ايەلدەردىڭ كۇيزەلىسكە ءتۇسۋ سەبەبى

نۇر-سۇلتان. قازاقپارات - 30 جاستاعى قىز-كەلىنشەكتەر كۇيزەلىسكە جاقىن بولادى. جاس كەزدە كوڭىل بولەتىن، اينالىساتىن قىزىقتى ىستەر كوبىرەك بولادى.

ال 30 جاستان اسقاندا ايەلدەر كۇندىز جۇمىستان باس الماي، جەكە باستىڭ قامى مەن ءوز ەڭبەگىنىڭ جەمىسىن كورۋدى ۇمىتادى. نازارلارىڭىزعا ايەلدەردە ورىن الاتىن بۇل كۇيزەلىستىڭ ناقتى سەبەپتەرىن ۇسىنامىز.

30 جاس نازىك جاندىلاردىڭ اقىل- ويى ناعىز تولىساتىن ۋاقىت دەسەك تە بولادى. ولار كەشەگىسى مەن بۇگىنگىسىن، ەرتەڭىن پاراساتتى تۇردە ويلانا باستايدى. پسيحولوگ ماماندار 30 جاستاعى كۇيزەلىستىڭ باستى سەبەبى، ىشكى سەزىمدەر مەن شىندىقتىڭ سايكەس كەلمەۋىنەن دەپ تۇسىندىرەدى. بالالىق شاق پەن ودان كەيىنگى جاسوسپىرىمدىك كەزەڭدەردەگى قيالدار مەن ارمان الەمى ماڭگى تۇراقتامايتىنىن سەزىنە الادى. ءومىردىڭ سان ءتۇرلى سوقپاعىنداعى كەلەڭسىزدىكتەر مەن سىناقتار كوڭىلگە قاياۋ سالادى. كەيدە كۇيزەلىسكە گورموندار، شارشاۋدى كىنالايتىنى بەلگىلى. الايدا شىندىق ىشكى دۇنيەنىڭ تەرەڭىندە بولىپ جاتقان ارپالىستان شىعاتىنى ايقىن. ءوز قولىمەن قالاعان باقىتتى ءومىر مەن ماقساتتار ىشكى الەممەن سايكەس كەلمەيتىندىگى مازالايدى.

كۇيزەلىستىڭ تاعى ءبىر سەبەبى، بۇل جاستا ايەلدەردىڭ الەۋمەتتىك ءرولى وزگەرەدى. ءبىرى - انا، ءبىرى - جار اتانادى. كەشەگى ستۋدەنتتەن كاسىبي مامانعا اينالادى، جاڭا وتباسىنىڭ نەگىزىن قالايدى. ولارعا دەگەن جاۋاپكەرشىلىك ارتادى دا وزىنە دەگەن ۋاقىتى ازايا باستايدى. جاۋاپكەرشىلىك پەن جۇكتەلگەن مىندەت كۇننەن- كۇنگە ۇلعايادى. مۇنداي وزگەرىستەر ارينە، ايەل بالاسىنا وڭاي ەمەس، ءوزىن جوعالتادى.

ىشكى دۇنيەدەگى تولعانىستىڭ سوڭى كۇيزەلىسپەن اياقتالادى. وسى ورايدا ومىرىڭىزگە وزگەرىس ەنگىزۋگە تالپىنىڭىز. مۇنى كىشكەنتاي نارسەدەن دە باستاي الاسىز. الايدا وعان ەڭبەكتەنۋگە تۋرا كەلەدى. ءاربىر باستاۋ العان ءىستىڭ جەمىسىن قاناعات تۇتۋ كەلەسى بيىكتى جاقىنداتادى.

كۇيزەلىستى قولدان جاسايتىندار دا بار. قانداي جاعداي بولماسىن بۇدان شىعاتىن جولدى ايەل زاتى ءوزى تابۋى ءتيىس. ۇساق ماسەلەلەردى كوڭىلگە الىپ، اشۋلانۋدىڭ قاجەتى جوق. سىرتقى كەسكىن- كەلبەتكە ءمان بەرىپ، كۇتىنىڭىز. بۇل ءوزىڭىزدى ەركىن، كوڭىلدى سەزىنۋگە ىقپال جاسايدى.

ومىردە قانداي وزگەرىستەر بولسا دا، ايەل ادام وزىنە مىندەتتى تۇردە ۋاقىت ءبولۋى ءتيىس. ناتيجەسىندە باعاڭىزدى ارتتىراسىز. ءوزىن قىزىقتىراتىن كەز كەلگەن ىسپەن اينالىسۋ دا جانىڭىزدى جادىراتادى.

ايەل زاتىنىڭ كوڭىل- كۇيى مەن وزگەرىستەرى ەر- ازاماتتىڭ دا نازارىنان تىس قالماعانى ءجون. جارىنىڭ جانىن ءتۇسىنۋ ارقىلى جوعارىداعى كەلەڭسىزدىكتەن كەلىنشەكتەردى قۇتقارۋعا بولادى. وتباسى بىرلىگى مەن تىنىشتىعى، بەرەكەسى مەن جىلۋلىعىن ساقتايتىن اياۋلى جاننىڭ كۇيزەلىسكە تۇسپەۋىنە ەر- ازاماتتاردىڭ دا ۇلەسى بار.