پەتروپاۆل مەن قىتايدىڭ جوعارى وقۋ ورنى ءبيداي مەن كارتوپتىڭ جاڭا سۇرىپتارىن زەرتتەپ جاتىر

پەتروپاۆل. قازاقپارات - پەتروپاۆلدا قىتايدىڭ يانلينگ قالاسىنىڭ سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتى دەلەگاتسياسىنىڭ قاتىسۋىمەن حالىقارالىق عىلىمي-پراكتيكالىق سەمينار ءوتتى، دەپ حابارلايدى قازاقپارات ءتىلشىسى.

سەميناردىڭ ماقساتى - م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى اگروتەحنوپاركىنىڭ عىلىمي جۇمىسى مەن بىرلەسكەن زەرتتەۋلەردىڭ ناتيجەلەرىن تالقىلاۋ، تاجىريبە الماسۋ.

حالىقارالىق سەمينارعا سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتىنىڭ پروفەسسورلارى Zhang Zhengmao, Hu Yingang, Guo Dongwei, جەرگىلىكتى جوعارى وقۋ ورنىنىڭ «اگرونوميا جانە ورمان شارۋاشىلىعى» كافەدراسىنىڭ قىزمەتكەرلەرى مەن ستۋدەنتتەرى، وتاندىق جانە شەتەلدىك سەلەكتسيانىڭ دالا داقىلدارىن ەكولوگيالىق سورتتىق سىناۋعا قاتىساتىن نازاربايەۆ زياتكەرلىك مەكتەبىنىڭ جانە پەتروپاۆل قالاسىنىڭ وقۋشىلار سارايىنىڭ وكىلدەرى قاتىستى.

بىلتىر قىركۇيەك ايىندا م. قوزىبايەۆ اتىنداعى س ق م ۋ- ءدىڭ بازاسىندا اگروتەحنوپارك اشىلدى. اۋماعى 5 گەكتار جەرگە قىتايلىق، شەتەلدىك جانە وتاندىق سەلەكتسيانىڭ اۋىلشارۋاشىلىعى داقىلدارى ەگىلىپ، ەكىنشى جىل قاتارىنان سىنالىپ جاتىر.

«اگروتەحنوپارك ەكى وقۋ ورنى اراسىنداعى كەلىسىم اياسىندا اشىلدى. ءبىزدىڭ وڭىردە وسىرۋگە بولاتىن بولاشاعى بار سۇرىپتاردى ءبولىپ الماقشىمىز. كەلەشەكتە ونى سەلەكتسيالىق ماتەريال رەتىندە قولدانىپ، ونىمدىلىگى جوعارى، اۋرۋعا توتەپ بەرەتىن ءبيداي، كارتوپ سۇرىپتارىن شىعارامىز. ازىرشە ناتيجە تۋرالى ايتۋ ەرتەرەك. اۋا-رايى - ءبارى ەسكەرىلۋى قاجەت. سول سەبەپتى ءبىر جىلدىق وسىمدىككە كەمى 3 جىل، كوپ جىلدىققا 5 جىل كەرەك»، - دەيدى اگروتەحنولوگيالىق فاكۋلتەتتىڭ دەكانى التىن شاياحمەتوۆا.

ۋنيۆەرسيتەت وكىلدەرىنىڭ ايتۋىنشا، قىتايدىڭ جوعارى وقۋ ورنىمەن اگروتەحنوپاركتى بىرلەسىپ قۇرۋداعى ماقسات - عىلىمي زەرتتەۋلەر ناتيجەسىندە اۋىل شارۋاشىلىعى سالاسىندا باسەكەگە قابىلەتتى مامانداردى دايارلاۋ، حالىقارالىق وزىق تاجىريبەنى ىلگەرىلەتۋ، بىرلەسكەن ءبىلىم بەرۋ باعدارلامالارى مەن عىلىمي جوبالاردى ازىرلەۋ جانە ىسكە اسىرۋ، ءبىلىم بەرۋ ساپاسىنىڭ جوعارى ستاندارتتارىنا قول جەتكىزۋ.

قىتايدىڭ يانلينگ قالاسىنىڭ سولتۇستىك-باتىس ورمان جانە اۋىل شارۋاشىلىعى ۋنيۆەرسيتەتىمەن ەكى جاقتى ىنتىماقتاستىق تۋرالى كەلىسىم اياسىندا ۋنيۆەرسيتەتتىڭ 6 ستۋدەنتى قىتايدا ءبىر سەمەستر ءبىلىم الدى. اكادەميالىق ۇتقىرلىق بويىنشا قىركۇيەك ايىندا تاعى ءبىر توپ شەتەلگە اتتانباق. سونىمەن قاتار، 6 وقىتۋشى اسپان استى ەلىندە تاعىلىمدامادان ءوتتى.