ارام ويىم بولعان جوق: اينۇر تۇرسىنبايەۆا نە ءۇشىن كەشىرىم سۇراعانىن ايتتى

 نۇر-سۇلتان. قازاقپارات - ايتىسكەر اقىن اينۇر تۇرسىنبايەۆا تۋرالى قىزىقتى دەرەكتەردى الەۋمەتتىك سايتتاردان جيناقتالعان دەرەققوردان وقىڭىز.

اينۇر تۇرسىنبايەۆانىڭ بالالىق شاعى

اينۇر تۇرسىنبايەۆا 1977 -جىلى بۇرىنعى سەمەي وبلىسى، اقسۋات اۋدانى، كوكجىرا اۋىلىندا (قازىرگى شىعىس قازاقستان وبلىسى تارباعاتاي اۋدانىنا قاراستى اۋىلداردىڭ ءبىرى) دۇنيەگە كەلگەن. 1994 -جىلى قازىرگى جامبىل وبلىسى مويىنقۇم اۋدانىنداعى 10 جىلدىق مەكتەپتى بىتىرگەن. اقىن قازاقستاندىق ب ا ق-قا بەرگەن سۇقباتىندا بالالىق شاعىندا قيىندىق كورگەنىن ايتادى.

«مەكتەپتە وقىپ جۇرگەن كەزىمدە جاعدايى تومەن وتباسىلارعا بەرىلەتىن كيىممەن ءوستىم. ول كەزدەرى مەملەكەت كيىم بەرەتىن. ساباقتا وتىراسىڭ، سوسىن «قانداي كيىمگە مۇقتاجسىڭ؟»  دەگەن ساۋالعا جازباشا جاۋاپ بەرەسىڭ. مىسالى، مەنىڭ قىستىق پالتوم نەمەسە قىسقا كيەتىن ەتىگىم جوق دەگەن سياقتى. كەيىن ونى الىپ كەلەدى دە، بۇكىل كلاستىڭ كوزىنشە بەرەتىن. ۇستەلدىڭ ۇستىنە اكەلىپ قويادى. سول كەزدە جاعدايى جوق وتباسىلارعا مەملەكەت كورسەتەتىن جاقسىلىعى عوي. مەملەكەت جىل سايىن كيىم بەرىپ تۇراتىن. سونداي كيىممەن وستىك. بۇل مەندە «تۇك جوق بولدى» دەگەن ءسوز عوي»، - دەيدى ول ءلايلا سۇلتان قىزىنا بەرگەن سۇقباتىندا.

سونىمەن قاتار اينۇر تۇرسىنبايەۆا سۇقباتتارىنىڭ بىرىندە ستۋدەنت جىلدارى ءبىراز قيىندىقپەن بەتپە-بەت كەلگەنىن دە اتاپ ءوتتى.

«ستۋدەنت بولدىق، جاتاقحانادا تۇردىق. قارنىمىز اشقان كەزدەر وتە كوپ بولدى. تروللەيبۋسقا اقشا تاپپاعان كەزدەر بولدى. ەندى بۇل بارلىق ستۋدەنتتىڭ باسىندا بولعان جاعداي عوي. اقشادان قاتتى قىسىلىپ جۇرەسىڭ. ءبىراق ەرتەڭىندە «اينۇر وسىنداي جەرگە بارىپ، ارناۋ ايتىپ كەت. وسىنداي جەردە ايتىساسىڭ» دەپ ادامدار تەلەفون سوعادى. سوسىن باراتىنمىن. قانت تا، نان دا جوق، «ەرتەڭ نە جەيمىن» دەگەن ۋايىممەن ۇيىقتاعان كەزدەر بولدى»، - دەيدى اينۇر تۇرسىنبايەۆا ومىردەگى قيىن جاعدايلاردى ەسىنە الىپ.

