قىتايدا قازاقستاندىق عالىمنىڭ كىتابى جارىققا شىقتى

نۇر- سۇلتان. قازاقپارات - الەمدەگى ەڭ ءىرى بەيجىڭ حالىقارالىق كىتاپ كورمەسىندە ءال- فارابي اتىنداعى قازۇۋ رەكتورى، اكادەميك عالىم مۇتانوۆتىڭ «ەكونوميكالىق جوسپارلاۋ، باسقارۋ جانە بيۋدجەتتەۋدىڭ ماتەماتيكالىق ادىستەرى مەن مودەلدەرى» اتتى كىتابىنىڭ قىتاي تىلىندە تۇساۋ كەسەرى ءوتتى.

مونوگرافيا جەنمين ۋنيۆەرسيتەتىندەگى ق ح ر- ءدىڭ جەتەكشى باسپاسىندا جارىق كوردى.

بۇل شاراعا ق ك پ و ك- ءنىڭ ناسيحاتتاۋ ءبولىمىنىڭ ۆيتسە- ءمينيسترى جياڭ جيانگو، جەنمين ۋنيۆەرسيتەتىنىڭ رەكتورى ليۋ ۆەي، ق ح ر- داعى ق ر ەلشىلىگىنىڭ ءبىرىنشى حاتشىسى قالامقاس دۇزبايەۆا، قازۇۋ رەكتورى عالىم مۇتانوۆ، بەلگىلى عالىمدار مەن ماماندار قاتىستى.

«ءبىز پروفەسسور عالىم مۇتانوۆتى قازاقستاننىڭ جەتەكشى جوعارى وقۋ ورنىنىڭ باسشىسى رەتىندە عانا ەمەس، الەمگە تانىمال ءىرى عالىم رەتىندە دە بىلەمىز. بۇگىن تانىستىرىلىپ وتىرعان ونىڭ عىلىمي ەڭبەگى بىرنەشە تىلدە باسىلىپ، حالىقارالىق دەڭگەيدە جوعارى باعا العان. ەندى بۇل كىتاپ قىتاي تىلىندە جارىق كورىپ وتىر. ونىڭ زەرتتەۋىنىڭ وزەكتىلىگى، يننوۆاتسيالىق ءتاسىلى جانە كوپ قىرلىلىعى عىلىمي قوعامداستىق ءۇشىن عانا ەمەس، سونىمەن قاتار قىتايدىڭ پراكتيكتەرى مەن باسشىلارى ءۇشىن دە ءسوزسىز ۇلكەن قىزىعۋشىلىق تۋدىرادى»، - دەپ اتاپ ءوتتى جەنمين ۋنيۆەرسيتەتىنىڭ رەكتورى ليۋ ۆەي.

قازاقستاندىق عالىمعا عىلىمي جەتىستىكتەرىنىڭ تانىلۋىنىڭ بەلگىسى رەتىندە سەرتيفيكات تابىستالدى.

ايتا كەتۋ كەرەك، بۇل مونوگرافيا ەكونوميكا سالاسىنداعى نوبەل سىيلىعىنىڭ لاۋرەاتى دجون نەشتىڭ جوعارى باعاسىنا يە بولعان، ول زەرتتەۋ ناتيجەلەرىن نوبەل سىيلىعىنىڭ تاعى ەكى لاۋرەاتى كريستوفەر سيمس پەن گارولد كۋننىڭ جۇمىستارىمەن سالىستىرعان. بۇعان دەيىن ول الەمدەگى ەڭ ءىرى «Springer Nature»باسپاسىندا جارىق كورىپ، ەڭ كوپ سۇرانىسقا يە كىتاپتار قاتارىنا كىرگەن. ونى ەلەكتروندى تۇردە 15 مىڭعا جۋىق پايدالانۋشى جۇكتەگەن، بۇل ەڭ ۇزدىك كورسەتكىشتەردىڭ ءبىرى. سونىمەن قاتار، ع. مۇتانوۆتىڭ عىلىمي ەڭبەگى Web of Science Core Collection جەتەكشى عىلىمي جاريالانىمدارىنىڭ بەدەلدى حالىقارالىق بازاسىنا ەنگىزىلدى.

1986 -جىلدان بەرى وتكىزىلىپ كەلە جاتقان بەيجىڭ حالىقارالىق كىتاپ كورمەسى بۇگىندە باسپا جانە پوليگرافيالىق يندۋستريا سالاسىنداعى جەتەكشى پلاتفورماعا اينالدى. بيىل ونىڭ جۇمىسىنا الەمنىڭ 100 ەلىنەن 2,5 مىڭنان استام ەكسپونەنت قاتىسۋدا.

كورمەدە ءال- فارابي اتىنداعى قازۇۋ- دىڭ «قازاق ۋنيۆەرسيتەتى» باسپا ءۇيى تاراپىنان نازارعا ۇسىنىلعان ۋنيۆەرسيتەت عالىمدارىنىڭ 300-دەن اسا عىلىمي ەڭبەكتەرى كوپشىلىكتىڭ ۇلكەن قىزىعۋشىلىعىن تۋدىردى.