مەكتەپ سومكەسىن قالاي تاڭداۋ كەرەك - دارىگەر كەڭەسى

نۇر- سۇلتان. قازاقپارات – ق ر باس مەملەكەتتىك سانيتارى جانداربەك بەكشين مەكتەپ سومكەسىن تاڭداۋ جونىندە اتا- انالارعا كەڭەس بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، مەكتەپ سومكەسىن تاڭداۋدا ءبىرقاتار قاعيدالاردى ۇستانعان ءجون.

«سومكەنىڭ قاتتى ورتوپەديالىق ارقالىعى بولۋى ءتيىس، اسىناتىن باۋلارى جالپاق بولسىن جانە تۇتقاسى ۇزىندىعى بويىنشا رەتتەلۋى كەرەك. مەكتەپ سومكەسىنىڭ ولشەمى مەن سالماعى بالانىڭ بويى مەن جاس ەرەكشەلىگىنە سايكەس كەلۋى كەرەك، بوس سومكەنىڭ سالماعى 1 ك گ اسپاۋى ءتيىس. اۋىر ريۋكزاكتى الىپ ءجۇرۋ سكوليوز، وستەوحوندروز، جارىق سياقتى اۋرۋلاردى تۋعىزۋى مۇمكىن»، - دەدى ج. بەكشين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

وقۋلىقتار سالىنعان جالپى سومكە سالماعى بالا سالماعىنىڭ 10 پايىزىنان اسپاۋى ءتيىس. ماسەلەن، 1-3 - سىنىپتا - 1,5-2 كەلى، 4-5- سىنىپتا - 2-2,5 كەلى، 6-7 - سىنىپتا - 3-3,5 كەلى جانە 8-11 - سىنىپتا - 4-4,5 كەلى بولۋى كەرەك.

«قاراڭعىدا جارىق شاشاتىن سومكە تاڭداۋ دا - بالا قاۋىپسىزدىگى ءۇشىن ماڭىزدى. مۇنداي سومكەنى تاڭعى جانە كەشكى ۋاقىتتا جولدى كەسىپ وتەردە كولىك جۇرگىزۋشىلەرى تەز بايقايدى»، - دەپ اتاپ ءوتتى دارىگەر.

ول مەكتەپتەردەگى جەكە شكافتىڭ سومكە سالماعىن بارىنشا جەڭىلدەتكەنىن ەسكە سالدى. بۇل شارا اسىرەسە جاسوسپىرىمدەر اراسىندا تىرەك- قيمىل اپپاراتى اۋرۋلارىنىڭ الدىن الادى.

«وقۋ پروتسەسىندە مەكتەپ وقۋلىقتارىنىڭ دا ماڭىزى زور. ءبىر وقۋلىقتىڭ سالماعى سانيتاريالىق قاعيدالاردا كوزدەلگەن نورمالاردان اسپاۋى ءتيىس. 1-4 - سىنىپ وقۋلىقتارى 300 گ ر، 5-6 - سىنىپ وقۋلىقتارى - 400 گ ر، 7-9 - سىنىپتا - 500 گ ر. جانە 10-12- سىنىپتا وقۋلىقتار 600 گراممنان اسپاۋى ءتيىس»، - دەدى ج. بەكشين.

كورسەتىلگەن سالماقتان اسىپ كەتكەن وقۋلىقتار بويىنشا اتا- انا 87172741864 نومىرىنە نەمەسە كوميتەت سايتىنا شاعىمدانا الادى.

اۆتور ايجان سەرىكجان قىزى