اينۇر تۇرسىنبايەۆانىڭ وتباسى

تۇرمىس قۇرعان. ءبىر ۇل، ءبىر قىزى بار. اشىق دەرەككوزدەگى مالىمەتكە سايكەس، كۇيەۋى - جامبىل وڭىرىندە باسشىلىق قىزمەت اتقارعان، 2002-2008 -جىلدارى سەنات دەپۋتاتى بولعان، ق ر تاەكۆوندو فەدەراتسياسىنىڭ قۇرمەتتى پرەزيدەنتى شامسات يسابەكوۆ.

«جولداسىم وتباسىمىزدىڭ كوپشىلىك تالقىسىنا تۇسكەنىنە وتە قارسى. مەن جار تاڭداۋدا جولىم بولعان اداممىن. ونەردە دە، ومىردە دە تياناقتى، ماتەريالدىق قولداۋ كورسەتەدى، مەنىڭ عانا ەمەس وتباسىمىزدىڭ تىرەگىنە اللا قۋات بەرسە ەكەن دەپ اماندىعىن تىلەپ وتىرامىن. اللا بارشا قىز- كەلىنشەكتەرگە ايەل باقىتىن ءناسىپ ەتسىن»، - دەدى ايتىسكەر kazaitys.kz پورتالىنىڭ وقىرماندارىنا.

تۇرسىنبايەۆا ايتىسقا قالاي كەلدى

اينۇر تۇرسىنبايەۆا ايتىس ونەرىندە العاش رەت 1991 -جىلى قايرات رىسقۇلبەكوۆكە ارنالعان وبلىسارالىق اقىندار سايىسىندا كوزگە ءتۇستى. كەيىن تولە ءبيدىڭ 330 جىلدىق مەرەيتويىندا ەكىنشى ورىندى جەڭىپ الدى. 1994 -جىلى سەمەيدە وتكەن قازاقتىڭ ۇلى اقىنى ابايعا ارنالعان مەكتەپ وقۋشىلارىنىڭ ايتىسىندا باس جۇلدەنى يەلەندى. ال ابايدىڭ 150 -جىلدىق مەرەيتويىندا وتكەن رەسپۋبليكالىق اقىندار ايتىسىندا جۇلدەگەرلەردىڭ قاتارىنان كورىندى. سونداي-اق، ول جامبىلدىڭ تۋعانىنا 150 جىل تولۋىنا ارنالعان اقىنداردىڭ رەسپۋبليكالىق ايتىسىندا 2-ورىندى يەلەندى.

اينۇر تۇرسىنبايەۆا ويىن اسىقپاي، جۇمساق قوڭىر ۇنىمەن تىڭداۋشىنىڭ كوكىرەگىنە ساۋلە قۇيارلىق ەتىپ، تولعانتىپ-تەبىرەنتىپ جەتكىزۋىمەن ەرەكشەلەنەدى.

اينۇر ايتىستا قانشا كولىك ۇتتى

سونىمەن قاتار ول قازاقستاندىق جۋرناليستەرگە بەرگەن سۇقباتىندا ايتىستا قانشا كولىك ۇتىپ العانىن دا ايتىپ بەردى.

«ايتىستان 34 ماشينا كولىك ۇتتىم. ونى قارسىلاسىما سىيلاعان كەزدەر بولدى. كولىكتى ساتقان كەزدەر وتە كوپ بولدى. اڭگىمەنىڭ اشىعىنا كەلگەندە، اقشا جيناۋعا سالاقپىن. قولىما بۇگىن اقشا تۇسسە شاشا سالامىن. ءبىراق تالاي اقشادان قىسىلعان كەزدەر بولدى»، - دەدى تۇرسىنبايەۆا The ەفير باعدارلاماسىنا بەرگەن سۇقباتىندا.

تۇراقتى جۇمىس ىستەپ كورگەن جوقپىن

ايتىسكەر ءالى كۇنگە دەيىن تۇراقتى جۇمىس ىستەپ كورمەگەنىن ايتادى.

