الەمدەگى ەڭ قاتتى تىستەيتىن (شاعاتىن) تىرشىلىك يەلەرى

نۇر-سۇلتان. قازاقپارات - تابيعاتتاعى تىرشىلىكتىڭ كوبى تىسىمەن قورعانادى.

نەمەسە ولاردىڭ كومەگىمەن قورەگىن تابادى. كەيبىرى قۇربانىنىڭ دەنەسىنە حيميالىق ۋ شاشىراتۋ ءۇشىن بىزگەگىن پايدالانسا، باسقاسى بار زەيىنىن تىستەۋ كۇشى مەن قۋاتتىلىعىنا باعىتتاپ وتىرادى.

تىزىمدە بىرنەشە تىرشىلىك يەسى كەلتىرىلگەن، ولاردى كەزدەستىرسەڭىز ومىرىڭىزگە قاۋىپ ءتونۋى دە ابدەن مۇمكىن.

وتتى قۇمىرسقالار

Solenopsidini دەپ اتالاتىن جاۋىز قۇمىرسقالار ءوز قۇربانىنىڭ دەنەسىنە بەكىنىپ الادى دا، كەيىننەن قۇرساق قۋىسىندا ورنالاسقان بىزگەك ارقىلى ۋ شاشادى. سولەنوپسين ۋلى الكالويدى ادامدا قاتتى كۇيىككە ۇقساس سەزىمدەردى تۋدىرادى ەكەن.

ءبورىبالىقتار

ءبورىبالىقتاردىڭ تومەنگى جاق سۇيەگى العا قاراي ەداۋىر شىعىڭقى كەلەدى. اسا وتكىر ءۇشبۇرىشتى تىستەرىنىڭ ءوسۋى دە ەرەكشە - بالىق اۋزىن جۇمعاندا، ۇستىڭگى تىستەرى استىڭعى تىستەردىڭ ارالارىنا ءدال تۇسەدى ەكەن. سونىڭ ارقاسىندا جىرتقىش بايعۇس قۇرباننىڭ دەنەسىن بولشەك- بولشەكتەپ كەسىپ جىبەرە الادى. سونىمەن قاتار، ءبورىبالىقتار وتە جىلدام تىستەيدى: بۇل جىرتقىشتاردىڭ ءبىر ءۇيىرى الىپ دەنەلى ەنەكەنىڭ ءوزىن بار بولعانى 15 مينۋت ىشىندە قۋ سۇيەك قالعانشا كەمىرىپ تاستاي الادى ەكەن.

مەدۋزالار

مەدۋزالاردىڭ كوپ ءتۇرى وزدەرىن شابۋىلدان قورعاۋ ءۇشىن، نەمەسە كەرىسىنشە، ولجانى ۇستاۋ ءۇشىن نەماتوتسيتتەرمەن اتقىلايدى. نەماتوتسيتتەر - اتۋ كەزىندە كىپ-كىشكەنتاي گارپۋندار ءتارىزدى ارەكەت ەتەتىن ارناۋلى كلەتكالى قۇرىلىمدار. كەيبىرەۋى قوسىمشا ۋلى شابۋىلدى قامتاماسىز ەتەدى. الەمدە مەدۋزالاردىڭ ادام ءۇشىن قاۋىپتى بولىپ كەلەتىن 15 ءتۇرى بار. Chironex fleckeri مەدۋزاسىن كەزدەستىرۋ ومىرىڭىزگە قاۋىپ توندىرەدى، ونىڭ سالماعى ءبىر جارىم كيلوگراممعا دەيىن جەتەدى، ال ۋلى قارماۋىشتارى ءۇش مەترگە دەيىن جايىلادى ەكەن.

قۇرشاياندار

عىلىمعا قۇرشايانداردىڭ ەكى مىڭعا جۋىق ءتۇر تارماعى بەلگىلى. ولاردىڭ جيىرماسى ادام ءومىرى ءۇشىن قاۋىپتى. ول قۇرشايانداردى سولتۇستىك افريكا مەن تاياۋ شىعىستا كەزدەستىرۋگە بولادى. كوبىنەسە Leiurus quinquestriatus دەپ اتالاتىن تارماقتىڭ وكىلدەرى ءجيى شابۋىلدايدى، ولاردىڭ شاققانىنان ادامنىڭ قينالاتىنى سونشا، ءولىمنىڭ ءوزىن ادام ازاپتان قۇتقارۋشى رەتىندە قابىلدايدى ەكەن.

قانىشەر-ارا

افريكانىڭ جابايى ارالارى وركەنيەتتى الەمنىڭ ومارتاشالارى ۇيرەنگەن ارالاردان ايتارلىقتاي ەرەكشەلەنەدى. XX عاسىردا ولاردى وڭتۇستىك امەريكاعا ەنگىزۋ ارەكەتتەرى جاسالعان، سودان بۇل ءتۇر سولتۇستىككە تارالدى، ارالاردىڭ «قانىشەر-ارا» اتاعىنا يە بولعان جەرى دە سول. بۇل جاندىكتەر ۇياسىن قورعاۋ قاجەت دەپ شەشسە عانا شابۋىلدايدى ەكەن. ولاردىڭ ۋىنىڭ ۋلاندىرعىش قاسيەتى دە تىم قاتتى - ادام بالاسىن ساناۋلى مينۋتتا-اق ءولتىرىپ جىبەرە الادى.