پحەنچحان وليمپياداسىنىڭ باس اسپازى ەلوردالىقتاردى كورەي تاعامدارىمەن تانىستىردى

نۇر-سۇلتان. قازاقپارات - پحەنچحاندا وتكەن وليمپيادا ويىندارىنىڭ باس اسپازى حان چۋل بە نۇر-سۇلتان قالاسىنىڭ تۇرعىندارى مەن قوناقتارىن كورەي ۇلتىنىڭ تاعامدارىمەن تانىستىردى، دەپ حابارلايدى قازاقپارات ءتىلشىسى.

ەلورداداعى «مەرريوت» قوناقۇيىندە كورەي تاعامدارىنىڭ كەشى ءوتتى. فەستيۆال وسىمەن ەكىنشى مارتە ۇيىمداستىرىلىپ وتىر.

«كورەيالىق اس ءۇي ءبۇتىن الەمدە وتە تانىمال. كورەيادا ەڭ ۇزدىك اسپازداردىڭ باسىن قوسقان ارنايى ۇيىم بار. ولاردى كورەي اس ءۇيىنىنىڭ تانىمالدىلىعىن ارتتىرۋ جانە ترەنينگتەر وتكىزۋ ءۇشىن الەم ەلدەرىنە جىبەرەدى. بۇل ينستيتۋت كورەي ۇلتتىق ورتالىقتارى ارقىلى جۇمىس ىستەيدى. ولار باعدارلاماعا قاتىسۋ ءۇشىن جەرگىلىكتى قوناقۇيلەردى ۇسىنىپ وتىرادى. مىنە، بۇل ءىس-شارا نۇر-سۇلتان قالاسىندا دا تاماشا ءوتتى»، - دەدى قازاقپارات تىلشىسىنە قازاقستانداعى كورەي ەلشىسى كيم دەسيك.

كورەي اس ءۇيىنىڭ شەبەرى، ۇلتتىق كوللەگيانىڭ ءتوراعاسى حان چۋل بە ەلوردالىقتاردى ءوزى دايىنداعان تاعامداردان اۋىز تيگىزدى. ولاردىڭ اراسىندا - بالقاراعاي جاڭعاعىنان جاسالعان تۇزدىق قوسىلعان تەڭىز ونىمدەرى، تاۋىق ەتىنەن جاسالعان پۋنش جانە جاڭا پىسكەن جەمىستەر، ادام-ءشوپ پەن تاۋىق ەتىنەن جاسالعان كوجە بار.

ەلشى كيم دەسيك ءوز ۇلتىنىڭ جانە قازاقتاردىڭ كەيبىر تاعامدارى ۇقساس كەلەتىنىن جەتكىزدى.

سونداي-اق، ونىڭ ايتۋىنشا، دەپورتاتسيالانعان كورەيلەر وزدەرىنىڭ ۇلتتىق تاعامدارىنا قازاق اسىنىڭ ەلەمەنتتەرىن قوسقان. بۇدان ولار ودان ءارى ءدامدى بولا تۇسكەن.

«كورەيلەر قان قوسىلعان شۇجىق - سۋندەنى ازىرلەيدى. ول سيىردىڭ ىشەگىن قايناتۋ نەمەسە بۋدا ۇستاۋ جولىمەن دايىندالادى. وعان الدىن الا ءتۇرلى قوسپالار سالىنادى. بۇل تاعام قازىعا نەمەسە شۇجىققا ۇقسايدى»، - دەپ ءبولىستى ول.

اۋدارما: ميرا تولەندى قىزى