«جاسىم 40 قا كەلىپ قالدى، مەن ءالى كوپ جەردە تۇراقتى جۇمىس جاساعان جوقپىن. ايتىستى مەنىڭ كاسىبىم ەكەن دەپ ويلايتىندار بار. الايدا ايتىس مەنىڭ ءومىرىم، ايتىسسىز ءومىر سۇرە المايمىن. ايتىسكەر اقىنداردىڭ بارلىعىن ءوز وتباسىم سياقتى قابىلدايمىن. باستى كۇنكورىسىم - ايتىس. دومبىراممەن كۇن كورەمىن دەپ ايتۋ كەرەك شىعار»، - دەدى ول سۇقباتتارىنىڭ بىرىندە.

«ارام ويىم بولعان جوق»

اينۇر تۇرسىنبايەۆا پسيحولوگيانى زەرتتەپ، ءوزىنىڭ جانىن تۇسىنگەنىن ايتادى.

«دەپرەسسياعا ءتۇسىپ، ىشكى كوڭىل- كۇيىڭ قۇلازىپ، جانىڭ پانا تاپپاي كەتكەن كەزدە ادام بىردەڭەنى ىزدەيدى عوي. «نەگە ماعان وسىلاي بولدى؟ نەگە، نەگە» دەگەن سۇراقتارعا جاۋاپ ىزدەي ءجۇرىپ، مەن پسيحولوگياعا كىرىپ كەتتىم. بۇل جەردەن مەنىڭ ەڭ ءبىرىنشى ۇتقانىم - مەن بارلىق جاعدايعا ءوزىمنىڭ كىنالى ەكەنىمدى ءتۇسىندىم. وسىدان سوڭ، ءومىرىم وزگەرىپ سالا بەردى. جاقسى كوڭىل-كۇيمەن ءجۇرىپ، جاقسى ادامدارعا تاپ بولا باستادىم. بۇل - قوسپاسى جوق اڭگىمە»، - دەيدى ول.

ايتىسكەر اقىن مىنەزىنىڭ كەمشىن تۇستارىنا قاتىستى ساۋالعا دا جاۋاپ بەردى.

«بۇرىن ماعان كەمشىلىگىمدى كوپ ادام ايتاتىن. مەن بۇرق ەتە قالام دا، اڭگىمەنىڭ بايىبىنا بارماي، باسقا نارسەنى ايتىپ جىبەرەمىن. ول ادام رەنجىپ قالاتىن. ومىرىمدە سونداي جاعداي وتە كوپ بولدى. ءبىراق ارام ويىم بولعان جوق. ايتا سالاسىڭ، ال ول ادام رەنجىپ قالاتىن. ارتىنان كەشىرىم سۇرايسىڭ. الايدا مەنىڭ ايتقان سوزدەرىم، ونىڭ كوڭىلىندە قالىپ قوياتىن. پسيحولوگيادان سوڭ، وسىعان قاتتى ءمان بەرە باستادىم»، - دەيدى اينۇر تۇرسىنبايەۆا.

اينۇر تۇرسىنبايەۆانىڭ جاڭا تابىس كوزى

سوڭعى جىلدارى ايتىسكەر اقىن جاڭا تابىس كوزىن تاپقانعا ۇقسايدى. ول ادامدار ءۇشىن الەۋمەتتىك جەلىدە پسيحولوگيالىق ترەنينگ وتكىزەتىن بولدى.

«مەن ونلاين ترەنينگ جۇرگىزگەن كەزدە 2-4 مىڭ ادامعا دەيىن كورگەن كەزدەر بولدى. ءبىراق مەن اينۇر بولماسام، حالىقتىڭ سۇيىكتى قىزى بولماسام، ماعان ەشكىم كەلمەس ەدى. سوندىقتان نەسىبەم ماعان ايتىس ارقىلى كەلدى. ال حالىقتىڭ ماعان دەگەن ماحابباتى «اقشا، بايلىق، باقىت» تۇرىندە كەلىپ جاتىر»، - دەيدى تۇرسىنبايەۆا Tْngi studio باعدارلاماسىنا بەرگەن سۇقباتىندا.

 

Sputnik