قازاقستاندا شەتەلدىك كولىك الۋعا تىيىم سالىندى
شەنەۋنىكتەر ەندى نەبىر مەرسەدەس، تويوتا، لەكسۋس سياقتى الەمدىك برەندتەردىڭ ونىمدەرىن استىنا باسىپ وتىرمايدى. كەرىسىنشە، قازاقستاندا قۇراستىرىلعان اۆتوكولىكتەردى مىنەدى.
بۇل تۋرالى ەۋرازيا ءبىرىنشى ارناسىنىڭ ءتىلشىسى حابارلادى. ەندى شەنەۋنىكتەر شەتەلدىك كولىكتەردى ساتىپ المايدى. 2 جىلعا سالىنعان تىيىم مەملەكەتتىك قىزمەتكەرلەردى ەلىمىزدە قۇراستىرىلاتىن اۆتولاردى الۋعا مىندەتتەپ وتىر. امانياز ەرجانوۆ بۇل باستامانىڭ بەرەر پايداسى مول ەكەنىنە سەنىمدى. «ەكى جىل دەگەن جاقسى ۋاقىت قوي. بىلاي ايتسا قاراڭىز، اۆتوكولىكتەر، تراسفورماتورلار جانە كابەلدىك پرودۋكتسيا بىزگە كىرگىزىلمەيتىن بولادى. مەملەكەتتىك ساتىپ الۋ جۇمىستارىندا تەك قانا وتاندىق ءونىمدى ساتىپ الۋ كەرەك بولادى. بىزدەي دەيتىن ەندى ءوزىمىزدىڭ قازاقستاندىق اۆتوكولىك جوق. راسىمەن ايتقاندا ءبىز ونى تەك جينايمىز. وزىمىزدە ءوندىرىس جوق. سول وزىمىزدە جينالعان كياسى بار، سان يونگى بار، راۆونى بار. سولاردى ساتىپ الادى»، - دەدى ق ر يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى امانياز ەرجانوۆ.
ءيا، وتاندىق ءونىم دەگەندە جارناماسى جەر جاراتىن بۇل اۆتولار بىزدە تەك قۇراستىرىلادى. سوندىقتان 100 پايىز قازاقستاندىق تاۋار ەمەس.
«مەملەكەتتىك ورگانداردىڭ بارلىعى دەرلىك قازاقستاندىق كولىكتەرمەن ءجۇرسىن!» دەگەن ۇران وسىعان دەيىن ءبىراز جىل بۇرىن كوتەرىلگەن ەدى. ءبىراق، ۋاقىت وتكەن سوڭ ول باستاما جايىنا قالىپ، ءبارى قايتا شەتەلدىڭ تەحنيكاسىن ساتىپ العان ەدى. «بۇل ەڭ بىرىنشىدەن ۇلتتىق تەڭگەمىزدىڭ وتىمدىلىگىن ارتتىرادى. ءقازىر جۇرگىزىلەتىن وپەراتسيالاردىڭ بارلىعى ءبىزدىڭ ۇلتتىق تەڭگەدە بولعاندىقتان، وسى ۋاقىتقا دەيىن تەڭگەنى باسقا ەلدىڭ ۆاليۋتاسىنا اينالدىرىپ ونى گەرمانيا باسقا دا ەلدەرگە شىعارىپ وتىرمىز. ول ءبىزدىڭ ۇلتتىق تەڭگەمىزدىڭ قۇلدىراۋىنا اكەلىپ جاتقان جاعداي. سوندىقتان ءبىرىنشى كەزەكتە بۇل ۇلتتىق قوردان بەرىلەتىن جانە مەملەكەتتىڭ وتاندىق كاسىپورىنداردى دامىتۋعا بەرىلىپ جاتقان باعدارلامالاردىڭ ءتيىمدى جۇمىس جاساۋىنا الىپ كەلەدى»، - دەدى ەكونوميست باۋىرجان يسكاكوۆ.
وسىدان ەكى اي بۇرىن دەپۋتات ازات پەرۋاشەۆ ءماجىلىستىڭ كەزەكتى وتىرىسىندا شەنەۋنىكتەرگە قىرعيداي ءتيىپ، سوزبەن سىباپ الىپ ەدى. «حالىقتىڭ جايىن كۇيتتەگەننىڭ ورنىنا تايراڭداپ جۇرەتىندەر كوپ» دەگەن بولاتىن.
«بيۋدجەتتىڭ قاراجاتىنا ءوزىنىڭ جەكە اقشاسى سياقتى شاشاتىن شەنەۋنىكتەر بار. ۇلكەن- ۇلكەن پاتەرلەردەن باستاپ، نەبىر قىمبات اۆتوكولىكتەرگە تاپسىرىس بەرەدى. ودان قالدى باعالى ماتەريالدان جاسالعان جيھاز الدىرادى. ولاي شالقىپ ءومىر سۇرگىلەرىڭ كەلسە بيزنەسكە كەتىڭدەر. سوندا بارىپ اق ادالىنان اقشا تابىڭدار. مەملەكەتتىك قىزمەتكەر ءاربىر تيىندى ەسەپتەپ، اقىلمەن جۇمساۋى ءتيىس»، - دەدى ق ر پارلامەنت ءماجىلىسىنىڭ دەپۋتاتى ازات پەرۋاشەۆ. جىل وتكەن سايىن ازاماتتىق قوعام قالىپتاسىپ، قاراشا حالىق بيلىككە ويىن اشىق بىلدىرە باستاۋى دا مۇنداي قادامعا بارۋعا يتەرمەلەمەي قويمايدى. ساياساتتانۋشى قازىبەك مايگەلدينوۆتىڭ پىكىرىنشە، قازىر اشىق اقپارات زامانىندا قاي شەنەۋنىكتىڭ نە كيىپ، نە ءمىنىپ، قايدا وتىرعانىن جالپاق جۇرت كورىپ- ءبىلىپ وتىر.
«حالىق پەن بيلىك اراسىندا تەتىكتىڭ جاقىنداي تۇسكەنىن بايقاپ وتىرمىز. بۇعان دەيىن كوپتەگەن تۇسىنىسپەۋشىلىكتەر حالىقتىڭ ىزاسىن تۋدىرعانى بەلگىلى. بۇل شەنەۋنىكتەردىڭ كابينەتىنىن شىعا الماۋىندا بولعان. ال قازىرگى تاڭدا بۇل الەۋمەتتىك ليفت دەيمىز، باستاماسى بار. الداعى كۇندەرى بۇل ترەندكە نە بەلگىلى ءبىر ۋاقىتتاعى حايپقا اينالماي، نەگىزى جۇمىس تەتىگى رەتىندە قولدانعانىن كۇتەمىز»، - دەدى ساياساتتانۋشى قازىبەك مايگەلدينوۆ.
جالپى، مۇنداي باستامانى وسىندان ەرتەرەك قولعا الىپ، بەكىتىپ العاندا بۇل كۇندە كورشى وزبەكتەر قۇساپ، ىشكى نارىقتى تولىق قامتىپ، ەكسپورتقا كولىك شىعاراتىن دەڭگەيگە جەتەر مە ەدىك؟ ! ماماندار «ايتەۋىر ەشتەن كەش جاقسى» دەيدى.