استانا پروتسەسىنىڭ كەزەكتى مالىمدەمەسى كوڭىلدەن شىقتى - باشار دجافاري
بۇل پىكىردى سيريا ۇكىمەتى دەلەگاتسياسىنىڭ باسشىسى باشار دجافاري ايتتى، دەپ حابارلايدى قازاقپارات ءتىلشىسى.
«كەزدەسۋ قورىتىندىسى بويىنشا جاريالانعان مالىمدەمە ساياسي مازمۇنى جاعىنان كوڭىلىمىزدەن شىقتى. ول سيريانىڭ قازىرگى جاي-كۇيىن ءادىل ءارى انىق كورسەتىپ وتىر. سيريانىڭ ۇكىمەتتىك دەلەگاتسياسى قازاقستان استاناسىنا 13- رەت كەلگەنىنە قۋانىشتى»، - دەدى باشار دجافاري ەلوردادا استانا پروتسەسىنىڭ قورىتىندىسىنا ارنالعان باسپا ءسوز ءماسليحاتىندا.
سونىمەن بىرگە، سيريالىق دەلەگاتسيا جەتەكشىسى قازاقستانعا وزدەرىنە كورسەتىلگەن قوناقجايلىق پەن كەلىسسوزدەر الاڭىن ۇسىنعانى ءۇشىن العىس ايتتى.
ايتا كەتەيىك، ەلوردادا سيرياداعى داعدارىستى رەتتەۋ بويىنشا استانا پروتسەسىنىڭ 13- حالىقارالىق كەزدەسۋى ءوتتى. استانا پروتسەسى 2017-جىلدان بەرى قازاقستان تۇڭعىش پرەزيدەنتى نۇرسۇلتان نازاربايەۆتىڭ قولداۋىمەن جۇزەگە اسىرىلىپ كەلەدى.
بۇعان دەيىن استانا پروتسەسىنىڭ كەپىل مەملەكەتتەرى سيرياعا گۋمانيتارلىق كومەكتى ارتتىرۋ جانە بوسقىنداردىڭ قايتا ورالۋىنا جاعداي جاساۋ قاجەتتىگىن اتاپ ءوتتى. سيريا ماسەلەلەرى بويىنشا كەلەسى كەزدەسۋ 2019-جىلدىڭ قازان ايىندا نۇر-سۇلتان قالاسىندا وتەدى.
