ەۋروپادا قازاقستانداعى شىتىرمان وقيعالى تۋريزم تۋرالى فيلم كورسەتىلەدى
بۇل تۋرالى «Kazakh Tourism» كومپانياسى ءمالىم ەتتى، دەپ حابارلايدى قازاقپارات ءتىلشىسى.
جوباعا Exponential Kazakhstan كومپانياسى مۇرىندىق بولىپ وتىر. كومپانيا Kazakh Tourism جانە ق ر ۇلتتىق مۋزەيىنىڭ قولداۋىمەن وسى جوباعا ەندۋرودان (موتوكروسس) الەم چەمپيونى، يسپانيالىق دجوزەپ گارسيانى تارتتى.
«كەشە ءتۇسىرىلىم توبىنىڭ قازاقستانعا جاساعان 20 كۇندىك ساياحاتى اياقتالدى. التىنەمەل، شارىن، كولساي كولدەرى، ىلە الاتاۋى سياقتى تابيعات پاركتەرىن، اقمولا جانە الماتى وبلىستارىنىڭ، الماتى قالاسىنىڭ كورىكتى جەرلەرىن، نۇر-سۇلتانداعى ۇلتتىق مۋزەيدى، بايتەرەك، بولاشاقتىڭ «نۇر الەم» مۋزەيىن، حانشاتىردى تۇسىردىك. سارىارقا وڭىرىندە ەستافەتانى تانىمال موتوتريالشى، 2018 -جىلعى الەم چەمپيونى دجەروني فاحاردو @JeroniFajardo قابىلداپ الدى. الماتى وبلىسى مەن الماتىداعى ءتۇسىرىلىمدى موتوكروسستان بيىلعى الەم چەمپيونى @josepgarcia26 جۇرگىزدى»، - دەلىنگەن كومپانيانىڭ Facebok-تەگى پاراقشاسىندا.
ەۋروپادان كەلگەن قوناقتار بۋرابايعا بارىپ، سۇلۋ كوكشە ولكەسىندە تابيعات اياسىندا تاماشا كادرلار ءتۇسىردى.
ەلورداعا ورالعان سوڭ ۇلتتىق مۋزەيدىڭ 5 جىلدىعىنا وراي دجەروني فاحاردو موتوسيكل مىنۋدەن شەبەرلىك ساباعىن وتكىزدى. ودان ءارى ءبىر توپ موتوبايكەرلەرمەن قالا قىدىرىپ كەتتى. تانىمال موتوتريالشى حانشاتىردىڭ الدىندا ساۋدا ورتالىعىنا كەلگەندەردى ونەرىمەن ءتانتى ەتتى. كۇن سوڭىندا ءتۇسىرىلىم توبى «نۇر-الەم» پاۆيلونىنا بارىپ، سونىڭ الدىندا موتوسيكلمەن اسىر سالدى.
جوبا باسشىسى فلوريان بەحرەندتىڭ ايتۋىنشا، فيلم بيىل قىسقا قاراي ەۋروپانىڭ باستى سپورت تەلەارنالارىندا كورسەتىلەدى.
وسى جوبا قازاقستاننىڭ تۋريستىك الەۋەتىن ەۋروپا ەلدەرىنە تانىتۋ ماقساتىن كوزدەيدى.
ايتا كەتەيىك، جوبانى مەملەكەت قاراجاتىنسىز گەرمانيا كومپانياسى ىسكە اسىرىپ وتىر.
اۆتور: نۇرلان تۇياقوۆ
