ەلوردادا كورەيا رەسپۋبليكاسى ەلشىلىگىنىڭ جاڭا عيماراتى اشىلدى
سالتاناتتى شاراعا امەريكا قۇراما شتاتتارى، پولشا رەسپۋبليكاسى، نيدەرلاندى كورولدىگى سياقتى ديپلوماتيالىق ميسسيالار مەن حالىقارالىق ۇيىمداردىڭ باسشىلارى، قازاقستاننىڭ مەملەكەتتىك ورگاندارى مەن مينيسترلىكتەرىنىڭ وكىلدەرى، نۇر-سۇلتان قالاسىنداعى كورەي دياسپوراسى مەن ب ا ق وكىلدەرى قاتىستى.
سالتاناتتى شارادا كورەيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى كيم دەسيك مىرزا مەن ق ر سىرتقى ىستەر مينيسترلىگىنىڭ ازيا جانە افريكا دەپارتامەنتىنىڭ ديرەكتورى ەرجان مۇقاش قۇتتىقتاۋ ءسوز سويلەدى.
ەرجان مۇقاش ەلشىلىك ۇجىمىن جاڭا عيماراتتىڭ اشىلۋىمەن قۇتتىقتاپ، ولارعا تابىس، سونداي-اق ەكى ەل اراسىنداعى ءارى قاراي جەمىستى ىنتىماقتاستىق تىلەدى.
كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دەسيك بەس قاباتتى عيماراتتىڭ قۇرىلىسى ەكى جىلعا سوزىلىپ، جەلتوقسان ايىندا اياقتالعاندىعىن ايتتى. ول جاڭا عيماراتتىڭ تۇساۋكەسەرىن 24- شىلدەدە وتكىزۋدى ءجون كورگەندەرىن، قازاقستان مەن كورەيا اراسىنداعى ستراتەگيالىق ارىپتەستىكتىڭ 10 جىلدىعىن مەرەكەلەۋ اياسىنداعى ءىس-شارانىڭ سيمۆولدىق ءمانىن اتاپ ءوتتى.
«بەلگىلى ءبىر ەلدە ەلشىلىكتىڭ ءوز عيماراتىنىڭ بولۋى، ونىڭ ەلشىلىك قىزمەتكەرلەرىنە جانە وسى ەلدەگى وتانداستارعا قىزمەت ەتۋ ماقساتىمەن شەكتەلمەيدى، سونداي-اق ولاردىڭ ەلى مەن قابىلداۋشى ەل اراسىنداعى قارىم-قاتىناس قانشالىقتى بەرىك ەكەندىگىن كورسەتەدى»، - دەدى كيم دەسيك.
شارا بارىسىندا قوناقتارعا قازاقستاندىق جانە كورەي مۋزىكانتتارى مەن بيشىلەرىنىڭ قاتىسۋىمەن كونسەرت قويىلدى.
