عارىشتى قوقىستان تازارتپاسا

نۇر- سۇلتان. قازاقپارات - قازىردىڭ وزىندە جەردىڭ اينالاسىندا بەس مىڭ توننادان استام عارىش قوقىسى ۇشىپ ءجۇر. وعان قوسا جەرسەرىكتەردىڭ سانى كۇننەن كۇنگە ارتۋ ۇستىندە.

جەرگە قۇلايتىن عارىش قالدىقتارىنىڭ باسىم بولىگى "قورعانىش" قاباتى - اتموسفەرادا كۇلگە اينالعانىمەن ىرىلەرى دىتتەگەن جەرىنە جەتۋدە. حالىقارالىق عارىش بەكەتى جىلىنا بىرنەشە رەت وربيتاداعى قالدىقتاردان "قاشۋعا" ءماجبۇر. 2016 -جىلى قۇم قيىرشىعى يلليۋميناتوردا جەتى ميلليمەتردى قۇرايتىن سىزات قالدىرعان بولاتىن. ال ودان ءۇش جىل بۇرىن ءدال وسىنداي جاعداي قايتالانىپ، كۇن باتارەياسىنا نۇقسان كەلگەن ەدى. دەمەك 10 سانتيمەتردى قۇرايتىن قالدىق - عارىش دەڭگەيىندە ۇلكەن اپات دەگەندى بىلدىرەدى. ويتكەنى قيىرشىقتاي قوقىس ساعاتىنا 30 مىڭ شاقىرىم جىلدامدىقپەن ۇشادى. ال وربيتانىڭ تۇكپىر- تۇكپىرىندە مۇنداي قالدىقتاردىڭ مىڭعا جۋىعى بار. اراسىندا قيىرشىقتايى دا، ىرىلەۋى دە كەزدەسەدى.

 ەگەر عارىشكەر بورتتىڭ سىرتىندا جۇمىس ىستەپ جاتقان كەزىندە اپپاراتتان تۇسكەن تامشىداي عانا بوياۋ تيسە - سكافاندر لەزدە تەسىلىپ، عارىشكەردىڭ ومىرىنە قاۋىپ توندىرەدى. الايدا حالىقارالىق عارىش بەكەتى ورنالاسقان 408 شاقىرىم بيىكتىكتە قوقىستار كوپ جينالماعان. ولاردىڭ باسىم بولىگى 35 مىڭ شاقىرىمداعى گەوستاتسيونارلىق وربيتانى "مەكەندەيدى". قالدىقتار نەگە مۇنشا كوپ دەيسىز عوي؟ ويتكەنى جەرسەرىكتىڭ قىزمەتى اياقتالعاننان سوڭ ول عارىشتا قالا بەرەدى. سوسىن ءوزى سەكىلدى وزگە عارىش اپپاراتتارىمەن سوقتىعىسىپ، جان- جاققا ۇشادى. كەيدە جۇمىس ىستەپ تۇرعان اپپاراتتارعا سوقتىعىسىپ قالاتىن جايتتار كەزدەسەدى. مىسالى، 2009 -جىلى ىستەن شىققان رەسەيلىك اسكەري "كوسموس-2251" اپپاراتى امەريكالىق Iridium33 كەمەسىنە سوقتىعىسىپ، ارتىنان التى ءجۇز قالدىق قالدىردى. سونىمەن قاتار، ءبولىنىپ كەتكەن ۇدەمەلى بلوكتاردا قالعان ازعانتاي جانارماي جارىلىپ، ساتىنى شاشىراتىپ جىبەرەدى. ءبىر سوزبەن ايتقاندا - حاوس. عىلىمي تىلمەن ايتقاندا - كەسسلەر سيندرومى.

بۇل NASA كەڭەسشىسى، امەريكالىق استروفيزيكتىڭ تەگى. دونالد كەسسلەر وتكەن عاسىردىڭ 70- جىلدارى اسپانعا كوتەرىلگەن ءاربىر قۇرىلعىنىڭ عارىش قوقىسىنا اينالاتىنىن بولجاعان بولاتىن. جىل سايىن عارىش قوقىسىنىڭ قۇلاۋىن جەردىڭ تۇكپىر- تۇكپىرىنەن تاماشالاۋعا بولادى. مىسالى، الداعى ۋاقىتتا جەرگە پلانەتا ارالىق "كوسموس-482" ستانتسياسىنىڭ قۇلايتىنى بەلگىلى. 1972 -جىلى كەڭەس ۇكىمەتىنىڭ شولپانعا ۇشىرعان اپپاراتى قاجەتتى تراەكتورياعا شىعا الماي، وسى كۇنگە دەيىن وربيتادا ءارلى- بەرلى جۇرگەن. سالماعى جارتى توننانى قۇرايتىن اپپارات وربيتادا تۇگەل جانبايدى. جەرگە كەم دەگەندە 50-60 كەلىدەي بولىگى قۇلايدى. ال اپپاراتتى جاقسى بىلەتىندەر ونىڭ جىلۋ قورعانىسىنىڭ مىعىم ەكەنىن ايتادى. ودان بولەك 2009 -جىلى ۇشىرىلعان امەريكالىق Atlas V زىمىرانى قۇلاۋى مۇمكىن. بولاشاقتا مۇنداي جاعداي قايتالانباس ءۇشىن عالىمدار قازىردىڭ وزىندە اسپاندى قوقىستان تازارتۋدىڭ امالدارىن ويلاستىرۋ ۇستىندە.

