قازاقستان توكيو وليمپياداسىنا رەسمي شاقىرۋ الدى
حالىقارالىق وليمپيادالىق كوميتەتتىڭ (ح و ك) شاقىرۋ حاتىندا ح و ك پرەزيدەنتى دوكتور توماس باحتىڭ قولى قويىلعان. ايتا كەتەيىك، ح و ك ءداستۇر بويىنشا وليمپياداعا ءبىر جىل ۋاقىت قالعاندا ۇلتتىق وليمپيادالىق كوميتەتتەرگە شاقىرۋ جىبەرەدى.
«قازىرگى تاڭدا قازاقستان كومانداسىندا 10 ليتسەنزيا بار. وليمپياداعى جولدامانى ءجۇزۋشى دميتري بالاندين (100، 200 مەتر، براسس)، جەڭىل اتلەتتەر ولگا رىپاكوۆا مەن گەورگي شەيكو، ۆەلوشاباندوز ەۆگەني گيديچ (ليتسەنزيا بەلگىلى ءبىر سپورتشىعا بەرىلمەيدى)، كلاسسيكالىق ساداق اتۋدان قازاقستاننىڭ ەرلەر كومانداسى (دەنيس گانكين، يلفات ابدۋللين، سانجار مۇسايەۆ) جانە اشىق سۋدا ءجۇزۋشى ۆيتالي حۋدياكوۆ يەلەندى. ساداق اتۋ سپورتىنان قازاقستان كوماندالىق جانە جەكەلەي سايىستا دا ونەر كورسەتەدى»، - دەلىنگەن ق ر ۇلتتىق وليمپيادالىق كوميتەتىنىڭ اقپاراتىندا.
توكيوداعى وليمپيادا ويىندارىنا الەمنىڭ 206 ەلىنەن 11 مىڭنان استام سپورتشى قاتىسادى. جارىس 2020 -جىلعى 24 -شىلدەدە باستالادى، جابىلۋ سالتاناتى 9 -تامىزدا وتەدى.