الماتى تاۋلارىندا قىز-قىرقىنعا قىرعيداي تيگەن ەر ادام ۇستالدى
37 جاستاعى ەر ادام كەزەكتى مارتە تۋريستەرگە قوقان-لوققى كورسەتىپ جاتقان ۋاقىتتا ۇستالعان دەپ حابارلايدى «ك ت ك» ارناسى.
كۇدىكتىنى بۋتاكوۆكا شاتقالىندا پوليتسيا قىزمەتكەرلەرى قۇرىقتادى.
قالالىق پوليتسيا دەپارتامەنتىنىڭ رەسمي وكىلى سالتانات ازىربەكتىڭ سوزىنشە، ەر ادام تاۋدا وزىنە ماتادان ءۇي سوعىپ الىپ، سونىڭ ىشىندە تۇرعان.
«ول تاۋلى ايماقتا دەمالىپ جۇرگەن ادامدارعا قوقان-لوققى كورسەتىپ، پىشاق تاقاۋ ارقىلى ولاردىڭ جەكە-مۇلىكتەرىن قولدى قىلعان»، - دەيدى ول.
كۇدىكتىنىڭ كۇركەسىنەن ۇيالى تەلەفوندار، التىن سىرعا مەن جۇزىك، باسقا دا قۇندى زاتتار تابىلعان. ەر ادام ولار پىشاقپەن قورقىتىپ العانىن مويىنداعان.
سونداي-اق ونىڭ بىرنەشە مارتە سوتتالعانى دا بەلگىلى بولدى.
تەلەارنانىڭ اتاپ وتۋىنشە، اسا اۋىر قىلمىستار جاساعان ونىڭ تۇرمەدەن بوساپ شىققان بەتى وسى ەكەن. بەلگىلى بولعانداي، تاۋدا توناۋشىلىقپەن تىرشىلىك ەتكەن ەر ادام وزىنە قارسىلىق تانىتپاق بولعان تۋريستەردىڭ بىرىنە پىشاق سۇعىپ العان. زارداپ شەككەن تۇرعىن، ابىروي بولعاندا، ءتىرى قالعان.
«كەلگەن قوناقتارعا دورەكىلىك كورسەتىپ، باعالى زاتتار مەن اقشالارىن الىپ وتىرعان. ەندى قالا تۇرعىندارى مەن قوناقتارىنىڭ ەشتەڭەگە الاڭداماي كەلىپ، دەمالا بەرۋىنە بولادى»، - دەيدى ىلە الاتاۋى مەملەكەتتىك ۇلتتىق باعى مەدەۋ فيليالى ديرەكتورىنىڭ ورىنباسارى سەرىكجان سۇرانشين.
تەلەارنانىڭ حابارالاۋىنشا، قاراقشى جالعىز ءوزى بولماعان. 37 جاستاعى ازاماتتىڭ سىبايلاسىن قازىر پوليتسيا قىزمەتكەرلەرى ىزدەستىرىپ جاتىر.
ەسكە سالا كەتەيىك، تاۋدا بەلگىسىز ەر ادامنىڭ تيىسكەنىن ايتىپ، العاش رەت رەسەيدەن كەلگەن تۋريست قىزدار مالىمدەگەن ەدى.
كىماسار شاتقالىندا الدارىنان شىققان ەركەك ولاردى پىشاقپەن قۋالاپ، ابدەن ۇرەيىن العان.
قازىرگى كەزدە كۇدىكتىنىڭ ۇستىنەن 20 ادام شاعىمدانعان. الايدا زارداپ شەككەندەر بۇدان دا كوپ بولۋى مۇمكىن.