ۇساقتاعىش


 كورشى رەسەي مەملەكەتىنىڭ ونەرتابىسى. قوقىستاردى ارقانمەن قارعىپ ۇستاپ، الدىمەن ارنايى ۇساقتاعىشعا جىبەرىپ، ارتىنشا ۇنتاقتاعىش سالادى. ودان الىنعان ۇنتاقتى وتتەك جانە سۋتەكپەن ارالاستىرىپ گاز الادى. بۇل گازدى عارىش اپپاراتىنا وتىن رەتىندە قولدانۋعا بولادى.

تور نەمەسە اۋ


SpaceX كومپانياسىنىڭ RemoveDEBRIS (اعىلش. "قوقىستى جينا") اپپاراتى قوقىسقا سۇڭگىمەن اتىپ، تورمەن وراپ الادى. ارتىنشا جەرگە قاراي تارتىپ، اتموسفەرادا ورتەيدى.

 قوقىستاردى جيناۋشى الىپ قۇرىلعى



الىپ قۇرىلعى قوقىستاردىڭ كينەتيكالىق ەنەرگياسىن پايدالانادى. عارىشتا قوقىستاردىڭ جىلدامدىعى سەكۋندىنا 15 شاقىرىمدى قۇرايدى. قۇرىلعى قوقىستاردى جيناپ، شاشىراپ كەتپەۋىنە سەپ بولادى. بۇل ارقىلى جاساندى جەر سەرىكتەرىنە تونەتىن قاۋىپ تە ازايادى.

لازەر


قىتايدىڭ اۋە كۇشتەرى ينجەنەرلىك ۋنيۆەرسيتەتىنىڭ عالىمدارى ويلاپ تاپقان. ولاردىڭ اپپاراتتارى عارىش مەتاللدارىن سەكۋندىنا 20 جارقىلداق ينتەنسيۆتىلىكتى لازەرمەن كوزدەپ ۇساقتايدى، ودان كەيىن اتموسفەراعا تۇسىرەدى نەمەسە گەوستاتسيونارلى وربيتاعا ۇشىرادى.

 ماگنيتتى سۇيرەگىش


تۋلۋزا ۋنيۆەرسيتەتىنىڭ عالىمدارى ۇسىنعان. قوقىس جيناعىش اپپارات ارنايى ماگنيتتەرمەن 10-15 مەتردەن قالدىقتاردى قاجەتتى جەرگە باعىتتايدى.

عارىشتىق جۇك كولىكتەرى


عارىشتى قوقىستان ارنايى عارىشتىق جۇك كولىكتەرىمەن تازارتۋعا بولادى. ولار قوقىس ارقىلى ءوز- وزدەرىن قامتاماسىز ەتە الادى. ياعني قوقىستاردى پلازمالىق وتىنعا اينالدىرادى. بۇلاردى جەر سەرىكتەرى ءۇشىن ءموبيلدى قۋات ستانتسيالارى رەتىندە پايدالانۋعا دا بولادى.

جوعارى كەرنەۋ


بۇل يدەيانى جاپون ماماندارى ۇسىنعان جانە ونى سىناقتان وتكىزىپ تە كورگەن. الايدا العاشقى سىناق ءساتسىز بولدى. 2016 -جىلى ولار "كۋنوتوري" ("دەگەلەك") اتتى اپپاراتتى ۇشىرعان. جوسپار بويىنشا ول الدىنا 700 مەترلىك ارقاندى لاقتىرىپ، بويىنا توق جىبەرۋ قاجەت بولاتىن. جوعار كەرنەۋدىڭ ارقاسىندا ماگنيت ءورىسى پايدا بولىپ، قوقىستار تارتىلاتىن. الايدا بەلگىسىز ءبىر تەحنيكالىق اقاۋدىڭ سالدارىنان سىناق ءساتسىز ءوتتى.

بار ماسەلە - ۇسىنىلعان تاسىلدەردىڭ ەشبىرىنىڭ ءالى كۇنگە جۇزەگە اسپاۋىندا. ەگەر دە الداعى 30 جىلدا عارىشتى قوقىستان تازارتۋدى باستاماساق اسپان تۇرماق، جەردىڭ ءوزى قوقىسقا تولادى. نە تەلەسيگنال، نە راديسيگنالدار قابىلداماي، ءموبيلدى بايلانىس پەن عالامتور ىستەن شىعادى.

Massaget.kz