پاۆلوداردا قىتايدان كەلگەن قانداسىمىز قىزاناقتىڭ جاڭا ءتۇرىن وسىرۋدە

نۇر-سۇلتان. قازاقپارات - ماي اۋدانىنا قونىستانعان نۇربولات رىمبەك ۇلى جىلىجايىندا قىزاناقتىڭ جاڭا ءتۇرىن وسىرۋدە.

«ەسەنكەلدى» شارۋا قوجالىعىن باسقارىپ وتىرعان ازامات جىلىجايدا كوكونىس وسىرۋمەن 27 جىلدان بەرى شۇعىلدانىپ كەلەدى.

5 جىل بۇرىن قىتايدان كوكشەتاۋعا، بۇدان كەيىن 2018-جىلى وتباسىمەن پاۆلودار وبلىسىنىڭ ماي اۋدانىنا قونىس اۋدارعان.

كاسىپپەن اينالىسۋدى ءجون كورگەن ول ءوزىنىڭ شارۋا قوجالىعىن قۇرىپ، 1000 شارشى مەترگە جۋىق ەكى جىلىجايىندا قيار مەن قىزاناق ءوسىرۋدى قولعا العان.

- ماماندىعىم - اگرونوم، - دەيدى نۇربولات رىمبەك ۇلى. - قولىمنان كەلەتىن ىسپەن شۇعىلدانامىن. قيار، قىزاناقپەن قوسا، ازداپ بۇرىش ەگەمىن. ونىمدەرىمە ەشقانداي حيميالىق ءدارى-دارمەك قوسىلمايدى. اۋىلدىڭ تازا ءونىمى. جەرگىلىكتى حالىقتان سۇرانىس كوپ. جەردى جالعا الىپ، جۇمىسقا كىرىستىم. اكىمدىك ەلەكتر جەلىسىن تارتىپ بەردى. كاسىپكەرلەر پالاتاسى بارلىق قۇجاتتارىما كومەكتەسۋدە. بيلىك بارىنشا قولداۋ كورسەتىپ جاتىر.

شارۋا قوجالىعى 7 ادامدى جۇمىسپەن قامتىپ وتىر. ءونىمىنىڭ باعاسى دا حالىققا قولجەتىمدى. قياردىڭ كەلىسىن 200 تەڭگەمەن ساۋدالاۋدا. قىزاناق ەندى پىسەتىندىكتەن ءالى ساتىلىمعا شىقپاعان. ساتىلىمعا شىققاندا بازارداعىدان تومەن باعا قويماق. قازىرگى ۋاقىتتا كۇنىنە 60-70 كەلى قيار الادى. ءونىمدى ساتىپ الۋشىلار اۋدان مەن اۋىلداردان كەلىپ الىپ كەتەدى.

جىلىجايمەن قوسا، 5 گەكتار جەرگە بۇرىش، قىرىققابات، قاۋىن سياقتى ءتۇرلى كوكەنىستەر ەككەن. قىزاناقتىڭ سورتىن اگرونوم ءوزى قالىپتاستىرعان. ەكى ءتۇرلى تۇقىمنان بۋدانداستىرىپ جاڭا ءونىم الىپ وتىر.

- گوللانديالىق كۇلگىن قىزاناق پەن كىشكەنتاي سوپاق قىزاناقتى بۋدانداستىردىم، - دەيدى نۇربولات رىمبەك ۇلى. - جاڭا ءتۇر سولتۇستىك وڭىرگە قولايلى. بۇل جاقتا جەل قاتتى سوعاتىندىقتان الاسا وسەتىن قىزاناق ىڭعايلى. مەنىڭ بۋدانداستىرىپ العان قىزاناعىم جەردە جاتىپ وسەدى. سۋىققا ءتوزىمدى. ءپىشىنى سوپاق جانە دومالاق بولىپ كەلەدى. بۇل ءبىر رەت قانا بۋدانداستىرىپ العانىم. ەكى-ءۇش رەتتەن كەيىن قالىپقا كەلۋى ءتيىس.

قوجالىق يەسىنىڭ جۇبايى «باستاۋ بيزنەس» جوباسىمەن وقىپ، مەملەكەتتىك گرانتقا يە بولعان. گرانت قارجىسىنا ينكۋباتور ساتىپ العان.

- ينكۋباتورمەن 20 كۇندە 80-90 قازدىڭ بالاپانى شىعارىلادى، - دەيدى نۇربولات رىمبەك ۇلى.

- ونى جەرگىلىكتى تۇرعىندار وزدەرى الىپ كەتەدى. بۇگىندە ۇلىم دا كاسىپكەرلىك كۋرسىنان ءوتىپ، گرانتقا قۇجاتتارىن دايىنداۋدا. 21 جاستاعى ۇلىما شارۋاشىلىقتىڭ قىر-سىرىن ۇيرەتىپ ءجۇرمىن. بۇدان بىلاي شارۋانى ول جۇرگىزەدى. نۇربولات رىمبەك ۇلى تابىسى مول ءىرى جوبانى قۇراستىرعان. جوبا جىل بويى ءونىم بەرەتىن 5-10 گەكتارلىق جىلىجايعا ارنالعان.

- ءىرى جىلىجايمەن 70-80 وتباسىن جۇمىسپەن قامتۋعا مۇمكىندىك بار، - دەيدى قوجالىق يەسى.

- وعان وڭتۇستىك وڭىردەن جۇمىس كۇشىن تارتۋعا دا بولادى. جوبانىڭ قۇنى 100 ميلليون تەڭگەنى قۇرايدى. قازىرگى كەزدە سوعان نەسيە الۋدىڭ جولىن قاراستىرۋدامىز.

ايتا كەتەيىك، ماي اۋدانىنا ارنايى ءىس ساپارمەن كەلگەن ق ر پارلامەنتى ءماجىلىسىنىڭ دەپۋتاتتارى ايزادا قۇرمانوۆا مەن مەرۋەرت قازىبەكوۆا شارۋا قوجالىعىنىڭ جۇمىسىنا جوعارى باعا بەرىپ، اۋدان باسشىلىعىنا ءارى قاراي قولداۋ كورسەتۋدى تاپسىردى.