دا قورعاۋعا بولادى. مەديتسينادا ەكپە قىرقىنان شىعا بەرە جاسالادى. سوندىقتان، ەكپەگە دەيىن وسى سالتتى ساقتاعان انا ۇتىلمايدى»، - دەدى ديناگۇل باەشيەۆا.

اۆتور: ەسىمجان ناقتىباي