قاسيەتىڭنەن اينالايىن، قامبار اتا
تەڭىزدەي بۋىرقانعان دودانىڭ ىشىنە قويىپ كەتەتىندەي. اتقۇمار اتا قازاقتىڭ قانىنان جۇققانى-اۋ تەگى. تۋعالى تاقىمى تۋلاققا ءتيىپ كورمەگەندەردىڭ ءوزى كوكپارشىلارعا ءجون سىلتەپ، اقىل ايتۋدا.
تۇرقى ەسىك پەن توردەي شابدار ات مىنگەن، دەمبەلشە كەلگەن جاس جىگىت تاقىمىنا قىسقان سەركەدەن ايىرىلار ەمەس. تۇس-تۇستان انتالاي قاۋمالاعان، سەركەگە قولىن سوزعان كوكپارشىلار قاپىسىن تابا الماي ءجۇر.
شاماسى شابدار ات كوكپارعا ءتۇسىپ ىسىلعان جۇيرىك بولار، قارسى كەلگەنىن ومىراۋىمەن سوعىپ ماڭايلاتار ەمەس. قوس قۇلاعىن جىمىرىپ العان جارىقتىق ارتىنان ۇمتىلعان ءبىر-ەكى كوكپارشىنى وڭدىرماي وقساتا تەۋىپ تە جىبەردى. الدەن ۋاقىتتا ءبىتىمى بولەك قاراگەر اتتى كولدەنەڭدەي سالعان. جان الىپ، جان بەرىسكەن، قىم-قۋىت ارپالىستىڭ ىشىندە تاقىمى بوستاۋ بولدى ما ەكەن، قاراگەردىڭ ۇستىندەگى بوزبالا ات ارتىنا سىرعىپ تۇسكەنى.
ءولدى دەپ شۋ ەتە قالدى، كوكپاردى تاماشالاپ وتىرعان ءجۇز سان جاماعات. ولمەسە دە مەرتىگەتىن بولدى، دەدى بىرەۋلەر، قاپتاعان تۇياقتىڭ بىرەۋى قاقىراتا تيسە، وپىرىپ جىبەرمەي مە؟
بوز دالانىڭ بوزامىق توپىراعىنان ۇشقان شاڭ تورعىن شىمىلدىق ىسپەتتى، تۇك كورسەتەر ەمەس. سەركەدەن باسقانى كورە الماي ارۋاقتانىپ ات جالىندا الاسۇرعان تامام كوكپارشى سىلتىدەي تىندى. ولار دا جاپىرىلىپ اتتان تۇسە باستاعان. توزاڭ ءسال سەيىلگەن سوڭ عانا كوردىك، امان ەكەن. شىلبىرىن سۇيرەتكەن قاراگەر اتىنا قاراي جان ۇشىرىپ جۇگىرىپ بارادى. دەمىن ىشىنە تارتىپ وتىرعان جۇرت يىقتارىنان جۇك تۇسكەندەي، ۋھ دەپ ءبىر دەم الدى.
- قازاقتا «سيىر ءمۇيىزىن توسەيدى، جىلقى جالىن توسەيدى» دەگەن ءسوز بار، دەدى ءبىر اقساقال. قانداي قىسىلتاياڭ جەر بولسا دا جىلقى بالاسى ادامدى باسپايدى.
قامبار اتانىڭ ءبىر قاسيەتى بالكىم وسى شىعار.
بايقال ءبايادىل
egemen.kz