الەم ەلدەرى جەرءۇستى مەتروسىنىڭ قۇرىلىسىنا قانشا قارجى جۇمساعان؟
جەڭىل رەلستى كولىكتەرگە ارنالعان ەستاكادانىڭ ۇزىندىعى 22,4 شاقىرىمدى قۇرايدى. ونىڭ ءار شاقىرىمنىڭ قۇرىلىسىنا 68 ميلليون دوللار قارجى جۇمسالماق. وڭتايلاندىرۋدان كەيىن جوبانىڭ جالپى قۇنى 1,5 ميلليارد دوللار بولىپ بەكىتىلدى.
ءدال وسىنداي سومانى 2012 -جىلى كانادانىڭ استاناسى وتتاۆا شىعىنداعان ەدى. الايدا مەترونىڭ ۇزىندىعى بىزدەگىگە قاراعاندا ەكى ەسە قىسقا، ياعني 12,5 شاقىرىم عانا. كانادالىقتار 1 شاقىرىم جولدى سالۋعا 120 ميلليون دوللار جۇمسادى. ال وڭتۇستىك كورەيانىڭ استاناسى سەۋل ءۇشىن ەستاكادانىڭ ءار شاقىرىمى 110 ميلليون دوللار تۇردى. 2016 -جىلى 61 شاقىرىمدىق جەرءۇستى مەتروسىن باستان اياق سالىپ شىعۋ ءۇشىن مەملەكەت 6,7 ميلليارد دوللار باعىتتادى.
دەگەنمەن وسى اتالعانداردىڭ اراسىندا ەڭ اۋقىمدى بيۋدجەت دۋبايعا تيەسىلى. 2010 -جىلى ۇزىندىعى 52 شاقىرىم بولاتىن جەرءۇستى مەتروسىنىڭ قۇرىلىسىنا 7,8 ميلليارد دوللار جۇمسالدى. ءار شاقىرىمىنىڭ قۇنى 150 ميلليون دوللارعا باعالاندى.
جاڭا مەترو جەلىلەرى وزبەكستاننىڭ سەرگەليي جانە يۋنۋساباد اۋداندارىندا سالىنىپ جاتىر. قۇرىلىس جۇمىستارى 2021 -جىلى اياقتالادى دەپ كۇتىلۋدە. وعان 422,3 ميلليون دوللار قارجى قاراستىرىلعان. LRT جەلىلەرى بارلىق قۇرلىقتاعى 53 ەلدە بار جانە ونى 388 قالادا جالپى ەسەپتە 45 ميلليون جولاۋشى قولدانادى.
LRT قۇرىلىسى العاش رەت 1950-70 -جىلدارى قولعا الىنعان. 2000-15- جىلدارى 70 جاڭا جۇيە اشىلدى. ال 2016 -جىلى الەمنىڭ 19 ەلىندە 289 شاقىرىم جەلى ىسكە قوسىلدى. بۇل قاتاردا ريو- دە- جانەيرو، تسينداو، بىدگوش، كانزاس- سيتي، سيەتل مەن ۆاشينگتون بار. 2000 - جىلداردىڭ باسىندا اتالعان جۇيە تاياۋ شىعىس ەلدەرى مەن ازيا- تىنىق مۇحيتى ايماعىندا جانە افريكا مەن لاتىن امەريكاسى ەلدەرىندە پايدا بولدى.
www.24.kz