ۇلىقبەك ەسداۋلەتتىڭ مەرەيتويى تۋعان جەرىندە كەڭىنەن اتالىپ ءوتتى
بۇل مەرەكەلىك شارا وبلىس اكىمدىگىنىڭ قولداۋىمەن ءوتتى، دەپ حابارلايدى قازاقپارات.
وسكەمەندەگى ا. پۋشكين اتىنداعى وبلىستىق كىتاپحانادا ۇلىقبەك ەسداۋلەتپەن كەزدەسۋ ءوتتى. وندا كەلۋشىلەر قازاقستان جازۋشىلار وداعىنىڭ ءتوراعاسى، «قۇرمەت» وردەنىنىڭ يەگەرى، «قازاقستاننىڭ ەڭبەك سىڭىرگەن قايراتكەرى» ۇلىقبەك ەسداۋلەتتىڭ شىعارماشىلىعىنان سىر شەرتەتىن كىتاپ كورمەسىن تاماشالادى. كورمەگە اقىننىڭ «جۇلدىز جارىعى»، «التايدىڭ التىن تامىرى»، « ۇلىستىڭ ۇلى كۇنى»، «اق كەرۋەن»، «جاراتىلىس»، «جۋرەكتەگى جارىلىستار»، «زامان-اي»، «كيىز كىتاپ»، «قارا پيما» جانە «ىنتىق زار» اتتى كىتاپتارى قويىلدى.
كەزدەسۋدى قازاقستان جازۋشىلار وداعى وبلىستىق فيليالىنىڭ ديرەكتورى، بەلگىلى قالامگەر الىبەك قاڭتاربايەۆ جۇرگىزىپ وتىردى. ول مەرەيتوي يەسىنىڭ ءومىر جولىنا، شىعارماشىلىعىنا توقتالىپ ءوتتى. بۇدان سوڭ جاس اقىندار مەن زيالى قاۋىم اقىننىڭ ولەڭدەرىن مانەرلەپ وقىپ، انتيادرولىق قوزعالىستىڭ ءانۇرانىنا اينالعان «زامان-اي» ءانىن بىرگە شىرقادى. باسقوسۋ بارىسىندا ۇ. ەسداۋلەت قازاقستان جازۋشىلار وداعىنداعى جۇمىس بارىسى مەن بولاشاقتاعى شىعارماشىلىق جوسپارلارىمەن ءبولىستى.
كەزدەسۋدە اقىنعا كۇتپەگەن توسىن سىي رەتىندە قازاقستاننىڭ حالىق ءارتىسى روزا رىمبايەۆانىڭ بەينەقۇتتىقتاۋى كورسەتىلدى. بەينەقۇتتىقتاۋدا حالىق ءارتىسى ۇ. ەسداۋلەتتىڭ «نەۆادا- سەمەي» حالىقارالىق انتيادرولىق قوزعالىسىنا قوسقان ۇلەسى زور ەكەنىن اتاپ ءوتتى.
كەزدەسۋ سوڭى وبلىستىق دراما تەاتردا وتكەن «التىن ۇيام - التايىم» اتتى شىعارماشىلىق كەشكە ۇلعاستى. سالتاناتتى شاراعا قاتىسقان وبلىس اكىمىنىڭ ورىنباسارى اسەم ءنۇسىپوۆا جىلى لەبىزىن ارناپ، اقىننىڭ وڭىرىمىزدەگى جانە ەلىمىزدەگى مادەني مۇرانىڭ دامۋىنا قوسىپ جاتقان ۇلەسى زور ەكەنىن اتاپ ءوتتى. سونداي-اق، وبلىس اكىمى دانيال احمەتوۆتىڭ قۇتتىقتاۋىن جەتكىزدى.
شىعارماشىلىق كەشتى تاماشالاۋعا جيىلعان كورەرمەن قاۋىمنىڭ نازارىنا تالانتتى جەرلەستەرىنىڭ ومىرىنەن سىر شەرتەتىن بەينەسيۋجەت ۇسىنىلدى.
بۇدان سوڭ شىعىس قازاقستانداعى تانىمال انشىلەر مەن ۆوكالدىق توپتار ۇلىقبەك ەسداۋلەتتىڭ اندەرىن ورىنداپ، كورەرمەن قوشەمەتىنە بولەندى. ال مەرەيتوي يەسىنىڭ ونەردەگى ءىنىسى اقبەرەن ەلگەزەك ۇلىقبەك ەسداۋلەتتىڭ كوپتەگەن قازاقستاندىق قايراتكەرلەرگە ۇلگى ەكەنىن اتاپ ءوتتى.
- ول قازاقستان جازۋشىلار وداعىنا باسشىلىققا كەلمەي تۇرىپ-اق، پوەزيانىڭ گەنەرالىنا اينالىپ ۇلگەردى. پوەزيادا ۇستاز بولمايدى دەيدى. الايدا، ول ءبىزدىڭ باعىت بەرەر باعدارشامامىز سياقتى. ءقازىر ءبىز ۇلىقبەك ەسداۋلەتتەي بولۋعا تالپىنامىز، - دەدى اقبەرەن ەلگەزەك.
سالتاناتتى شارا بارىسىندا مەرەيتوي يەسىن وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ازامات مۇحامەدچينوۆ، وبلىستىق سپورت، مادەنيەت قىزمەتكەرلەرى كاسىپوداعىنىڭ ءتوراعاسى ءتۇسىپحان تۇسىپبەكوۆا، ايتۋلى قازاقستاندىق اقىن تىنىشتىقبەك ابدىكاكىم ۇلى مەن ەلىمىزدىڭ مادەنيەت قايراتكەرى ايمۇحانبەت بەيسەمبەكوۆ، كاسىپكەر ءارى مەتسەنات قايرات مۋسين قۇتتىقتاپ، اق تىلەكتەرىن ايتتى. ارتىنشا شىعىس قازاقستاننىڭ كاسىپكەرلەرى بىرلەسىپ، مەرەيتوي يەسىنە تەمىر تۇلپار مىنگىزدى.
