ەلوردالىقتار يەسىز قالعان يت-مىسىقتاردى اسىراپ الۋدا

نۇر-سۇلتان. قازاقپارات - بۇگىن ەلوردادا يەسىز قالعان يت پەن مىسىقتاردىڭ جارمەڭكەسى ءوتتى، دەپ حابارلايدى قازاقپارات ءتىلشىسى.

«بۇگىنگى جارمەڭكەنى وتكىزۋگە سەبەپ، جىل ساناپ باس قالامىزدا قاراۋسىز قالعان يت- مىسىقتاردىڭ سانى كوبەيىپ كەلەدى. بۇگىندە قالاداعى يەسىز قالعان جانۋارلاردى پانالاتۋ ورتالىعىندا 700 دەن استام يت پەن مىسىق بار. دەگەنمەن ول ورتالىقتىڭ شامادان تىس جانۋارلاردى قابىلداۋ مۇمكىندىگى جوق. نەگىزى ەرەجە بويىنشا پانالاۋ ورتالىعىنا كەلگەن، يت نەمەسە مىسىقتى 60 كۇن كولەمىندە ۇستاۋعا عانا رۇقسات بەرىلەدى. ودان سوڭ ءۇشىنشى تۇلعاعا بەرۋ قاجەت. وسى ماقساتتا بۇگىنگى جارمەڭكەنى ۇيىمداستىرۋدامىز»، - دەدى نۇر-سۇلتان قالاسى قالالىق ورتا ساپاسى جانە باقىلاۋ باسقارماسىنىڭ باسپا ءسوز حاتشىسى دانا تۇرعىنوۆا.

ونىڭ ايتۋىنشا، ەلوردا تۇرعىندارىنىڭ جانۋارلاردى اسىراپ الۋعا دەگەن قىزىعۋشىلىقتارى ايتارلىقتاي جوعارى ەمەس.

«بۇگىنگى كورمەگە ۆەتەرينارلىق تەكسەرۋدەن وتكەن، تازالانعان يت پەن پىسىقتار قويىلدى. ياعني بارلىعى بىردەي جەتكىزىلگەن جوق. ءدال قازىرگى ۋاقىتتا 8 مىسىق جانە 3 يت ءوز يەسىن تاپتى. ەگەر كەلۋشىلەردەن سۇرانىس بولىپ جاتىرسا، قوسىمشا اكەلەتىن بولامىز. جانە ولاردى جەتكىزۋ مەن جالپى وسى شارانى ۇيىمداستىرۋعا 10-نان استام ەرىكتى بەلسەندىلىك تانىتۋدا»، - دەدى ول.

سونداي-اق، باسقارما وكىلى يت پەن مىسىقتاردى اسىراپ الۋشىلارمەن كەلىسىمشارت جاسالاتىنىن دا ايتىپ ءوتتى.

«جانۋارلاردى الىپ، ونىڭ قىزىعى باسىلعان سوڭ، دالاعا جىبەرە سالاتىن جايتتار دا كەزدەسىپ جاتىر. وكىنىشكە قاراي، ونداي ادامدار بار. سول ءۇشىن دە ءبىز ءاربىر جەكە اسىراپ الۋشىمەن كەلىسىمشارت جاساسۋدامىز. ارينە ول ازاماتتاردى ناقتى ءبىر نارسەگە مىندەتتەمەيدى، ماقسات - جانۋاردى اسىراپ العاننان كەيىنگى جاۋاپكەرشىلىكتى سەزىندىرۋ. جانە ەگەر ول ادام العان يت پەن مىسىقتى ءبىز تاۋىپ الساق، ول كىسىگە ەكىنشىلەي جانۋار بەرىلمەيدى»، - دەيدى ول.

باسقارمانىڭ باسپا ءسوز حاتشىسىنىڭ سوزىنە سەنسەك، پانالاۋ ورتالىعىنداعى جانۋارلاردىڭ بارلىعى كارانتين مەن ۆاكسيناتسيالاۋدان ءوتىپ، ۆەتەرەنار ماماننىڭ باقىلاۋىندا.

اۆتور: داۋلەت ىزتىلەۋ