پەتروپاۆلدا ادام اعزالارىنىڭ كورمەسى ءوتتى

پەتروپاۆل. قازاقپارات - پەتروپاۆلدا ستۋدەنتتەردىڭ قولدان جاساعان ادام اعزالارىنىڭ كورمەسى ءوتتى، دەپ حابارلايدى قازاقپارات ءتىلشىسى.

ادامنىڭ فيزيولوگياسى مەن اناتومياسىنا ارنالعان جۇمىستاردى بولاشاق دارىگەرلەر قولدا بار زاتتاردان جاساعان. ولارعا قويىلعان تالاپ - ادام اعزالارىن بارىنشا ۇقساس ەتىپ جاساۋ. كەيىن ستۋدەنتتەردىڭ جۇمىستارى وقۋ پروتسەسىندە قولدانىلادى.

«جوعارى مەديتسينا مەكتەبى فاكۋلتەتىنىڭ 1-كۋرس ستۋدەنتتەرى قاتىستى. ولارعا جىل بويى العان بىلىمدەرىن قورىتىندىلاۋ ماقساتىندا ادام اعزالارىنىڭ ماكەتتەرىن جاساۋ تاپسىرىلدى. ەكى اپتا ۋاقىت بەرىلدى. ستۋدەنتتەر تاپقىرلىق كورسەتىپ، تاپسىرمانى ويداعىداي اتقاردى. سول سەبەپتى ءبىز كورمە ۇيىمداستىرامىز دەپ شەشتىك»، - دەيدى م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتتىڭ اعا وقىتۋشىسى نازگۇل ىزدەنوۆا.

كورمەگە 40 ماكەت قويىلدى. بولاشاق مەديتسينا قىزمەتكەرلەرى كوز، بۇيرەك، باۋىردان باسقا جاسۋشا ىشىندەگى مەمبراناعا دەيىن كورسەتكەن.

«ءبىز 5 ادامنان ءبولىنىپ، ءبىر جوبا الۋىمىز قاجەت بولدى. ءبىزدىڭ توپ مەمبرانا جاسايمىز دەپ شەشتىك. ول ادام اعزاسىنداعى جاسۋشا ىشىندەگى مەمبرانا. جۇمىسقا كارتون، پەنوپلاست، تۇزدالعان قامىر قولداندىق. ءبىر اپتانىڭ ىشىندە جاساپ شىقتىق بۇل جۇمىستى»، - دەيدى 1-كۋرس ستۋدەنتى گۇلىم وزبەكوۆا.

س ق و-دا دارىگەر جەتىسپەۋشىلىگى ماسەلەسى وزەكتى، قاڭتاردىڭ بىرىنە دەيىنگى رەسمي اقپارات بويىنشا وڭىرگە 226 مامان قاجەت. وسى تۇيتكىلدى شەشۋ ماقساتىندا بىلتىر العاش رەت پەتروپاۆلدا جوعارى مەديتسينا مەكتەبى اشىلدى. تۇلەكتەرگە 76 وقۋ گرانتى بەرىلىپ، قازىر 100 دەن اسا جاس ءبىلىم الىپ جاتىر. مۇندا ستۋدەنتتەر حيرۋرگيا، پەدياتريا، اكۋشەرلىك- گينەكولوگيا جانە ىشكى اۋرۋلار جانە جالپى تاجىريبەدەگى دارىگەر سەكىلدى 5 باعىت بويىنشا وقيدى.